A situación do transporte público, un concurso de ideas do parque municipal, a dotación de beirarrúas da avenida do parque e a crise dos refuxiados sirios, son, entre outros temas, algúns dos puntos que figuran na orde do día do próximo pleno municipal do concello do Carballiño, que se desenvolverá este xoves, 7 de marzo, ás 20,00 h.

Ademáis, destaca unha proposta da Alcaldía sobre a disolución do Consorcio Contraindendios e Salvamento das Comarcas do Carballiño e Ribeiro, segundo acordo adoptado polo propio consorcio para dar paso ao novo Parque Comarcal de Bombeiros, que podería estar operativo para o próximo verán, segundo as previsións.

Noutra proposta da Alcaldía, modifícase o representante do concello na Mancomunidade Turística Terras do Avia, que pasará a ser o propio alcalde.

Hai diversos puntos de carácter económico e administrativo, como o Plan Económico-Financieiro do concello para o período 2016-2017, pero o debate centrarase nas cinco mocións presentadas polos grupos do PP, AV-SON e PSOE, sobre dotación de beirarrúas na avenida do Parque, entre o centro de interpretación da natureza e o muíño das Lousas, así como sobre rexeitamento do acordo entre a UE e Turquía para a expulsión de solicitantes de asilo (AV-SON); sobre a urxencia dun concurso de ideas do parque municipal, e para sacar a concurso público diversos subministros municipais (PP); e, finalmente, sobre o transporte público (PSOE).

O concelleiro do BNG en Leiro e "histórico" militante nacionalista Luis Pérez "Ficol" foi nomeado como responsable do novo consello comarcal do Bloque Nacionalista Galego do Ribeiro. Ademáis, tamén exercerá como coordenador de comunicación.

Cristalina Álvarez Olleros será a Vice Responsable comarcal, e ocuparáse da área do agro e medio ambiente.

Como secretaria de organización actuará Ana Isabel Paz Villar, mentres que das finanzas ocuparáse Yolanda Rodríguez.

A responsabilidade de acción municipal recaeu en Xacobe García.

Claudio M. Vázquez é o novo responsable de Galiza Nova no Ribeiro, e tamén da área de cultura e turismo.

Completan o novo consello comarcal do BNG, Miriam Rodríguez, en acción feminista; Xosé Sánchez, en formación; e Adriana Rojo, en novas tecnoloxías.

Nunha próxima reunión incorporaránse a este consello comarcal ribeirán os responsables locais de cada un dos 10 concellos ca comarca.

O Concello de Piñor ven de aprobar inicialmente o Plan Xeral de Ordenación Municipal (PXOM) na sesión plenaria do 25 de febreiro, publicandose no DOG núm. 45, do luns 7 de marzo de 2016.

Os planos do PXOM están expostos no salón de sesións da casa do Concello e tamén na web municipal (www.piñor.es), durante o prazo de dous meses dende a súa publicación no DOG, para a súa consulta por parte de todas as persoas interesadas e tamén para a presentación de alegacións.

Por este motivo, o Concello de Piñor organiza varias charlas informativas nas que o equipo redactor do plan explicará aos veciños e veciñas de cada parroquia as características do plan en cada pobo. As datas, horarios e lugares son os seguintes:

LOEDA: LUNS 4 DE ABRIL 19:00 H CASA DO CONCELLO

CARBALLEDA: LUNS 4 DE ABRIL 20:30 H CASA DO CONCELLO

BARRÁN: MÉRCORES 6 DE ABRIL 19:00 H CASA DO CONCELLO

A CANDA: MÉRCORES 6 DE ABRIL 20:30 H LOCAL ASOCIACIÓN DE VECIÑOS

TORCELA: SÁBADO 9 DE ABRIL 09:30 H LOCAL ASOCIACIÓN DE VECIÑOS

COIRAS: SÁBADO 9 DE ABRIL 11:00 H LOCAL ASOCIACIÓN DE VECIÑOS

A CORNA: SÁBADO 9 DE ABRIL 12:30 H CASA DO CONCELLO

O Arenteiro tivo que remontar un marcador adverso tras adiantarse o Mondariz no minuto 44, polo que se chegou ao descanso co 0-1 no marcador tras unha primeira parte bastante igualada e na que os verdes tamén tiveron un par de ocasións de gol. Pero foi Hugo Tei lanzando maxistralmente unha falta sobre a portería de Israel o que marcou o único gol da primeira parte.

O guión do partido cambeou radicalmente tras o paso por vestiarios. O Arenteiro saíu con decisión en busca da remontada, metendo outra velocidade ao partido que sorprendeu e deixou noqueado ao rival. No minuto 53, tras un tiro de Martín Pérez dentro da área, rexeitou o porteiro visitante e Victor Gallego fixo o gol do empate.

O Arenteiro era un vendaval sobre a área do Mondariz, e no minuto 70 Martín Pérez, de cabeza, volteou o marcador a favor do equipo carballiñés. Despois chegou o penalti a favor do Arenteiro que desperdiciu Dani Chimpin, enviando alto o balón, pero o Mondariz xa estaba cun xogador menos tras a expulsión do central Samu, que ademáis protagonizou un feo xesto á arbitro ferrolanana Raquel Orge.

Xa co Mondariz buscando á desesperada o gol do empate, o que chegaron na recta final do partido foron os goles de Vitti e Sanginés para redondear o resultado para o Arenteiro, merecido pola súa sensacional segunda parte.

CD Arenteiro: Israel, Vilachá, Dafonte, Aitor Martinez, Pana, Victor Gallego, Bardelás, Dani Chimpín, Martín Pérez, Vitti e Martín Pérez. Tamén xogaron Maxi, Sanginés, Esteban e Iván Portos.

