Política

Aquí podes escoitar o debate electoral de COPE O Carballiño dedicado ao concello de San Amaro. No mesmo participaron os catro aspirantes á alcaldia de San Amaro nas eleccións do 28-M, Gonzálo Fernández Iglesias (ESPAZO COMÚN) Carlos Paz González (XUNTOS POR SAN AMARO) María Jesús Fernández González (PSdeG-PSOE) e Fernando Rodríguez Redondo (PARTIDO POPULAR)

Os candidatos á alcaldia do concello de San Cristovo de Cea, José Luis Valladares Fernández do Partido Popular, e Manuel Pérez Vázquez do Bloque Nacionalista Galego, confrontaron no debate electoral de COPE O Carballiño. Podes escoitálo íntegro no audio adxunto.

A estación fixa de ITV que se vai instalar no polígono industrial do Carballiño, ten previsto inspeccionar 4.000 vehículos durante o primeiro ano, e 14.000 no 2020. Así o anunciou o director xeral de Enerxía e Minas, Ángel Bernardo Tahoces, no acto de presentación desta nova estación de ITV, que fai a número 26 das que hai en Galicia con carácter fixo.

Tahoces dixo que este proxecto mellora as prestacións de servizo para a cidadanía e incrementa a seguridade vial. E informou de que esta estación, que se instalará nunha parcela do polígono industrial da Uceira, que era propiedade do IGVS, suporá un investimento de 950.000 euros e creará 4 novos postos de traballo de calidade.

Por isto, sinalou que ésta "é unha moi boa noticia para O Carballiño, e hoxe é un día de ledicia". Tahoces estivo acompañado na presentación polo alcalde do Carballiño, Francisco Fumega, así como polo presidente de Supervisión e Control, Amador de Castro, que xestiona as ITV de Galicia, e a delegada territorial da Xunta, Marisol Díaz.

Francisco Fumega dixo que esta estación fixa de ITV era unha vella demanda do Carballiño e que abría unha posibilidade de futuro e apuntalamento do polígono industrial.

E recordou que era importante que se creasen catro novos postos de traballo directos, pero que se crearían ainda máis indirectos, polo que expresou o agradecemento dos talleres mecánicos por esta iniciativa. Fumega engadiu que O Carballiño se ubicaba no centro estratéxico das comunicacións de Galicia e que esta condición, xunto coa de ser cabeceira da comarca, lle otorgaba unha situación de privilexio que debía aproveitarse. Finalmente, agradeceu o esforzo da consellería de Economía e Industria, e a deferencia de Ángel Bernardo Tahoces e Amador de Castro, por achegarse ao concello para informar desta boa nova para O Carballiño.

Amador de Castro, pola súa parte, referiuse ao éxito das empresas que representa, e que está baseado non só na calidade técnica das instalacións, senón na calidade do persoal. Así, dixo que haberá moitas melloras técnicas e medioambientais, pero que o máis importante era contar cuns bos profesionais que conformaban un equipo. Por iso, definiu a súa empresa como novedosa e solidaria. Ata agora, no Carballiño só prestaba servizo unha ITV móbil, que inspecionaba vehículos lixeiros durante varios días cada mes, e só unha vez ao ano aos vehículos agrícolas. Unha situación que cambiará en canto se constrúa esta nova estación.

No concello de Piñor celébrase a "1ª Semana da Muller" con diversas iniciativas que pretenden concienciar á veciñanza na igualdade de de xénero. No concello carballiñés, ademáis dun acto institucional, tamén se programaron un concurso de fotografía, unha andaina e unha mesa-coloquio.

1ª Semana da Muller

O Concello de Piñor informa da posta en marcha dunha campaña de concienciación sobre a igualdade de xénero, para conmemorar o Día Internacional da Muller.

Co obxectivo de destacar a importancia da muller ó longo da historia, os avances acadados a nivel de igualdade de xénero e a necesidade se continuar esta loita social, este ano o concello aposta pola “I Semana da Muller”, unha iniciativa que pretende acercar á poboación o tema da igualdade e facela partícipe dun modo orixinal e creativo. Con elo, dende o 8 ó 15 de marzo, as principais dependencias municipais e o Centro de Saúde de Piñor únense nesta campaña igualitaria, levando a cabo dúas accións:

1)    “Piñor coa muller”: Implicación dos diferentes Departamentos municipais, de forma que cada dependencia municipal contará cun cartel conmemorativo do Día da Muller, no lugar máis visible para a poboación, destacando a diferentes mulleres recoñecidas ó longo da historia, ben sexa polos seus logros no eido da igualdade ou noutras áreas relevantes.

