A vicepresidenta primeira da Deputación de Ourense, Marta Nóvoa, mantivo hoxe un encontro de traballo no Centro Cultural Marcos Valcárcel coa Conselleira de Infraestruturas e Mobilidade, Ethel Vázquez, para analizar as liñas de axudas aos concellos para a xestión do ciclo da auga. No encontro tamén participaron a xefa territorial da Consellería de Infraestruturas en Ourense, Pilar Fernández, o director da Área de Medio Ambiente da Deputación, Javier Bobe; e o director técnico de AquaOurense, Víctor Comesaña, empresa mixta formada por Deputación e Viaqua.

A vicepresidenta primeira da Deputación destacou a importancia dunha reunión na que se abordaron as axudas aos concellos para coñecer as perdas de auga que teñen na súa rede e tamén para colaborar na súa mellora.

Na reunión, a conselleira de Infraestruturas informou que a Xunta vén de publicar no Diario Oficial de Galicia de hoxe (DOG) dúas convocatorias de axudas por máis de un millón de euros destinadas a realizar auditorías municipais das redes de saneamento para a detección de infiltracións cun importe total de 300.000 euros, e outra liña de axudas para a execución de obras que minimicen as perdas de auga en entidades locais de Galicia cun investimento global de 737.606 euros.

O Diario Oficial de Galicia ven de publicar unha Resolución da Dirección Xeral de Recursos Humanos do Sergas, polo que se procede ao nomeamento como persoal estatutario fixo e á adxudicación de destino definitivo aos aspirantes seleccionados no proceso selectivo, polo sistema de concurso, para o acceso á condición de persoal estatutario fixo da categoría de facultativo especialista de atención primaria, convocado pola Resolución do 4 de maio de 2023. As persoas nomeadas disporán do prazo máximo dun mes para incorporarse de modo efectivo no destino elixido.

Deste xeito, darase cobertura estable a seis novas prazas de atención primaria en varios centros de saúde da comarca do Carballiño, que se atopaban vacantes ou estaban cubertas por persoal interino. Catro destas prazas xa foron adxudicadas e outras dúas serán ofertadas próximamente

Estas adxudicacións prodúcense trala publicación no Diario Oficial de Galicia, o pasado 15 de decembro, da resolución pola que se fixo público o acordo do tribunal que xulga o proceso selectivo, polo sistema de concurso, para o acceso á condición de persoal estatutario fixo da categoría de facultativo especialista de atención primaria, relativo á baremación definitiva dos méritos do concurso, á publicación dos aspirantes seleccionados e pola que se convoca para o acto de elección de destino.

En concreto, nas próximas semanas e no prazo de menos xa dun mes deberán tomar posesión das súas prazas os novos facultativos que exercerán o seu traballo de forma compartida nos centros de saúde do Carballiño-Punxín, Coles-Piñor, O Irixo-San Amaro e Punxín-San Amaro.

Ademáis, O Sergas volverá ofertar a través dunha nova convocatoria as dúas prazas que quedaron sen adxudicar neste último concurso de méritos, que no caso da comarca do Carballiño son dúas prazas de médico de atención primaria con destino, unha delas compartida para os centros de saúde do Carballiño e Beariz, e a outra con dedicación exclusiva para o centro de saúde do Carballiño
·
Desta forma, nas próximas semanas incorporaranse 64 profesionais de medicina familiar e comunitaria a estes centros de saúde.

O Novocine de Leiro proxecta esta fin de semana dúas películas, "Wonka" ás 4 da tarde e estrea "El Correo" en pases ás seis e oito e cuarto da tarde.

O Instituto de Estudios Carballiñeses celebra a Asamblea Xeral de Socios, ás once da mañá deste sábado dia 27 de xaneiro no salón de actos do Casino do Carballiño. Posteriormente, desde as 12 do mediodia, e xa para o público en xeral, terá lugar a presentación do número 41 da revista "Ágora do Orcellón", despedindo a xornada a música de Maria do Ceo.

A localidade de Sampaio, no concello de Maside, celebra esta fin de semana a tradicional romaría na honra a San Pablo. Ábrese a programacion ás cinco da tarde do sábado cunha misa solenme na capela, e pola noite na verbena actuarán o DJ Marcos Kintana e a gran orquestra Finisterre. O domingo 28 as misas sucederánse desde as nove da mañá e solemne á unha da tarde. despóis será a tradicional subasta de productos da terra, antes do inicio do xantar da XII Festa do Cocido de Sampaio, no que poderá degustarse un cocido galego por 23 euros comensal. A xornada festiva estará amenizada coa música de Feitizo de Pao e o dúo Trasnos.

