Os carballiñeses e todas as persoas que se acheguen este venres dia 29 de Xaneiro aos locais participantes na ruta das tapas poderán degustar ata trinta formas diferentes de tapas cuxo produto central é o pulpo.

Tosta de pulpo con queixo do Cebreiro e base de puré de pataca; pulpo con fabas; salpicón de marisco con pulpo; salteado de verduras con puré de pataca e pulpo á grella; pulpo con gambas e cachelos… Son algunhas das tapas que se presentaron hoxe e que mañá poderán ser degustadas nos vintenove bares, mesóns e restaurantes do Carballiño que participan na Ruta das Tapas, e que mañá, venres, 29 de xaneiro, celebra a súa cuarta edición.

O acto de presentación desenvolveuse no local social da parroquia de Arcos, berce das pulperías e pulpeiros. Ata alí se achegou un nutrido grupo de hostaleiros que exhibiron e explicaron as súas creacións culinarias, como mostra da gran variedade de formas que hai de preparar o pulpo, ademáis da habitual do pulpo á feira.

O alcalde do Carballiño, Francisco Fumega, que acompañou aos hostaleiros nesta presentación, agradeceu a creatividade e o compromiso do sector para converter ao Carballiño nun referente da gastonomía en Galicia.

Pola súa parte, o concelleiro de Promoción Turística, José Manuel Dacal, destacou o éxito acadado nas anteriores edicións e desexou unha concurrencia semellante na xornada deste venres. Tamén dixo que a venda de rifas nos locais de hostalería para participar nun premio de 1.000€ e unha viaxe, ía a bo ritmo, e axudaba a promover á hostalería local.

A cuarta edición da xornada gastronómica dedicada ás diferentes variedades do pulpo, se desenvolverá mañá, venres, 29 de Xaneiro, a partir das 20,00 h., nos 29 locais hostaleiros adheridos a esta iniciativa.

O elevado número de inscricións para desfilar o martes, día 9 de febreiro, augura un entroido moi participativo no Carballiño.

As concellalías de Cultura e Promoción Turística organizan sete días de actividades e festexos, que comezarán o venres, día 5 de febreiro, e rematarán o domingo de piñata, 14 de febreiro, coa celebración da XXII Festa da Cachucha.

Charangas, folións, comparsas, orquestras e DJs porán a animación polas rúas e prazas do Carballiño que, nesta ocasión contará cunha gran carpa na Praza do Emigrante, en prevención de que se produzan condicións climatolóxicas adversas.

Nenos e maiores terán o seu propio baile de disfraces, o sábado e o domingo, respectivamente, e, por vez primeira, o desfile da Festa da Cachucha celebrarase pola mañá, cara ao mediodía, co obxectivo de promover a máxima concurrencia ao xantar nos restaurantes e mesóns que ofrecerán o menú típico da cachucha.

Os concelleiros de Cultura e Promoción Turística, Diego Fernández e José Manuel Dacal, respectivamente, destacaron durante a presentación de hoxe o programa da tarde do martes e da noite do luns, cun baile e verbena de disfraces na Praza Maior a cargo da orquestra-espectáculo Fórmula, formada recentemente por músicos das mellores orquestras de Galicia, para competir directamente con elas nesta próxima tempada.

Neste entroido non faltará a actuación da comparsa histórica do Carballiño, Os Liberianos, que cantarán as súas coplas o sábado pola tarde, na carpa da Praza do Emigrante, nin tampouco faltará o Enterro da Sardiña do mércores de cinza, que culminará cunha gran chocolatada na Praza Maior.

Ao igual que nas últimas edicións do entroido, o domingo 14 celebrarase a XXII Festa da Cachucha, con animación polas rúas dende a mañá, con catro charangas, varios folións procedentes doutros lugares de Galicia e as comparsas gañadoras do concurso do martes, que realizarán un recorrido polo centro da vila.  A festa culminará cun baile na Praza Mayor, coa nova orquestra-espectáculo “La OcaBand”.

PROGRAMACIÓN DA FESTA DO ENTROIDO E FESTA  DA CACHUCHA

 Venres, 5 de febreiro

“FESTA VAQUEIRA” nos locais de ocio do Carballiño durante a noite

Sábado, 5 de febreiro

OBRADORIO INFANTIL DE MÁSCARAS DE ENTROIDO

De11,30 a13,30 horas na Carpa de Pista Roxa

DESFILE e CONCURSO DE DISFRACES. Animación a cargo DJ “Tibu”

A partir das 16,30 horas na Carpa de Pista Roxa

Domingo, 7 de febreiro

BAILE DE DISFRACES para 3ª idade. Animación a cargo dun DÚO MUSICAL

A partir das 17,00 h na Carpa da Pista Roxa

CANTO DE COPLAS A CARGO DOS LIBORIANOS

A partir das 20,00 horas na Carpa da Pista Roxa.

