Deputados e deputadas do Grupo Provincial Socialista encabezados polo seu voceiro, Álvaro Vila, anunciaron ás portas do centro de saúde do Carballiño a presentación dunha moción na Deputación de Ourense para esixir “unha sanidade pública suficiente e de calidade para toda veciñanza da nosa provincia, independemente do seu lugar de residencia”. “A situación na que se atopa a área sanitaria Ourense-Verín-O Barco de Valdeorras é límite e non é sen tempo que a Xunta de Galicia adopte medidas urxentes para acabar con tantas e tantas eivas”, afirmou Vila ás portas do centro de saúde da vila do Orcellón. Segundo este, “malia as continuas promesas e anuncios grandilocuentes por parte do goberno autonómico do PP, de pequenos arranxos de circunstancias para tapar un burato aquí ou alá, entóxase insostible para a nosa provincia o déficit de facultativos e sanitarios que, ademais, están sometidos a unha inxente carga de traballo acompañada dunhas lamentables condicións laborais ”.

As “fallas graves” na atención primaria están a producir un incremento dos ingresos hospitalarios e das listas de agarda, exercendo asemade unha forte presión nas Urxencias de hospitais e Puntos de Atención Continuada. Unha situación de sobrecarga que se agrava nomeadamente cos picos das infeccións respiratorias, como ocorreu esta pasado Nadal. “Presentamos esta moción no Carballiño, onde é flagrante a falta de pediatras e outros especialistas, pero poderíamos presentala tamén en Xinzo de Limia, Verín, O Barco de Valdeorras, Beade, Punxín, Leiro, Lobios, Os Peares, A Mezquita, a Gudiña ou en tantos outros puntos da nosa provincia onde faltan facultativos, sanitarios, equipos de diagnose ou ambulancias medicalizadas, obrigando a veciñas e veciños a desprazarse a Ourense capital para ser atendidos nas Urxencias”, denunciou o socialista. “O problema é estrutural e por iso agardamos o apoio de todos os grupos na Deputación para esixir que a Xunta aborde dunha vez a cuestión con seriedade, ¡porque non caben máis parches sobre parches!”, concluíu Vila.

Sobre a particular casuística no Carballiño falou Diego Fernández, quen é segundo tenente de alcalde da Vila de Orcellón e deputado provincial. “Contar cuns servizos sanitarios públicos de calidade é unha demanda xeneralizada na provincia, pero no Carballiño é un clamor, xa que a situación non cesa de deteriorarse de xeito inquietante, instalándose desde hai tempo a precariedade na atención sanitaria”, sostivo Fernández. A sucesión de fitos xustifican o depauperamento da sanidade pública no Carballiño é longa: non se cobren as baixas sanitarias, non se abren servizos que son acaídos coa realidade social e demográfica da comarca, ás veces non hai médicos nas Urxencias, o servizo de pediatría é inexistente, hai problemas con xinecoloxía, non se conta con atención psicolóxica, nin con matrona estable, o continxente de ambulancias é moi xusto para a demanda da vila e da súa entorna, e mesmo hai que acudir ao Complexo Hospitalario Universitario de Ourense para facer unhas radiografías.

“Non pode ser que un pai veña coa súa filla ao Centro de Saúde e que non haxa pediatra, que non haxa atención nas nosas Urxencias ou que usuarios de calquera outra especialidade teñan que volver para as súas porque non hai quen os atenda”, denuncia Fernández. O deputado provincial aproveitou para facer un chamado a sumarse ás reivindicacións e acudir á manifestación que o vindeiro domingo, 14 de xaneiro, organiza a Plataforma pola Sanidade Pública de O Carballiño para reclamar un servizo de pediatría digno para a comarca. Para Fernández, “é o momento de dicir basta, de cambiar e que os responsables do PP tomen medidas porque a situación é de extrema gravidade, precisando dunha actuación contundente por parte da Xunta de Galicia para garantir o dereito á saúde de todas e todos”. “É dentro deste contexto que toma senso a nosa moción, solicitando do pleno da Deputación de Ourense o apoio unánime á nosa demanda, que denota o malestar da veciñanza”, sostén Fernández.

A Xunta de Galicia investirá algo máis de 500.000 euros na redacción do plan estruturante de ordenación de solo empresarial (PEOSE) e instrumentos de desenvolvemento e execución do parque empresarial do Carballiño-Maside, tal como publica hoxe a Plataforma de contratos públicos de Galicia. O parque empresarial previsto pola Xunta de Galicia constituirá a ampliación do xa existente na Uceira pero emprazarase tanto nos concellos de Maside como no do Carballiño.

Así llo explicou o director xeral do Instituto Galego da Vivenda e Solo (IGVS), Heriberto García, acompañado polo delegado territorial da Xunta en Ourense, Gabriel Alén, a empresarios e representantes de ambos concellos nun encontro no que lles comunicaron a licitación do contrato e lles ofreceron información sobre a ampliación do parque empresarial. A esta reunión asistiron tanto os alcaldes do Carballiño e Maside, Paco Fumega e José Manuel Iglesias, e o coordenador de Xestur para o sur de Galicia, o carballiñés Argimiro Marnotes. Como anfitrión, exerceu o presidente da Asociación de Empresarios da Área Industrial do Carballiño, Manuel Carballeda.

