Actividades para todos os públicos e sen sair da nosa comarca para esta fin de semana de agosto, na que ademáis de piscina e prais fluviais temos outras propostas para o ocio e o tempo libre.

O Irixo

Humor e Clown con "Isla Letriska", venres 13 ás 21 horas na praia fluvial.

Concerto de música para un público familiar con Pakolas e o seu "Rockeando con Ramona Órbita", domingo 15 ás 18 horas na praia fluvial.

Boborás

Visita teatralizada a Pazos de Arenteiro, venres 13 ás 22:30 horas. 

Espectáculo de maxia "As aventuras de Marco Polo" do mago Le Grand Martin. Sábado 14 ás 19 horas  no campo da festa de Laxas e domingo 15 ás 19 horas na eira de Vilachá.

Leiro

O Novocine ofrece dúas películas en carteleira: "Bebé Jefazo, negocios de familia" en sesións ás 16 e 18,15 horas; e "A todo tren, destino Asturias" en sesión ás 20:30 horas.

O Carballiño

O domingo dia 15 chega outra vez a O Carballiño o humorista galego "Touriñan" co seu novo espectáculo "Aquí Tou", na programación de verán do concello do Carballiño. O aforo está xa cuberto.

Ata o 22 de Setembro prolongaráse a campaña promocional da Praza de Abastos do Carballiño, que repartirá bos premios entre a súa clientela. 

Coas compras que a partir deste venres dia 13 de agosto, os clientes de calquera dos postos do mercado carballiñés recibirán participacións para un sorteo que terá os seguintes premios: 1 Tablet, 1 funda para tablet, 1 teléfono móbil, 2 pulseiras deportivas, 1 cafeteira, 1 tostadora, unha caixa de viño "Pazo Tizón", 500 euros en vales de compra de 50 euros, 2 circuítos termais no balneario das Caldas de Partovia e 1 fin de semana no "Gran Talaso Hotel de Sanxenxo".

O Carballiño rompe hoxe unha tendencia descendente que se mantiña dende fai xa dúas semanas en canto a casos activos de coronavirus, que son hoxe 3 máis que onte e sitúa a cifra actualizada nos 63 contaxios activos no municipio carballiñés.

No resto de concellos os casos de covid que aparecen na relación deste martes dia 10 de Agosto son os seguintes: Avión (14) Beariz (9) Maside (6) Boborás (5) San Amaro (5) e xa finalmente, con 1 contaxio figuran os concellos de Leiro, O Irixo, Piñor, Punxín e Cea.

O vicepresidente económico e conselleiro de Economía, Empresa e Innovación, Francisco Conde, visitou as instalacións da empresa Augas do Paraño, cuxo proxecto de ampliación acaba de ser declarado de interese autonómico por parte da Xunta. Segundo indicou, esta consideración vénlle dada pola relevancia deste sector e porque o proxecto contribúe ao desenvolvemento económico e social de Galicia cun impacto especial no medio rural, no concello de Boborás.

O proxecto prevé un investimento de 7 M€ para instalar novas liñas de embotellado de auga mineral: desmineralizada, en formato bag in box (bolsas cheas a presión e introducidas en caixas de tarxeta) e en envase de cristal. A ampliación das súas instalacións é, por tanto, unha necesidade estratéxica para a empresa, que poderá incrementar os niveis de envasado e distribución.

Augas do Paraño é unha empresa familiar de capital galego fundada en 2004. Conta con case unha trintena de empregados, factura máis de 2 M€ ao ano e distribúe a súa auga maioritariamente a Galicia pero tamén en Lleida, Tarragona, Valencia, Valladolid, León, Asturias e Biscaia. Dela, o vicepresidente económico destacou a súa aposta pola creación de emprego no rural e a súa “vocación por seguir crecendo”.

Na mesma liña, Conde destacou que é “un referente desde Ourense” dun sector do que Galicia ten recurso suficiente, posto que a Comunidade supera os 300 mananciais (o 15% dos 2000 que hai en España) e conta con dez plantas de envasado de auga mineral natural, que representan o 10% das 100 que hai en todo o país.