 Luns, 8 de febreiro

BAILE DE DISFRACES a cargo da ORQUESTRA FÓRMULA, a partir das 21,00  horas na Praza Maior

 Martes, 9 de febreiro

Animación musical a cargo da Escola de Gaitas, a partir das 12,00 h polas rúas

GRAN DESFILE DE COMPARSAS, a partir das 17,00 horas polas rúas

 Mércores, 10 de febreiro

ENTERRO DA SARDIÑA, a partir das 19,00 horas na Praza Maior.

Animación a cargo de Aspadisi e Charanga Castro Bello

GRAN CHOCOLATADA, a partir das 20,00 horas na Praza Maior.

 Domingo, 14 de febreiro

XXII FESTA DA CACHUCHA

DESFILE DE COMPARSAS E CARROZAS, a partir das 12,00 horas polas rúas do Carballiño. Animación a cargo de: “Folión de Fradelo”, “Folión de Arrieiros de Petín”, “Percusión Os da caña”.

Animación a cargo de charangas:, “Castro Bello”, “Filantrónica Doctor Anchoa”, “Os Chispas”, “Noroeste”, nos locais participantes na Festa da Cachucha a partir das 12,00 h

ORQUESTA LA OCA

A partir das 17,00 horas na Praza Maior

Plataformá Masidá asinou a súa Acta Fundacional para constituírse  como Asociación. A plataforma elixiu como escenario da súa constitución, o monte veciñal de Bouzas, "sobre o que se pretende construír a planta de incineración de neumáticos, talando 20.000 m2 ricos en flora e fauna, contaminando o aire e o acuífero que fornece de auga ao complexo mineromedicinal da Rañoa", manifestan.

Desde Plataforma Masidá afirman que "o espírito da asociación é a defensa de dous bens xurídicos fundamentais: o dereito á calidade de vida e o dereito á saúde. Sosteñen que estes dous  bens non son susceptibles de mercadeo interesado senón un préstamo das xeracións vindeiras".

Así mesmo, aprecian "múltiples irregularidades entre as que destacan, un absoluto segredo e falta de información, por parte do alcalde de Maside, que chegou a afirmar que se trata dunha planta de reciclaxe de neumáticos cando realmente é unha planta de valorización polo procedemento de pirólisis", subliñan dende esta asociación.

Denuncian que a visita guiada que o alcalde realizou ás instalacións da empresa que promove este proxecto, "serviu a intereses particulares e non ao interese xeral de todos os veciños de Maside".

A plataforma afirma que "o reducido grupo de comuneiros que acompañaron ao alcalde na visita se autoproclamaron como Xunta Reitora sen convocar Asemblea e seis comuneiros impugnaron a esta Xunta clandestina ante a Consellería do Medio Rural".

Finalmente, aseguran que "Tendo en conta o cúmulo de irregularidades no procedemento, poñerán todo iso en coñecemento das autoridades competentes e se fose necesario, ante os Tribunais de Xustiza".

Victoria importante dos verdes para volverse creer equipo e alonxar fantasmas. O Arenteiro necesitaba gañar xa un partido, e por fin conseguíuno, aínda que fose mellor, bastante mellor, o resultado que o xogo, e enfronte tivera a un floxo rival como resultou ser o Caselas FC, que ademáis tivo que xogar os útlimos minutos da primeira metada e toda a segunda cun xogador menos, que foi expulsado con cartón vermello.

Sanginés fixo o primeiro gol no m. 25 de partido, e un chisco antes do intermedio, no m. 42 Martín Pérez logrou o segundo, ún deses goles chamados sicolóxicos. Co terceiro de Vitti, no m. 61, os de Caselas entregaron definitivamente o partido, ao que xa lle sobrou a última media hora. No m. 87 Pana puxo a guinda do 4-0 cun auténtico golazo.

CD Arenteiro: Israel, Marcos Castro, Maxi, Victor Gallego, Pana, Dafonte, Bardelás, Martín Pérez, Sanginés, Vitti e Dani Vázquez. Tamén xogaron Marcos Sotelo, Gele, Esteban e o xuvenil Rivera, que debutou en Preferente.