Inicialmente prevese que o parque empresarial ocupe unha superficie total de máis de 1,2 millóns de metros cadrados dos que algo máis de 230.000 metros cadrados estarán no concello do Carballiño e preto de 990.000 metros cadrados corresponden ao concello de Maside. A superficie destinada a parcelas é de algo máis de 910.000 metros cadrados. A superficie das parcelas é moi variable para atender a demanda que na actualidade xa se está a recibir nos concellos do Caballiño e Maside, e van dos 1000-1500 m2 as máis pequenas ata a macroparcelas de 20.000 m2 as máis grandes.

As empresas interesadas en presentar as súas ofertas para optar a esta licitacion da redacción do plan estruturante do novo parque empresarial poden facelo ata o próximo 16 de febreiro. Según as estimacións avanzadas este mañá polo director do IGVS, a finais de 2025 o novo parque empresarial será xa unha realidade.

Chegou a Berán no ano 1969, facendose cargo durante os últimos 55 anos da parroquia de San Breixo de Berán, e tamén doutras parroquias ribeiráns durante todo este, como foron as de Beade, Viete, As Regadas ou Beiro. Ademáis tamén exerceu como arcipreste dos Arciprestazgos de Ribadavia e Avión.

No ano 2019 a Entidade Local Menor de Berán rendiralle unha homenaxe coincidindo co 50 aniversario da súa chegada a esta parroquia. O velorio instalouse no Tanatorio García Aliende de Leiro, o funeral terá lugar este xoves dia 11 de xaneiro ás catro da tarde na igrexa parroquial de Santa María de Beade, e recibirá posteriormente sepultura no cemiterio da súa parroquia natal, en Cornoces-Amoeiro.

O delegado territorial da Xunta en Ourense, Gabriel Alén, visitou a membros da Asociación de Veciños da Touza, en Maside. Da man do alcalde de Maside José Manuel Iglesias e a unha boa representación dos veciños involucrados, Gabriel Alén percorreu as dependencias do local social.

O delegado territorial destacou o labor desenvolvido polo asociacionismo local a prol da dinamización da vida social e incidiu na necesidade de que as asociacións veciñais, así como as asociacións de mulleres rurais e as comunidades de usuarios de augas coas que colabora a Xunta conten con espazos axeitados para o desenvolvemento das súas actividades.

Gabriel Alén, referiuse á importancia de que as administracións apoien estes colectivos co obxectivo de mellorar a calidade de vida no eido local ao tempo que se contribúe a consolidar o movemento veciñal. Por iso, animou aos veciños a seguir concorrendo a esta orde de axudas, a piques de saír na edición de 2024.

Por último, o delegado territorial da Xunta recoñeceu o mérito de todos os veciños e veciñas que se involucran nos grupos directivos deste tipo de asociacións; “é un traballo voluntario que require dunha gran implicación e que se leva a cabo coa única motivación de facer un ben á súa veciñanza. Creo que é algo de admirar e agradecer”.

O mundo do cinema ten un xénero dedicado á gasolina, os disparos e os coches. Seguramente que na historia do cine encontrarémos centos de películas que se axustan a esta definición, e mesmo teñen o seu público, sobre todo entre os amantes do automobilismo.

Unha das últimas intervencións mediáticas da Policia Local do Carballiño podería enmarcarse neste xénero cinematográfico, con persecución incluída a un conductor que desafiando as ordes dos axentes tratou de fuxir deles poñendo o velocímetro a máis de 100 k/h.

Según o propio relato da Policia Local do Carballiño "sendo as 12:15 horas do sábado dia 6 de xaneiro, na rúa Conde Vallellano, unha patrulla da Policia Local observa un varón que carece de permiso de conducir. A patrulla procede a ordenarlle que se detivese facendo uso das sinais acústicas e luminosas, pero en lugar de deterse comezou a fuxida a gran velocidade polas rúas do Carballiño".

No mesmo atestado da policia carballiñesa figura que o conductor obxeto da persecución policial chegou a superar os 100 K/h. A patrulla advertíu aos outros usuarios das rúas do perigo coas súas sirenas, recabando o apoio tanto da Garda Civil do Carballiño como da Garda Civil de Tráfico.

No seu relato, a Policia Local asegura que durante a persecución "sucedéronse as situacións de perigo, sendo finalmente alcanzado na localidade de Anllo, xa no concello de San Amaro, procedendose a súa detención por un delito contra a seguridade vial, sendo proposto a maiores para dúas sancións administrativas por conducción temeraria e conducir sen cinto de seguridade. O conductor detido é veciño do concello de Leiro, A.P.D., de 22 anos de idade.

O presidente da Deputación de Ourense, Luis Menor, ven de recibir no Pazo Provincial á alcaldesa de O Irixo, Susana Iglesias, para coñecer en primeira persoa as principais demandas deste municipio. No encontro, Luis Menor presentoulle o novo plan de cooperación da institución provincial a través do cal o Concello de O Irixo recibirá un orzamento de máis de 200.000 euros anuais que lle "permitirá acometer moitos dos proxectos pendentes", salientou o presidente provincial.

Na xuntanza tamén se acordou que a Deputación colaborará co Concello de O Irixo na adquisición dun novo inmoble ao carón da Casa Consistorial para mellorar os servizos, así como coa Banda de Gaitas de O Irixo, unha das actividades culturais máis senlleiras da zona.