2)    “Doces da igualdade”: para achegar o tema da igualdade de xénero á poboación, as principais dependencias municipais (Atención ó Público, Servizos Sociais, Mediambiente, Urbanismo, Padrón e Alcaldía) e o Centro de Saúde (na consulta do enfermeiro e na da médica) contarán con pequenas chocolatinas marcadas con mensaxes orixinais sobre a igualdade de xénero. A idea é transmitir ideas igualitarias en contra do machismo e a sociedade patriarcal, pero dun xeito orixinal e simbólico. Vamos a “endulzarnos”,vamos a volvernos “máis igualitarios”.

Esta iniciativa, totalmente innovadora no municipio, pretende chegar á poboación dun modo máis directo, facéndoa partícipe da loita por unha igualdade efectiva entre mulleres e homes. Un compromiso máis co III Plan de Igualdade de Oportunidades entre Mulleres e Homes do Concello de Piñor (2014-2017).

Actos conmemorativos no Carballiño

A concelleira de Igualdade Marina Ortega deu a coñecer a programación de actividades conmemorativas do Dia Internacional das Mulleres, que se inicia o martes dia 8 de marzo cun acto institucional no salón de sesións do concello carballiñés, onde ademáis se procederá á entrega dos premios do concurso de fotografía "Unha mirada de xénero: a muller e a concilicación", que repartirá 600 euros en vales de compra nos establecementos do Carballiño Centro Comercial Aberto.

Para datas próximas quedará a celebración doutras actividades, como a "5ª Andaina O Carballiño camiña pola igualdade", que terá lugar o domingo dia 13, e unha Mesa-Coloquio sobre "A conciliación ao longo do tempo" o martes dia 15 de marzo.

O concello do Carballiño remitirá unha solicitude á Xunta de Galicia para poder convocar dúas novas prazas de Policía Local, alegando unha situación de excepcionalidade.

Así o anunciou hoxe o concelleiro de Seguridade, Adolfo Nogueira, durante unha comparecencia de prensa na que informou das circunstancias que xustifican esta petición.

En primeiro lugar,  "estas novas prazas xa están contempladas, e en segundo lugar, hai un número insuficiente de axentes para formar patrullas coas que cubrir nalgunha ocasión todas as quendas".

Así, subliñou Nogueira, dos 16 axentes que conforman a plantilla da Policía Local, hai 2 que están en segunda actividade, realizando labores administrativas noutros servizos; hai   outros 2 axentes de baixas prolongadas; o xefe e o adxunto coordinan e fan distintas funcións pero non forman parte das patrullas, e, ademáis, están os permisos por descanso, vacacións, asuntos própios e horas sindicais.

En consecuencia, resulta moi difícil garantir patrullas na rúa as 24 horas do día, 7 días á semana e 365 días ao ano, polo que é absolutamente necesario convocar esas prazas previstas, segundo afirmou o concelleiro.

Ainda así, Adolfo Nogueira quixo tranquilizar aos veciños e veciñas do Carballiño, asegurando que non hai ningún motivo de alarma, tal e como se pode desprender dalgunha recente declaración pública, senón que O Carballiño conta cun dos ratios provinciais máis baixos en materia de seguridade.

Así, con respecto á crítica pola falla dunha patrulla unha tarde, o servizo estivo cuberto por un axente, que é ademáis, cabo, e resolveu unha situación dun aparcamento improcedente diante dun vado, segundo dixo o concelleiro, que engadiu: en todo caso, sempre hai un retén, formado polo xefe e o adxunto á xefatura da Policía Local, para calquera incidencia. E isto, sen contar coa Garda Civil, que está de garda permanentemente.

Nogueira advertiu que a situación heredada con respecto á Policia Local era moi deficiente, e que nestes oito meses que levan no goberno se estaba intentando poñerlle remedio.