A Policia Local do Carballiño procedeu a identificar a corenta persoas involucradas en varios incidentes, a maioria destas persoas como participantes en festas ilegais entre as 3:00 e as 5:00 horas da madrugada do pasado domingo. 

Concretamente, dúas destas festas ilegais detectaronse na parroquia de Veiga, outras dúas na parroquia de Arcos e unha no casco urbano do Carballiño. A Policia Local procedeu a disolver estas reunións festivas e identificou a unhas 30 persoas por infrinxir a lei de saúde pública de Galicia polo incumprimento da normativa para a contención da Covid-19.

Tamén na madrugada do domingo, identificou a unha persoa como presunto autor dun delito ao mobiliario público na zona do parque municipal, e xa a última hora da tarde do domingo foi requerida a intervención policial ao orixinarse unha pelexa na vía pública, concretamente na rúa Perfectivo Viétez do Carballiño.

Finalmente, o balance de actuacións da Policia Local do Carballiño desta pasada fin de semana complétase cunha denuncia e posterior intervención nun caso de violencia de xénero no municipio carballiñés.

En tempos de resistencia, e por segundo ano por culpa da pandemia de non festa do pulpo, O Carballiño volveu a atraer a miles de persoas ansiosas de degustar o pulpo á feira, un dos pratos estrela da gastronomia galega nacido no Carballiño da man mestra das pulpeiras e os pulpeiros de Arcos, distribuídos polo casco urbano para abastecer de polbo á feira comedores e terrazas da hostelaría local, e por suposto, aos comedores dos fogares carballiñeses tal como acontece neste segundo domingo de Agosto dende fai 59 anos. Igual que o ano pasado, o parque municipal estivo baleiro.

A afluencia de visitantes a O Carballiño foi unha constante nos últimos dias, e incrementouse coincidindo coa fin de semana, con cheo nos 31 establecementos que ofreceron este domingo o menú da Festa do Pulpo. En boa parte deste locais as reservas xa completaran o aforo dende fai dias, polo que as Xornadas Gastronómicas do Pulpo hai que consideralas como un éxito de convocatoria neste contexto de pandemia no que a situación sanitaria non permite un formato de participación multitudinaria como é a Festa do Pulpo. Asi o acreditan, sen excepción, todos os hostaleiros consultados por COPE O Carballiño.

O concello do Carballiño non celebrou ningún acto institucional este domingo, pero sí veu organizando diversas actividades no transcurso de toda a semana, aínda que condicionadas polo protocolo Covid, e que se completan nesta xornada de domingo coa actuación da agrupación folclórica galega "Cantigas e Agarimos", ás 8 da tarde no auditorio da Praza da Veracruz.

A Praza do concello do Irixo é dende hoxe oficialmente Praza de Manuel Penedo, o exalcade que gobernou este concello durante 32 anos, entre os anos 1987 e 2019. Foron os irmáns do finado alcalde, Maria Jesús e Isaac, os encargados de descubrir a placa identificativa co novo nome que dende hoxe recibe esta Praza, sita a carón da casa do concello.

Ademáis, o pleno da corporación acordou nomear ao exalcade, coincidindo co segundo cabodano do seu pasamento, como fillo predilecto do concello do Irixo,a titulo póstumo. Foi unha emotiva xornada na matinal deste sábado 7 de Agosto, na que participaron veciños e veciñas do Irixo, familiares de Penedo, concelleiros, e representantes institucionais entre os que se encontraban o delegado da Xunta,Gabriel Alén e a deputada provincial Patricia Torres.

O presidente do Parlamento de Galicia, Miguel Ángel Santalices foi o encargado de ler os méritos que xustifican o nomeamento do exalcalde como fillo predilecto do Irixo, a título póstumo. Santalices salientou que "o punto forte de Manuel Penedo sempre foi o contacto coa xente, a atención persoal aos cidadáns e as relacións con todos os veciños, tratando sempre de solucionar os problemas que puidesen presentarse". Para o presidente da Cámara Galega, o alcalde Penedo foi "un exemplo de servizo ao ben común, sempre necesario, quizais hoxe máis que nunca". Santalices actuou como instrutor do expediente por petición do actual alcalde do Irixo, Manuel Cerdeira, que colleu o relevo na alcaldia tras o pasamemento de Manuel Penedo Paradela.