O presidente da Deputación de Ourense, Manuel Baltar, recibiu no Pazo Provincial á viúva e á filla do etnógrafo Olimpio Liste, Josefina Fernández e Araceli Liste, acompañadas polo alcalde de Cea, José Luis Valladares, con quen analizou a situación actual do museo etnográfico, situado en Oseira, que garda importantes elementos da historia galega e que na actualidade permanece pechado.

O presidente do goberno provincial avogou por chegar a un acordo cos propietarios para que a Deputación de Ourense asuma mediante cesión o museo e así "poder xestionar e manter estas instalacións, lembranza permanente da nosa etnografía, e preservar a memoria do seu creador e impulsor, Olimpio Liste".

Manuel Baltar confirmoulles á familia de Liste que a Deputación de Ourense "fará todo o posible" para que esta xoia poida abrirse novamente ao publico "e sexa un elemento dinamizado de Oseira, conxuntamente co seu mosteiro, co obxectivo de que escolares, investigadores e público en xeral se acheguen ao museo para coñecer máis polo miúdo os elementos que foron conformando a vida e a historia".

Entre os temas que abranguería o posible acordo de cesión do museo figurarían que o goberno provincial asumiría a xestión do mesmo e tamén cabería a posibilidade de realizar estudos de catalogación, restauración e conservación de pezas, así como o mantemento das instalacións.

Olimpio Liste, mestre e etnógrafo, abriu o museo no ano 1976 nunha casa situada nas inmediacións do Mosteiro de Oseira, acollendo nas súas instalacións seccións dedicadas ás labores propias do agro, aos gremios artesáns e ás crenzas, contando ademais cunha importante biblioteca que inclúe volumes e traballos de documentación etnográfica e antropolóxica.

O alcalde do Carballiño, Francisco Fumega, viaxa o próximo luns a Bruxelas, para coñecer as posibilidades de fondos de financiamento da Unión Europea destiñados aos concellos para impulsar o seu desenvolvemento social, económico e medioambiental.

Precisamente, o alcalde e o seu grupo de goberno, "están deseñando actualmente proxectos en cada unha destas materias, susceptibles de formar parte de programas europeos, polo que esta viaxe resulta de gran interese",subliñan dende o concello carballiñés.

Francisco Fumega viaxa xunto con outros alcaldes de Galicia, invitados polo Grupo Socialista Europeo, que sufraga todos os gastos íntegramente.

O alcalde permanecerá fóra durante o luns e o martes, 25 e 26 de xaneiro, respectivamente. "Serán dúas xornadas intensas, con reunións e visitas aos principais organismos e institucións da UE, como o Parlamento Europeo, dependencias da Comisión Europea, Comité das Rexións e a Fundación Galicia-Europa", informan dende o concello.

"Resultan de gran interese as reunións que se celebrarán sobre temas que atinxen directamente aos concellos, como: Fondos Estruturais e de Investimento e Administración Local; Fondo Social Europeo e a Iniciativa Xuvenil de Emprego; Política Urbana da Unión Europea, e Horizon2020 e LIFE+, entre outros proxectos europeos", destacan dende a institución municipal.

A estes encontros asistirán membros da Comisión Europea e do Parlamento Europeo, entre outros, o deputado galego José Blanco, que actúa de anfitrión da visita.

Fumega, "que conta con certa experiencia na presentación de proxectos europeos, considera unha gran oportunidade poder coñecer de primeira man as novas liñas de financiamento ás que se poden acoller as entidades locais para desenvolver programas, así como manter contacto directo cos responsables e técnicos que están a cargo destes programas", remarcan.

O Grupo de Goberno municipal tomará a iniciativa para reclamar a Adif a reposición dos servizos ferroviarios suprimidos, que afectan directamente ao Carballiño.

Concretamente, pedirase a reposición do servizo do Tren-hotel, pero tamén daqueles outros servizos, tanto en dirección a Santiago como en dirección a Ourense, que se suprimiron nos últimos anos ou que se prevé que se fagan nun futuro inmediato.

O goberno municipal considera que non se poden suprimir servizos ferroviarios que son necesarios non só para o municipio do Carballiño senón para toda a comarca, cunha poboación de arredor de 30.000 persoas.

Por isto, o goberno municipal porá en marcha unha campaña, en colaboración coas asociacións veciñáis, para que a iniciativa sex amáis efectiva.

Ao mesmo tempo, se intentará implicar aos demáis grupos políticos no concello, para que xurda unha proposta unánime de todas as forzas políticas do Carballiño.

Ao respecto, presentarase unha moción neste sentido, con carácter de urgencia, para ser debatida no próximo pleno municipal.