E  puxo como exemplo tres iniciativas que estaban en marcha: A elaboración dun convenio regulador da Policía Local do Carballiño, unha RPT e a convocatoria de 2 novas prazas. Tres cuestións absolutamente inéditas nos catro anos anteriores asegurou.

O concelleiro lamentou a postura do Partido Popular, que a inicios desta semana denunciou que O Carballiño estivo sen quenda de tarde na Policia Local este pasado lúns, "cunha nota de prensa insidiosa e cargada de maldade de Marnotes, que denota o pouco que aprendeu no seu paso pola alcaldia".

O Partido Popular levará este asunto ao pleno da corporación municipal

Os populares incidiron, tras a comparecencia de Adolfo Nogueira, na necesidade de que se convoque unha reunión de portavoces para tratar a situación que vive o servizo de Policia Local, e advierte que "no caso de que non se convoque de forma urxente, tal como xa se solicitou este pasado dia 1 de marzo, este asunto será trasladado por medio dunha moción en sesión plenaria ou en pleno extraordinario co seu debate correspondente"

As xornadas teñen como obxetivo informar e asesorar ás comunidades de montes e veciños en xeral que sexan propietarios forestais da capacidade productiva do sector forestal cara á creación de emprego e a diversificación da actividade económica do medio rural.

As xornadas consistirán en diversas charlas que se celebrarán o venres 4 e horario de tarde e o sábado 5 en horario matinal no centro multiusos do concello do Irixo, organizadas polas asociación cultural Arracada.

O venres ás 4 da tarde darálle a benvida aos participantes o alcalde do Irixo, Manuel Penedo. Logo, José Manuel Justo, director da Federación de Razas Autóctonas Españolas, disertará sobre "Gandería de razas autóctonas, montes en man común e coeficientes de aproveitamento de pastos PAC". As 17,40 horas, o secretario da IXP castaña de Galicia, Manuel López, falará do"Cultivo da castaña de calidade".

O sábado, as xornadas inicianse coa charla de Manuel Lois sobre "Axudas públicas ao sector forestal. A figura das SOFOR". Ás 11:45 horas, José Núñez achegará aos presentes a súa experiencia sobre unha explotación extensiva de cabra galega. Seguirálle a intervención de Eugenio García sobre "As axudas dirixidas ás Comunidades de Mntes no ámbito da gandeiría aos mozos"

A clausura das Xornadas estará ao cargo de Eladio Munín, presidente da asociación organizadora.

O grupo municipal do Partido Popular no concello do Carballiño ven de solicitar "unha reunión urxente dos portavoces dos grupos políticos co alcalde, concelleiro de seguridade e e xefe do servizo de Policia Local, co fin de que se nos informe sobre o que está acontecendo con este servizo".

Os populares aseguran que esta petición faise despois "de que este lúns dia 29 de Febreiro fumos advertidos por veciños do pobo de que o servizo de Policia Lcal estivo sen patrulla na quenda da tarde, pois tras reclamar a súa presenza a través do teléfono, comunicouselles que ata as 22 horas non existía axente algún que estivese en disposición de atender incidencia algunha", manifestan.

Considera o Partido Popular que "coa seguridade das persoas non se xoga, coa seguridade das persoas requírese ter un concelleiro que antepoña o servizo diario de atención á veciñanza, ante calquera situación que poida existir dentro do servizo da Policia Local".

Esperan no Partido Popular que esta reunión aclaratoria se convoque canto antes por parte dos responsables municipais.

A conselleira de Medio Ambiente e Ordenación do Territorio, Beatriz Mato, trasladoulle ao alcalde de Leiro, Francisco José Fernández, que a Consellería de Medio Ambiente e Ordenación do Territorio colaborará co concello na mellora e acondicionamento da Rúa Padre Eiján no núcleo urbano.

Durante o encontro, o alcalde explicoulle á conselleira que se trata dunha rúa que constitúe un eixe vertebrador do núcleo, xa que da acceso ao Paseo Fluvial dende a rúa Gabino Bugallal e presenta un ancho escaso. Pola súa banda, a conselleira trasladoulle que se trata dunha actuación que se pode enmarcar dentro do Plan hUrbe da Xunta de Galicia, que busca promover e apoiar actuacións que perseguen recuperar os espazos de encontro dos cidadáns e contribuír ao reequilibrio territorial fixando poboación no medio rural. Mato Otero indicoulle que é necesario asinar un convenio de colaboración para a execución das obras, que debe contar co visto bo do Consello da Xunta, e posteriormente licitalas.

