Arredor dun centenar de modelos participarán este venres, 9 de xuño, na 5ª Pasarela do Centro Comercial Aberto. Nenos e nenas, seleccionados nun cásting, e modelos da Axencia Luena exhibirán peiteatos, prendas de vestir, zapatos e complementos dos 27 establecementos asociacios ao CCA que interveñen neste desfile.

O espectáculo será presentado pola actriz Teté Delgado, e contará tamén coas actuacións dos artistas David Royo e Alba Fernández, así como do grupo de danza oriental ENKA.

O evento foi presentado hoxe no propio escenario da pasarela, na Praza da Veracruz, polo presidente do CCA, Julián Garriga; o concelleiro de Promoción Económica, Adolfo Nogueira; o director da Axencia Luena, Manu Varela, e a xerente do CCA, Noelia Mares.

Julián Garriga dixo que se trataba dun magno acontecemento no que ían participar vintesete establecementos (cinco máis que na pasada edición) de todos os sectores: textil, calzado, xoias, froles, perruquería, papelería, etc. Invitou aos veciños do Carballiño e da comarca a asistir ao evento, e agradeceu a colaboración das institucións: Secretaría de Comercio da Xunta; Concello do Carballiño; Federación de Comercio de Ourense; a CEO e a Deputación Provincial, ademáis da Axencia Luena.

Manu Varela amosou a súa gratitude por convidalo a participar un ano máis no desfile, e resaltou a importancia do espectáculo, con artistas destacados, modelos e os máis de cen nenos e nenas que acudiron dende toda Galicia ao cásting para a selección. “É un gran espectáculo para todos os públicos –dixo-, que exaltará a calidade do comercio carballiñés”.

Noelia Mares agradeceu sobre todo a fidelidade dos asociados ao CCA, sinalando que moitos repiten polos bos resultados acadados tras a última pasarela, e que outros novos sumáronse pola ampla repercusión deste evento. Por isto reiterou a invitación ao público para acudir ese próximo venres á Praza da Veracruz.

Finalmente, Adolfo Nogueira referiuse ao excelente traballo que estaba a desenvolver o CCA, e que esta pasarela era o mellor escaparate para o comercio do Carballiño, que está moi vivo e ten un gran dinamismo, según dixo. Asemade, destacou a colaboración de todos os estamentos do concello para contribuir ao éxito do desfile.

A Policía Local do Carballiño denunciou ante a Xefatura Provincial de Tráfico aos propietarios de catro vehiculos da marca BMW por conducción temeraria, acelerando e frenando de xeito brusco, e realizando trompos e outro tipo de maniobras perigosas para os usuarios da vía e incluso das persoas que presenciaban este entretemento sancionable.

Os conductores destes coches participaban o sábado 8 de abril nun evento de vehículos BMW na Avenida do Arenteiro, no fondo do parque municipal. Sen embargo, só tiñan permiso para concentrarse e xantar, pero de ningún modo para realizar calquera tipo de conducción temeraria nin na Avenida do Arenteiro nin en ningunha outra parte, polo que actuaron dun modo totalmente irresponsable.

No informe da Policía Local dise que “sen comunicación previa e obviamente sen autorización, varios dos participantes, ás 13,30 h., dese día, estiveron no vial 3 do parque empresarial, un acto aparentemente previamente acordado, facendo derrapar os vehículos con acelerós e frenadas bruscas en presencia das persoas alí congregadas, estando ademáis a vía aberta para o resto dos usuarios e todo isto sen adoptar ningunha medida de seguridade, polo que se puxo en perigo tanto aos asistentes como ao resto de usuarios da vía”.

O máis sorprendente é que a Policía Local obtivo as probas a través dun video publicado no canal Youtube, xa que o sistema de video vixilancia que o concello ten instalado no polígono industrial resultou afectado por un inhibidor e non se poideron obter imaxes de calidade que permitiran identificar a matrícula dos vehículos e aos seus ocupantes. A sospeita do uso do inhibidor de frecuencias susténtase no feito de que as imaxes afectadas foron aquelas tomadas pola cámara instalada no vial 3 durante o tempo de permanencia polos participantes.

A través do vídeo publicado en Youtube, a Policía Local pudo identificar a catro dos vehículos participantes, entre eles un propiedade do organizador do evento e a persoa que coursou a petición para ocupación da Avenida do Arenteiro. Por este motivo, e independientemente da sanción que corresponda, a concellería de Deportes anuncia que non autorizará no futuro ningún evento coa mesma procedencia. De feito, no Carballiño celébranse diversas concentracións ao longo do ano, sen que en ningunha delas se teña producido un feito tan grave como este.