Máis de cen persoas, entre traballadores e familiares, da fábrica de torres eólicas do Carballiño “GRI Towers Galicia”, do grupo internacional de enerxías renovables, GRI Renewables Industries, participaron na plantación de 800 árbores na contorna da fábrica do papel da Lavandeira.

Bidueiros, arces, aciñeiras, alcornoques e coníferas formarán parte, dende agora, da paisaxe forestal desta contorna natural á beira do río Arenteiro, para converter as 3 hectáreas de superficie desta illa nun lugar de paseo e disfrute.

Esta iniciativa da fábrica de aeroxeradores ubicada no polígono industrial da Uceira, no Carballiño, é a primeira do grupo empresarial GRI que se pon en marcha. A compañía GRI Renewable Industries, con doce fábricas repartidas en sete países (España, Brasil, India, China, EEUU, Turquía e Sudáfrica), compensa desta maneira as emisións de CO2 pola fabricación de torres eólicas durante o ano 2014.

Así o explicou o xerente de GRI Towers Galicia, Cándido González: “por cada torre construida prantamos unha árbore. A estas 800 árbores do Carballiño, engadiranse outras 400 árbores en Madrid”. Así, 1.200 torres construidas, outras tantas árbores prantadas”. Cándido González expresou o seu orgullo por ser a primeira fábrica do grupo GRI Renewable Industries en levar a cabo esta iniciativa, contribuindo a reforestar un espazo natural de incalculable valor e beleza, como o da contorna da fábrica do papel. Por todo isto, amosou a súa satisfacción, reiterando o seu compromiso co Carballiño e co respecto medioambiental.

A este acto tamén asistiron o alcalde, Francisco Fumega; a concelleira de Medio Ambiente, Erika Paz e o concelleiro de Promoción Económica, Adolfo Nogueira, así como a concelleira do PP, Pilar Caride. Francisco Fumega agradeceu a deferencia de Gestamp e de GRI por ter elexido O Carballiño para emprender esta iniciativa que ía permitir recuperar unha das zonas naturais máis fermosas da ribeira do río Arenteiro no Carballiño.

Fumega loubou o compromiso de Cándido González coa vila carballiñesa e resaltou o feito de que a prantación se realizase nunha paraxe de uso público, para o disfrute dos carballiñeses e dos visitantes, na que se atopa a fábrica do papel, que é un exemplo notable da arqueloxía industrial hidráulica de Galicia, que data do ano 1838, e que se vai converter en pouco tempo no primeiro museo do papel obtido con enerxía hidráulica de Galicia e de España.

Tamén felicitou á empresa Bosques Sostenibles, polo magnífico traballo realizado para efectuar a prantación, e o labor de coordinación desenvolvido pola concelleira de Medio Ambiente, Erika Paz. Bosques Sostenibles é unha empresa especializada en actividades e proxectos medioambientais, que se ocupou da selección das árbores e toda a infraestrutura para realizar a prantación con todas as garantías de que convertan o lugar nun auténtico bosque e zona de paseo e lecer nun entorno natural excepcional, preto da fábrica do papel, da Piscifactoría, da Pena dos Namorados e do conxunto etnográfico dos muíños.

Precisamente, os técnicos desta empresa explicaron aos traballadores e familiares da empresa GRI Renewable Industries, que participaron nesta experiencia medioambiental, o xeito de realizar a plantación das árbores. Nos últimos días realizáronse labores de limpeza e preparación do terreo ao redor da fábrica do papel, de xeito que agora pode percibirse con claridade o interese deste conxunto arqueolóxico, etnográfico e natural.

Ao acto inaugural desta exposición asistiu o alcalde, Francisco Fumega, o concelleiro de Cultura, Diego Fernández, os portavoces do Partido Popular, Argimiro Marnotes, e de Alternativa Veciñal, Bernardo García, e a concelleira do PP, Pilar Caride.

A exposición, que consta de vintecinco paneis e podemos ver na casa do concello durante os meses de Abril e Maio, amosa dun xeito didáctico e moi prolífico a vida e a obra de Manuel María, a quen se lle adica este ano o Día das Letras Galegas. O alcalde referiuse no acto inaugural ao intenso programa que ten elaborado o concello para conmemorar as Letras Galegas e que, nunha parte importante, comprenderá actos vencellados con Manuel María e a obra poética que lle adicou ás terras do Carballiño.

Francisco Fumega, que definiu a Manuel María como “O poeta do Orcellón”, en consonancia co alcume de “Poeta da Terra Cha”, adiantou que o próximo 15 de abril vaise presentar nun acto público na Casa da Cultura a reedición do Cantigueiro de Orcellón, que financia o concello en colaboración coa Fundación Manuel María, e que contará coa asistencia da viúva do poeta, Saleta Goy, e do historiador Felipe Senén, autor das ilustracións do cantigueiro que Manuel María lle adicou ao Carballiño e á súa comarca.

Dende a concellalía de Educación e Cultura xa se remitiu información aos centros educativos non só do Carballiño, senón de toda a comarca, para que poidan planificar visitas cos seus alumnos e alumnas. Incluso o concello ofrece un servizo de guía para aqueles centros que queiran percorrer o roteiro do Cantigueiro de Orcellón.

A exposición, que foi elaborada pola Fundación Manuel María, que colabora estreitamente co concello do Carballiño nesta efeméride, permanecerá aberta en horario de 08,00 a 20,00 h., de luns a venres, e de 08,00 a 14,30 h., os sábados, do 1 ao 15 de abril. Trátase da primeira actividade que leva a cabo o concello do Carballiño dentro do programa elaborado pola concellalía de Educación e Cultura co gallo das Letras Galegas. Este programa, que terá preto de vinte actividades culturáis, desenvolverase durante os meses de abril e maio, e será presentado a próxima semana.