As accións a acometer teñen como finalidade fundamental o acondicionamento para o tráfico peonil e rodado deste punto, xa que nestes momentos conta cun pavimento bastante deteriorado.

Así, executarase unha nova pavimentación da rúa, salvo o ancho irregular que presenta agora, para o que tamén será necesario soterrar unha pequena rede de tubaxe de paso e arquetas, e instalarase alumeado público.

Esta actuación tamén implicará a mellora das infraestruturas que discorren baixo a rúa, polo que se procederá a revisar a rede de saneamento de fecais. Realizarase unha nova rede de saneamento de pluviais, porque os sumidoiros para a auga de chuvia verten directamente na rede de fecais. Esta nova rede deseñarase de tal xeito que cando sexa necesario acometer nela as baixantes de pluviais das edificacións, non será necesario recorrer ao picado masivo do novo pavimento. Tamén se propón deixar executada unha preinstalación a base de arquetas de rexistro e tubaxe que nun futuro permitan instalar redes de telefonía ou similares sen necesidade de picar o pavimento da rúa.

O concello do Carballiño lamenta profundamente o fallecemento do doctor Luís Rodríguez Míguez, condecorado coa Medalla de Ouro do Carballiño en novembro de 1995.

O alcalde do Carballiño, Francisco Fumega, en nome de toda a corporación municipal e do pobo do Carballiño, expresa á súa dona, á súa filla e ao resto da  súa familia as máis sentidas condolencias polo pasamento dunha das personalidades máis salientables de Galicia no estudo e promoción do termalismo, que tivo unha dedicación e unha querencia especial polo Carballiño, e por iso foi distinguido co máis alto recoñecemento a unha persoa que se contempla na normativa municipal.  

O doctor Luis Rodríguez Míguez foi o verdadeiro impulsor das Xornadas de Termalismo de Galicia, que se desenvolveron durante moitos anos no Carballiño, dende 1984, e da creación do “Curso Básico de Hidroloxía Médica”, que tamén tivo como sede a vila carballiñesa.

Ademáis, publicou unha obra esencial para o coñecemento da historia e divulgación dos balnearios do Carballiño, como é o “Estudio Histórico Bibliográfico del Termalismo: principales surgencias de la provincia de Ourense”, onde se fai unha mención especial das augas termais do Carballiño, fundamentalmente, do Gran Balneario e do Balneario das Caldas de Partovia.

E foi un árduo defensor da creación do Instituto Termal de Galicia no Carballiño, un soño que, sen embargo, nunca viu cumplido.

Por estas e outras consideracións, que teñen moito que ver coa súa traxectoria profesional, docente e investigadora, pero tamén coa súa vertente humanista, que tanto o caracterizaba, a corporación municipal do Carballiño incoou un expediente de honores para otorgarlle, en sesión extraordinaria celebrada o 30 de novembro de1995, a “Medalla de Ouro da Vila do Carballiño”.  

Daquela, era o alcalde Pachi Vázquez, e o acordo plenario, adoptado por unanimidade dos grupos municipais que conformaban a corporación, PSdeG-PSOE, BNG e PP, culminaba unha proposta que fora realizada polo xa daquela exalcalde Argimiro Marnotes Rodríguez, en marzo de 1995.

O mercado laboral da comarca de Carballiño creceu preto do 1% –en concreto, ó 0,91%– no ano 2015, o que lle permite afianzar e consolidar por terceiro trimestre consecutivo o nivel dos 8.000 traballadores afiliados á Seguridade Social. Trátase da segunda forza de traballo máis dimensionada da provincia, só por detrás da existente na comarca de Ourense, e con vantaxe sobre á de Valdeorras: 8.002 afiliacións en Carballiño e 7.923 en Valdeorras.