A sanción que conleva para os coductores este tipo de conducción temeraria, considerada unha infracción moi grave, é de 500 euros e perda de 6 puntos. Pero se non se identifica ao conductor, a multa para o propietario do vehículo é o triple, de 1.500 euros.

Máis de duascentas cincuenta persoas asistiron á 25ª Festa das Parroquias, na que se rendeu homenaxe aos presidentes e expresidentes das Asociacións de Veciños do municipio, que recibiron un diploma do concello.

Alcalde, concelleiras e concelleiros da corporación municipal, exalcaldes, presidentes e expresidentes das AAVV, así como veciñanza das parroquias e do casco urbano participaron nesta celebración no parque municipal, que comezou cun concerto da Banda Escola de Música do Carballiño e continou cun xantar, que estivo amenizado na sobremesa polos regueifeiros Benito Lobariñas e Suso de Sorner.

Tamén houbo xogos populares, campeonato de brisca e subastado, baile e entrega do ramo para a organización da próxima edición da festa.

O vicepresidente da Xunta, Alfonso Rueda, o presidente da deputación provincial de Ourense, José Manuel Baltar,e alcaldes das comarcas do Carballiño e O Ribeiro asistiron esta tarde á inauguración do novo Parque de bombeiros do Carballiño, que dará servizo a partir de agora a un total de 23 concellos -todos os do Carballiño e o Ribeiro, e tamén aos de Amoeiro, Coles, Vilarmarín e A Peroxa- cunha poboación que supera os 50.000 habitantes.

O Goberno autonómico, a deputación provincial e os concellos teñen colaborado na construción e equipamento desta infraestrutura. En total, o orzamento total investido ascendeu a preto de 2 millóns de euros.

En canto ao mantemento deste Parque, os encargados de financialo serán a Xunta e a Deputación provincial.

A nova infraestuctura está dotado cun parque móbil para atender as necesidades en materia de extinción de incendios e salvamento, e unha dotación de persoal integrada por 19 bombeiros.

Máis información e audios do acto de inauguración na programación local de COPE O Carballiño.

O conselleiro de Política Social, José Manuel Rey Varela, entrevistouse no seu despacho de San Caetano co alcalde do concello de Leiro Francisco José Fernández Pérez.

Os dous mandatarios abordaron a situación da a atención persoas maiores neste municipio pertencente á comarca ourensán do Ribeiro. Nesta liña, acordaron continuar coa colaboración entre administracións para axilizar os trámites e abrir tan pronto como sexa posible ao longo deste ano o novo centro de día para persoas maiores, que ten unha capacidade máxima de 50 prazas e cuxa construción supuxo un investimento algo superior ao millón de euros.

Ao respecto, Rey Varela destacou a importancia que terá este equipamento para “promover e facilitar que os nosos maiores teñen un punto de encontro e manteñan un estilo de vida activo a través da organización de actividades e talleres orientados a conservar e potenciar as súas capacidades intelectuais, físicas e creativas”.

No que atinxe ao coidado das persoas maiores e dependentes, a Consellería de Política Social vén de incrementar o número de horas no Servizo de Axuda no Fogar (SAF) dos concellos que forman parte da Mancomunidade do Ribeiro, entre eles o de Leiro.

Este aumento de horas no servizo foi do 5%, o que permite chegar a unha ratio de atención por riba do 93%. “O obxectivo é conseguir todas as melloras posibles na calidade de vida das familias e das persoas dependentes, para o que continuamos a incorporar de maneira progresiva a máis persoas aos diferentes servizos que integran o sistema autonómico de atención”, indicou Rey Varela.

Por último, Rey Varela e o rexedor de Leiro manifestaron a súa vontade de seguir afondando nas liñas de colaboración entre as dúas administracións co compromiso de buscar conxuntamente unha política social axeitada que se adapte as necesidades da devandita localidade.

Os responsables do Consello Regulador da Indicación Xeográfica Protexida Pan de Cea e o alcalde da localidade panadeira presidiron unha desgustación de receitas feitas con pan de Cea da man da Casa de Turismo Rural "O Cruceiro" baixo a dirección da chef Emma Pinal.

Ao acto, celebrado no centro multiusos de Cea asistiron varios elaboradores da IXP Pan de Cea, xornalistas e representantes doutros colectivos colectivos, que poideron comprobar a versatilidade deste producto de calidade na gastronomia moderna.

A degustación comezou cunha escuma de sopa de allo con pan de Cea, para continuar cunha torrada salgada de pan de Cea con toques mariñeiros, pepitos de tenreira galega e tortilla de pataca, e concluindo cunha exquisita sobremesa a base de sandwich xeado de chocolotate de pan de Cea.

