Celebraráse na vila dos fornos o vindeiro domingo dia 2 de xullo, un evento festivo e gastronómico que chega este ano a súa trixésima edición, organizada polo concello de Cea o o Consello Regulador da Indicación Xeográfica Protexida Pan de Cea.

O alcalde en funcións, José Luis Valladares, presentou o cartel que promociona a festa dentro das actividades que durante esta semana desenvolve o concello de San Cristovo de Cea no seu stand da Feira Verde de Galicia, que ten lugar en Silleda ata o próximo domingo dia 11.

Neste stand, o concello de San Cristovo de Cea tamén ofrece a diario degustación de pan de Cea, en algunhos casos en colaboración con outras entidades, como as Denominación de Orixe Protexida dos Queixos de Galicia.

Francisco Fumega non descarta un goberno de coalición no que os socialistas están dispostos a participar "e no que non ten porque necesariamente ser Fumega o alcade", afirmou.

O alcalde en funcións e candidato á alcaldía do Carballiño considera que a situación política no concello carballiñés é moi complexa, admite que o resultado electoral foi "un castigo" ao goberno municipal e que a cidadanía carballiñesa ordenou un achegamento entre as forzas políticas.

Fumega agarda chegar cos deberes feitos a esa sesión de investidura do próximo dia 17 porque son trascedentais para o futuro do Carballiño os proxectos que se iniciaron neste mandato e terán que rematarse no próximo. Podes escoitar no audio adxunto a entrevista completa ao alcalde en funcións e candidato á alcaldía carballiñesa.

Falar de teatro afeccionado é falar do Carballiño e así volve a quedar demostrado no Platta, Festival Transfronterizo de Teatro Amador que se desenvolverá esta fin de semana na vila co Auditorio Manuel María como escenario. A iniciativa foi presentada esta mañá no salón de plenos da Casa Consistorial. No acto de presentación interveu o concelleiro de Cultura, Diego Fernández; a presidenta da Federación de Grupos Afeccionados de Teatro (Fegatea),Chelo Pampillón, e o presidente da Asociación Cultural Tiruleque, Xosé Prada.

O edil insistiu en que no Carballiño hai unha gran cultura teatral que vén de hai anos e destacou a aposta decidida que fai o Concello por este arte. O concelleiro tamén destacou “o número de colectivos veciñais que levaron a cabo nestes últimos anos actividades teatrais relevantes” e asegurou que o Festival Transfronteirizo atraerá a numerosos visitantes, o que contribuirá a dinamizar a economía local.

Chelo Pampillón, presidenta da Federación de Grupos Afeccionados de Teatro (Fegatea) agradeceu o seu apoio ao Concello e a colaboración de Tiruleque. Lembrou que o Festival cumpre unha década e que por iso se pensou no Carballiño para desenvolver unha programación especial.
Pola súa banda, Xosé Prada subliñou o feito de que “o teatro que se está vendo na actualidade no Carballiño ofrécese polos grupos amador”. Tamén asegurou que “debemos seguir apostando por este arte para que a vila siga destacando neste eido”.

Exposición “10 anos no fío das linguas”

Unha das propostas que destacan na programación é a exposición que leva por título “10 anos no fío das linguas” e que fai un resumo da traxectoria do Festival. Abrirase ao público o venres 9 de xuño ás 20.00 horas e, media hora máis tarde, actuará o grupo galego Hipócrita teatro coa obra “Arte”.

O sábado 10 de xuño desenvolverase no auditorio da residencia de tempo libre o obradoiro de Multiplay para o que aínda quedan prazas libres. Os interesados en participar poden inscribirse na páxina web de Fegatea. A entrega de premios deste obradoiro levarase a cabo no Auditorio Manuel María, ás 20.15 horas. Seguidamente actuará o grupo de Castela-León Komo Teatro con “¡Shock!”.

O domingo 11 de xuño levarase a cabo unha lectura dramatizada en galego, castelán e portugués, a partir das 12.00 horas. Pola tarde, ás 18.00 horas, está prevista a actuación do grupo portugués Porta de Cena con “As Viúvas”.

O PSdeG-PSOE de Leiro denuncia “graves” irregularidades no censo municipal, constatadas durante a xornada electoral do pasado 28 de maio e na que os e as socialistas puideron constatar que ata tres traballadoras municipais se atopan censadas na casa consistorial do municipio. Consideran que esta forma de actuar “desvirtúa o censo municipal” e afirman que se trata dunha práctica “tramposa e caciquil, impropia dun sistema democrático”.