Tamén se realizan xestións con outros concellos afectados, como é o caso de Lalín, para facer unha reivindicación conxunta. Neste senso, o alcalde Fracisco Fumega, xa se puxo en contacto co alcalde de Lalín, Rafael Cuíña, e acordaron reunirse en breve para consensuar a toma de medidas que restitúan os servizos suprimidos ou en perigo de suprimirse.

O concello do Carballiño promoverá a Festa do Pulpo nas próximas edicións de Fitur, en Madrid.  Así o anunciou hoxe o concelleiro de Turismo, José Manuel Dacal, durante a visita que realiza a esta feira de turismo, con motivo da celebración do Día de Galicia e de Ourense no stand de Galicia.

Dacal considera que Fitur "é o marco máis axeitado para promover esta festa, que conta coa declaración de interese nacional, e non ten parangón con ningunha outra manifestación gastronómica de ámbito autonómico ou incluso nacional".

Segundo dixo o concelleiro, "a oferta turística que se ofrece en Fitur é tan ampla e diversa, que só se pode ter certa incidencia se se consigue presentar algo xenuino e diferenciado. E este é o caso da Festa do Pulpo do Carballiño, que despois de 53 anos é unha marca consolidada e un auténtico reclamo turístico".

Por isto, di o concelleiro, "é preciso atopar o modo de darlle visibilidade á Festa do Pulpo nesta feira pola que pasan centos de milleiros de persoas e se concentra o sector mundial do turismo. Polo tanto, independentemente de a quen lle dediquemos as próximas edicións da Festa do Pulpo, imos intentar aproveitar esta plataforma de Fitur para incrementar a difusión da festa".

"Queremos conseguir que a primeira quincena de agosto, O Carballiño sexa un dos principais referentes turísticos de Galicia, como alternativa ao turismo de praia, e para isto cómpre presentar unha oferta gastronómica, festiva, cultural e de ocio de gran interese", continuou dicindo Manuel Dacal.

Así pois, engadiu, "estamos xa traballando neste proxecto, e a miña presencia hoxe en Madrid e en Fitur obedece máis a este obxectivo, polo que estou a manter contacto con responsables políticos e de turismo a nivel provincial e autonómico, e con persoas destacadas no mundo da gastronomía, como o carballiñés Manuel Domínguez, do restaurante Lúa, galardoado cunha estrela Michelín".  

Finalmente, o concelleiro dixo que se quere buscar a excelencia na oferta turística, afirmando que a Festa do Pulpo é o pilar central para poder conseguilo paulatinamente.

O Tren-Hotel nocturno, o único que comunica de forma directa O Carballiño con Madrid e A Coruña circulará pola estación carballiñesa por derradeira vez o domingo 31 deste mes de Xaneiro. Era o único de longo recorrido que mantiña a estación carballiñesa, despois da entrada en funcionamento anos atrás da nova via de alta velocidade.

A partir do 1 de Febreiro, este tren con orixe en A Coruña circulará via Lugo, mentres que o de Vigo farao por Pontevedra e Santiago de Compostela, e dende aquí en dirección Ourense pola via de alta velocidade, polo que xa non circulará pola estación do Carballiño. Despois continuará a Madrid, via Monforte-León, e tardará máis tempo en chegar a Chamartín, non o fará ata as 10 da mañá, agora chega ás 8 horas.

Ademáis, a partir do dia 1 de Febreiro, Renfe ten previstas modificacións tanto na frecuencia como nos horarios dos trens -son tres- que mantén a dia de hoxe en servizo entre as estacións do Carballiño e Ourense, dos que ún deles continúa ata Santiago de Compostela.

De momento, Renfe non aclara en qué van consistir esas modificacións, de feito dende esta semana mantén bloqueada na súa páxina WEB a información de servizos e horarios na estación do Carballiño, a partir do dia 1 de Febreiro.

O director xeral de Emerxencias e Interior, Luis Menor, fixo entrega de vehículos e  remolques con material de intervención de emerxencias aos concellos de Avión, O Carballiño e Piñor.

 A achega do material realizouse ao abeiro dunha orde de subvencións, en réxime de concorrencia competitiva, para equipar en emerxencias aos concellos de menos de 50.000 habitantes.

En concreto,  entregouse un  todoterreo pick up para o concello de Avión;  e remolques de emerxencias para os concellos de O Carballiño e Piñor.

Os remolques veñen equipados con electrobombas sumerxibles, motobombas para augas residuais, xerador de electricidade portátil de gasolina, motoserras, rozadoras, unha torre de iluminación e un kit de balizamento e sinalización.