O presidente do Consello Regulador IXP Pan de Cea, Carlos Manuel Rod´riguez, aproveitou o encontro para presentar os carteis da Ruta dos Fornos, que se celebrará o sábado dia 1 de Xullo, na vespera da 26ª edición da Festa de Exaltación, que terá o lugar o domingo 2 de Xullo no campo da Saleta de cea. Antes, o domingo 25 de Xuño, celebraráse unha nova edición da andaina solidaria, desta vez os fondos que se recaden  destinaránse ao proxecto de investigación da biopsia líquida.

A presentación tamén servíu para presentar a renovada páxina web do Consello Regulador www.pandecea.org

Carlos Manuel Rod´riguez indicou que o novo portal "conta maior carga visual, con vídeos e fotografías, intégrase coas distintas redes sociais e incluso ofrecerá a posibilidade de seguir os eventos via streaming".

O Grupo Municipal Socialista de Punxín denuncia a "cínica pinza existente entre Cambio Intelixente e o Partido Popular para impedir que prosperen as iniciativas dos socialistas".

"Non é a primeira vez que a autodenominada –falsamente– nova política, abraza ó PP nun verdadeiro alarde de cinismo e dobre raseiro. E que o portavoz de CI, Joaquín Moldes, xa se aliou en varias ocasións co PP para frear propostas do PSOE e, días máis tarde, se apropiou da idea socialista para vendela como propia grazas a reunións institucionais", apuntan dende a formación socialista.

No pleno de marzo,recordan, o PSOE solicitou que se puxera en marcha un obradoiro de emprego para reducir o número de desempregados mediante a asociación con outros municipios, co fin de obter axudas.

Afirman os socialistas que "Moldes votou en contra pero, pouco despois, promocionou unha xuntanza coa delegada territorial da Xunta para vender un suposto logro de seu neste sentido".

Segundo alerta a portavoz socialista local, Rosa María Outerelo, “non suporía novidade algunha que fose unha máis das numerosas reunións institucionais que Moldes vende e que resultan infrutuosas”. “A realidade é que CI funciona como apoio fiel do PP para impedir que saian adiante as nosas iniciativas, por boas que sexan, importándolle absolutamente nada se prexudica os intereses da veciñanza que di defender”, destaca Outerelo. A edil alerta de que “o suposto partido do cambio non fai outra cousa que mentirlle á veciñanza de Punxín, votando en contra nos plenos para despois, fóra de tempo e forma, vender fume e apropiarse do que non é seu”.

O PSOE de Punxín esíxenlle a Moldes que “deixe de facerlle un pé ao goberno do PP e teña respecto pola xente de Punxín que é a quen está a representar”.

Os socialistas lembran que, ao contrario que CI e o PP, o PSOE non ten reparo en apoiar canta iniciativa positiva haxa para o concello, sen importar de onde veña. Por todo isto, os socialistas "reclaman que Joaquín Moldes se retracte e recoñeza que se opuxo a unha medida que agora di defender, amosando un nulo respecto polo traballo realizado polo PSOE".

Setenta e seis vehículos de alta gama concentraranse este sábado, 27 de maio, nos arredores da Praza Maior, dentro da II Quedada de Superdeportivos Vila do Carballiño.

As inscricións proceden de toda Galicia, pero tamén de fóra, como Madrid ou Portugal, e entre outras marcas figuran últimos modelos de Ferrari, Porche, Mercedes, Audi, Lamborghini e BMW. Os prezos dos vehículos van dende os 100.000 euros aos 250.000 euros, polo que o valor total dos coches participantes pode rondar os 11 millóns de euros.

O evento foi presentado este mediodia polo alcalde, Francisco Fumega; o concelleiro de Deportes, José Manuel Dacal, e o organizador Santi Pereira, propietario do bar Plaza.

A concentración comezará o sábado ás 10 da mañá, e a partir das 12 realizarase unha ruta ata o circuito de O Choupeiro, en Biduedo. Sobre as 13,30 regreso ao Carballiño, e ás 14,00 h., xantar nunha carpa que se instalará na Praza Maior. Asemade, haberá animación na Praza Maior cun DJ presentador.

Ademáis dos 76 coches, hai inscritos 150 participantes.

Con respecto á primeira edición, Santi Pereira dixo que nesta ocasión non ían participar coches historico deportivos, porque non había cabida na Praza Maior para tanto vehículo e polo tanto só haberá superdeportivos recentes.

Tanto o alcalde como o concelleiro de Deportes sinalaron que era un gran acontecmento para a vila, xa que atraía a moitos visitantes e supoñía unha plataforma de promoción, polo que agradeceron a iniciativa.