Estes datos foron divulgados polo xerente do Inorde, José Manuel Rodríguez, na primeira presentación comarcal do Observatorio Económico da Deputación de Ourense, realizada no salón de plenos do Concello do Carballiño, coa asistencia de alcaldes, técnicos de emprego, empresarios e axentes sociais da zona.
 
Segundo as estatísticas do estudo, con ese ritmo de rexeneración de afiliacións próximo ao 1% en taxa interanual, foi a quinta comarca ourensá con mellor comportamento neste indicador da recuperación económica. Non dista moito da creación neta de empregoque acreditan as outras dúas comarcas con maior des-envolvemento empresarial da provincia: a de Ourense, cun auxe de afiliacións do 1,2% no último ano; e a de Valdeorras, cun incremento do 1,3%.
A nivel municipal, catro concellos lograron crear emprego, un conservou a mesma cifra de postos de traballo (Piñor) e catro perderon afiliados en 2015. Entre os primeiros, Irixo e Boborás impulsaron un 3% de emprego neto; e O Carballiño e Maside, un 2%. No lado oposto, as peores evolucións déronse en Beariz, que nun ano acurtou o seu mercado de traballo en algo máis do 9%; e en Punxín, onde a baixada foi do 5%.

Ao analizar o convulso período dos últimos oito anos, obsérvase que a comarca perdeu o 15% das afiliacións en taxa acumulada, proporción que supera en dous puntos ás medias provincial e galega, situadas ambas na contorna do 13%. Con todo, presenta un comportamento mellor que sete comarcas ourensás, xa que só recuperou menos afiliados que Ourense, Verín, Allariz-Maceda e Viana. 
 
Por outra parte, o paro rexistrado baixou en 2015 un 6,6% no conxunto da comarca de Carballiño, cifra moi en liña coa redución media da provincia (-7%). Presenta o sexto maior descenso comarcal e, de manter o ritmo actual, en dous anos lograría situar o censo de parados por debaixo dos 2.000 demandantes de emprego, situación que xa produciuse excepcional e illadamente nos meses de agosto e setembro de 2015, pero que non se tiña visto desde outubro de 2009.
 
A análise do paro por municipios reflicte contrastes moi acentuados. Si ben se acurtou en 2015 nun 10% na cabeceira comarcal, O Carballiño, e nun 9,6% en San Cristovo de Cea, nese mesmo ano a taxa interanual subiu un 37,5% en Beariz. Pero cabe precisar que este inusual repunte en Beariz responde en realidade a un incremento moderado en términos absolutos, ao pasar dun total de 32 parados en xaneiro de 2015 a 44 no mesmo mes de 2016, o que equivale a un inscrito máis ao mes.
 
Na comparativa coa situación previa á crise, ve-mos un primeiro concello, o de San Cristovo de Cea, que rexistra hoxe menos parados que en xaneiro de 2008, cun descenso do 2,4%. E O Irixo achégase ta-mén a ese fito, xa que o aumento acumulado limítase ao 4,9%. Pola súa banda, o paro acumulado no municipio de Carballiño aínda sinala un incremento do 40%, moi superior á media provincial do 28,7%.

O sétimo Observatorio Económico Ourensán adicou un fondo tratamento ao colectivo dos pensionistas, desde o enfoque demográfico e tamén desde o punto de vista dos tipos de cotizacións, do poder adquisitivo e do grao de cobertura. Unha das conclusións do informe é que o desenvolvemento empresarial da comarca non se percibe aínda no importe medio das pensións, que está fixado en 674 euros, o terceiro máis feble da pro-vincia, si ben no último ano subiu un 1% (e un 5,7% en taxa acumulada desde 2011).
 
Mentres, a cobertura das pensións entre o colectivo dos maiores de 65 anos (porcentaxe da poboación que cumpriu os 65 anos e que percibe pensión) sitúase nesta comarca no 81,3%, cando a media da provincia está no 79,6% e a de Galicia no 78,5%. O grao de cobertura que alcanza Carballiño é o sexto máis alto de Ourense, só superado por Terra de Caldelas (88,1%), Terra de Trives (85,2%), Allariz-Maceda (83,4%), A Limia (83%) e Viana (81,6%). As proporcións máis cativas son as das comarcas de Verín (75,7%), Ourense (77,9%) e A Baixa Limia (78,5%).