Dende a agrupación socialista de Leiro poñen o foco no alcalde do municipio e senador do PP, Francisco José Fernández, ao que acusan de estar detrás desta actuación. Os e as socialistas subliñan que “é inadmisible que se empadroe a persoas na casa consistorial” e salientan que valoran tomar as medidas legais “oportunas” para por esta circunstancia en mans das autoridades competentes para que tomen “cartas no asunto”.

O candidato á alcaldía de Leiro polo PSdeG-PSOE, Pedro José González, explica que o domingo 28 de maio, coincidindo coas eleccións municipais, “levantei 3 actas cando estas persoas acudiron a votar, xa que unha vez comprobado o censo, tivemos constancia de que o seu lugar de empadroamento era a casa consistorial”. O futuro voceiro socialista na corporación municipal tamén apunta a que “tras levantar estas actas, o alcalde dirixiuse a min dicíndome que non tiña potestade para levantar actas e tentou impedir que désemos conta deste xeito actuar”.

Pedro José González afirma que con este xeito de actuar “demóstrase que o alcalde é un tramposo e que non acepta as regras da democracia, cando ten que recorrer a empadroamentos irregulares nun edificio público e propiedade de todos os veciños e veciñas de Leiro”. O candidato socialista á alcaldía tamén se pregunta “como estas tres persoas accederon a este empadroamento irregular, cando saben perfectamente como funciona a lei, pois en dous dos tres casos, son as persoas encargadas de realizar os padróns municipais e de preparar a documentación ás persoas que deciden empadroarse en Leiro”.

O PSdeG-PSOE de Leiro xa puxo en coñecemento da xunta electoral esta situación, a través das actas levantadas durante a celebración das eleccións e valora tomar as medidas “oportunas” para que esta situación non se volva producir o vindeiro 23 de xullo, cando se celebran as eleccións xerais.

A comarca do Carballiño viviu cinco movementos sísmicos que foron desde as 16,30 horas deste pasado sábado ata as 6,45 da madrugada do domingo, os cales foron rexistrados polo Instituto Xeográfico Nacional.

O primeiro tivo lugar en Boborás e foi de intensidade baixa, 1.8 mbLg. O segundo, de mesma intensidade, tamén se localizou en Boborás, ás 17,00 horas. O terceiro, e o último que tivo lugar á tarde, ocorreu ás 18,30 horas, cunha intensidade tamén de 1.8 mbLg. Tras unhas horas tranquilas, as profundidades do Carballiño volveron tremer. Ás 21,00 horas, un tremor de 2.3 mbLg, o de máis intensidade, afectou a O Carballiño. Xa a primeira hora dá mañá, ás 6,45 horas, un último sismo, o máis lixeiro de todos, de novo con epicentro no Carballiño , cunha intensidade de 1,6 mbLg.

Os pequenos terremotos son considerados totalmente normais, o que xa  ten carácter  máis excepcional é esta sucesión de tremores de terra en tan pouco tempo, un fenómeno menos habitual e que se coñece como un “Enxame sísmico”

A problemática é xa unha estampa habitual cada vez que se rexistra unha forte tromba de auga en pouco tempo, tal como está acontecendo coa série de tormentas dos últimos dias, e os veciños da zona volven mostrar o seu malestar porque non acaba de buscarse unha solución.  As deficiencias estructurais derivadas da incapacidade da rede de recollida de pluviais en absorver a auga provoca esta situación.

A consecuencia, baixos e sotos inundados, e a rúas Compostela e Piñor que por momentos quedan intransitables tanto para a circulación de vehículos e os peóns. Tamén na rúa Evaristo Vaamonde persiste este mesmo problema, e quen máis o sufre é unha vivenda na zona máis próxima a Praza da Veracruz, a súa propietaria vese impotente para facer fronte á riada que vai parar a súa casa procedente tanto da Praza da Veracruz como da rúa Eusebio Lorenzo.

Asemade, a tormenta deste domingo tamén provocou danos na avenida do Arenteiro, a altura da rúa Costa Rica, onde a rede de pluviais de auga reventou e levantou varios metros do alfalto.