Na axenda deportiva, volve o fútbol da 1ª RFEF a Espiñedo, que por vez primeira na historia visita o equipo aragonés do Club Deportivo Teruel, visitante para o Arenteiro na 21ª xornada do campionato de liga.

A conselleira de Promoción do Emprego e Igualdade, Elena Rivo, visitou hoxe empresas do Carballiño, entre elas "Frigoríficos Arcos" (na foto) onde puxo de relevo os apoios autonómicos ás persoas traballadoras autónomas. Alí, destacou que xa se contabilizan máis de 2.100 solicitudes de profesionais que queren optar ás axudas para a promoción do emprego autónomo, incluída a cota cero para novas altas.

Así, a Consellería de Promoción do Emprego e Igualdade, explicou Rivo, mantén aberto ata o 30 de setembro o prazo de solicitude para financiar os primeiros gastos da actividade dos traballadores por conta propia a través de dúas liñas que suman un orzamento de 28,9 millóns de euros. Neste total inclúese unha partida de 9,6 millóns de euros para subvencionar ao 100 % a cota reducida dos novos autónomos durante os 12 primeiros meses de actividade.

O Diario Oficial de Galicia convocou este mesmo luns outros dous programas de axudas ao emprego autónomo que suman 9,5 millóns de euros. Diríxense, por unha banda, aos traballadores autónomos que teñan unha antigüidade superior aos 42 meses para que poidan ofrecer novos servizos e realizar investimentos que impulsen a súa capacidade competitiva (Bono Autónomo) e, por outra, axudar aos profesionais por conta propia que desexen volver emprender tras o cesamento de actividade (Bono nova oportunidade).

Polo do Carballiño

Na visita, a conselleira tamén aproveitou para poñer en valor o traballo feito desde o Polo de emprendemento e apoio ao emprego do Carballiño. Así, das máis de mil persoas emprendedoras atendidas en toda Galicia, arredor de 240 proxectos foron asesorados na provincia de Ourense e, deles, preto de 80 pasaron polo Polo do Carballiño. Das persoas emprendedoras que acudiron ao centro, o 55 % son mulleres e o 45 % homes. Con todas elas lévanse realizado un total de 190 titorías.

No eido do emprego, cómpre referirse tamén á última enquisa de poboación activa (EPA) de 2023, que amosa que Galicia pechou o ano con menos paro, máis emprego e de maior calidade e con máis persoas activas que o exercicio anterior. As cifras son boas tanto a nivel xeral como nos colectivos prioritarios.

Os traballadores do Grupo de Emerxencias do concello do Carballiño manifestaron hoxe o seu malestar polas condicións nas que, afirman, están desenvolvendo o seu traballo, con notables carencias no servizo debido a unha situación de precariedade –aseguran- polo déficit de medios e e a falla de mantemento de equipamentos.

Para resolver as súas reivindicacións laboráis, reclaman ao concello do Carballño que convoque unha mesa de negociación, e recoñeza a súa condición de bombeiros. Lamentan ademáis que o servizo estea en precario en canto efectivos, xa que das 20 prazas que están contempladas na RPT, tan so están cubertas 14 na actualidade, e tendo en conta que contan con dúas baixas de longa duración.

Pola súa parte, o concelleiro de seguridade Alberto Otero defende a xestión municipal, e facendo mención á mellora das instalación nas que ten a súa sede este servizo municipal, e nas que se investiron máis de 200.000 euros, afirma que o concello seguirá aberto a negociar coa representación dos traballadores aínda que matiza que son traballadores para atender emerxencias pero que non son bombeiros.

No audio adxunto podes escoitar tanto as manifestacións de Jonatan Dominguez, portavoz dos traballadores, como do concelleiro de seguridade do concello do Carballiño, Alberto Otero.

Argimiro Marnotes confesou ante o micrófono de COPE O Carballiño que foi unha sorpresa inesperada a chamada do Partido Popular para incluílo na candidatura para as próximas eleccións ao Parlamento de Galicia do próximo dia 18 de febreiro.

Por elo, Marnotes mostrouse moi agradecido porque no caso de resultar deputado electo tería a oportunidade "de seguir traballando polo Carballño e comarca" e tamén "porque o feito de que se acordasen dun é un recoñecemento a tantos anos de traballo na política", despóis de recordar que leva afiliado ao Partido Popular desde os inicios desta formación política.

A preguntas dos oíntes desta emisora de radio, sobre a súa continuidade como presidente de Club Deportivo Arenteiro no caso de que tivese que incorporarse ao Parlamento de Galicia, Marnotes mostrouse cauto e dixo que no caso de que se dese ese suposto tomaría "a decisión que fose mellor para o Arenteiro", recordando ademáis que con esta tempada remata o mandato de catro anos na presidencia do club, polo que haberá convocatoria electoral a finais de tempada ou que mesmo podería adiantarse un chisco antes.

No audio adxunto podes escoitar a entrevista íntegra a Argimiro Marnotes:

O PSdeG-PSOE de Leiro acusa á Xunta de Galicia e ao concello de ocultar de xeito “deliberado” información da realidade do investimento e a xestión do hotel do Mosteiro de San Clodio e do Spa de vinoterapia. Os e as socialistas sinalan que tras seis peticións de información solicitadas entre o 2017 e 2023 no Parlamento de Galicia, a única resposta foi o “silencio sepulcral e a ausencia de explicacións ao respecto”.

Dende o grupo municipal socialista reclaman coñecer os “motivos” polo que o investimento inicial previsto entre 1999 e o 2000, cun importe de 2.650.602 euros e financiado inicialmente por dúas consellerías e a Secretaría Xeral de Turismo da Xunta, acabou por converterse ao final do proxecto nun investimento de máis de 11.200.000 euros. Neste senso lembran que a explotación foille outorgada, mediante a sinatura dun convenio por parte da Xunta de Galicia, a orde relixiosa de Samos e o concello de Leiro, ao grupo Hotusa para a súa explotación por un período de 25 anos.

O voceiro do PSdeG-PSOE en Leiro, Manuel Rodríguez Vázquez, destaca que o convenio asinado en 1999 supón “unha carga exaxerada para as arcas municipais”. Cabe destacar que o concello corre a cargo dos gastos de aluguer (9.000 euros anuais), ao que se suma o IPC e o mantemento e conservación das fincas a carón do mosteiro. “A decembro de 2022, o concello de Leiro xa desembolsara máis de 210.000 euros, que saíron das arcas municipais, polo que queremos que o alcalde nos explique que contrapartidas e beneficios tivo este convenio para a veciñanza”, sinala o edil socialista.

Rodríguez Vázquez destaca que o PP “vendeu a bombo e platillo dende a Xunta e o concello que este proxecto sería un motor económico e de dinamización social para Leiro e a comarca, xerando novos postos de traballo”. Tal e como destaca o concelleiro socialista “a realidade é que nestes 23 anos, Leiro perdeu 565 habitantes e non se xerou posto de traballo algún, polo que queremos que o alcalde nos aclare cales foron os beneficios reais para o noso municipio”.

O PSdeG-PSOE de Leiro considera “imprescindible” acceder ás cláusulas que regulan a concesión e a xestión do hotel e spa, xa que tal e como apuntan “hai requirimentos que a empresa Hotusa non está cumprindo e que nin a Xunta, nin o concello, teñen intención de facerlles cumplir”. Os e as socialistas afirman que o PP “antepón os intereses da empresa por riba dos dereitos, dos intereses e do benestar da veciñanza de Leiro”.

O concello do Carballiño xa encargou a un equipo de arquitectos a elaboración dun anteproxecto do que sería o futuro estadio de fútbol, e como punto de partida para poder contar tanto co proxecto técnico da obra como dunha avaliación económica e asi xestionar coas disntintas administracións o orzamento necesario para a súa contrucción, que según o alcalde Fumega estaría entre os oito e os dez millóns de euros.

O rexedor municipal tamén avanzou que xa iniciou negociacións coa Deputación para que a entidade provincial ceda a parcela coa que conta na zona próxima ao actúal campo de fútbol da Uceira, que xunto a outros terreos públicos nesta mesma contorna, suman os 14.000 m2 que se precisan para albergar este proxecto.

Fumega tamén dixo que o aforo do futuro estadio estará pensado para acoller a máis de catro mil espectadores sentados e con graderío perimetral todo cuberto. De feito, o Club Deportivo Arenteiro, ao que desde o concello lle pediron as necesidades e requisitos da entidade federativa para acoller partidos de fútbol na categoria na que na actualidade milita o club, trasladou ao concello a recomendacion de estadios como o "Toralín" de Ponferrada (na foto) , como exemplo das condicións que debe reunir o futuro estadio carballiñés.

No audio adxunto podes escoitar a intervención do alcalde Fumega en COPE O Carballiño, referindose a este proxecto e tamén contestando a outras preguntas, queixas e suxerencias dos e das ointes desta emisora de radio.