O Consello da Xunta ven de autorizar na súa reunión desta semana a subscrición dun convenio de colaboración coa asociación O Carballiño-O Ribeiro para a posta en marcha do Plan de sustentabilidade turística en destino por valor de 1,5 M€ nos 21 concellos que conforman parte do xeodestino que xestionan.

Incluirá medidas como a posta en marcha de ferramentas de dixitalización, realidade aumentada e posta en valor dos produtos gastronómicos locais a través de rutas temáticas, entre outras. En concreto, o plan beneficiará os concellos da Arnoia, Avión, Beade, Carballeda de Avia, Castrelo de Miño, Cenlle, Cortegada, Leiro, Melón, Ribadavia Beariz, Boborás, O Carballiño, O Irixo, Maside, Piñor, Punxín, San Amaro, San Cristovo de Cea, Padrende e Pontedeva.

Entre outras medidas prevese un plan de ruta ata 2025, que incluirá a mellora da xestión turística deste destino coa restauración paisaxística dos produtos e servizos turísticos, elaboración dun inventario do patrimonio material e inmaterial enogastronómico ou a creación dun menú especial con produtos km 0 da zona. Tamén se prevé, entre outras accións, implantar medidas de realidade aumentada para coñecer a tradición enogastronómica do territorio ou a apertura dun centro de enogastronomía.

CINE. O Cine-Club Carballiño proxecta a película española "Te estoy amando locamente". Venres 6 ás 20:00 e 22:30 horas no auditorio. O Novocine de Leiro ten en carteleira dúas películas do venres ao domingo: "Amigos hasta la muerte" (16:00 h.) e estrea "La ternura" (18:00, 20:00 e 22:00 h.)

TEATRO. Continúa a "Mostra de Teatro Amador" que organiza Tiruleque. O Grupo "Hipócrita Teatro" de Lugo representa a comedia "Casting". Domingo 8 ás 20:00 horas no auditorio do Carballiño.

ARENTEIRO FOTOGRÁFICO. A asociación "O Potiños" inaugura a que será outro outono máis un evento que fai do Carballiño a capital galega da fotografía durante os meses de outubro  e novembro, con ata 18 exposicións e outras actividades. O sábado 7 ás 17:30 h. apertura das exposición no local da rúa Evaristo Vaamonde, e ás 19:00 h. na casa da cultura terá lugar a gala de inauguración  e mesa redonda con Juan Adrio, José Fachal e Brais Lorenzo.

DIA DA BICI.  Un paseo de 8 km. polo Carballiño e arredores, con saída ás 11:30 h. do domingo 8 desde a Praza da Veracruz, na que aínda poderán facerse as inscricións a partir das 10 da mañá.

RALI DO LACÓN HISTÓRICOS. O sábado 7 e organizado polo "Club Arenteiro Clásicos" 45 vehículos históricos, todos anteriores a 1980, participan neste rali que fará un percorrido de 265 kilómetros polos concellos do Carballiño, Cea, Maside, Vilamarín, Amoeiro, San Amaro, O Irixo, Boborás, Cenlle, Leiro e Beade.

FESTA DOS CALLOS DE PIÑOR. O domingo 8 no campo da festa do pobo do Arenteiro convertido nun gran comedor ao aire libre para degustar desde as 14:00 horas un menú a base de empanada, lacón asado, callos, bebida, pan e sobremesa. Haberá unha ruta de motos clásicas, actuacións musicais e actividades de animación infantil gratuítas.

FESTAS NAS PARROQUIAS DE PEREDA E OURANTES.  Tras celebrar a "Ruta das adegas" na noite deste venres 6, a parroquia de Pereda no concello de Cea celebra o sábado 7 o o domingo 8 as festas da Virxe do Rosario, con misas solemnes ao mediodia, sesións vermút, e verbenas coa música de Feitizo de Pau, o grupo Xoldra e o dúo Explosión. 

A parroquia de Ourantes no concello de Punxín celebra eta fin de semana -sábado e domingo- as festas de San Francisco, que animarán a charanga Europa , a orquestra Fania Blanco Show e o dúo Os Trasnos. O sábado ás 14:30 está organizada unha comida popular.

José Antonio Barge, Manuel Nogueira, María Luisa Rodríguez e Sebas Lamazares, comentan temas de máxima actualidade esta semana na tertulia dos venres, en COPE O Carballiño.

Podes escotála no audio adxunto:

A casa do concello do Irixo acolleu a IV reunión da Asociación de Concellos Camiño de Nós.

Asistiron alcaldes e representantes de dez municipios das provincias dr Ourense, Pontevedra e A Coruña polos que atravesa a ruta seguida, en xullo de1926, por Vicente Risco, Otero Pedrayo, Florentino Cuevillas, Vázquez Monxardín, Lois Feixoo, Antón Sánchez e Xavier Pardo Bedia, desde Ourense a Compostela.

A presidenta e anfitriona da Asociación que reivindica este itinerario cultural é Susana Iglesias, alcaldesa do Irixo, vicepresidente José Manuel Iglesias, alcalde de Maside e o secretario Carlos Martínez Carrillo, alcalde de Vedra.

O próximo 21 de outubro, sábado, ás 10,00 hs terá lugar a III Andaina Camiño de Nós, co traxecto O Carballiño-Irixo, organizada pola Fundación Insua dos Poetas e patrocinada polos Concellos do Carballiño e O Irixo.

Os alcaldes e alcaldesas asinantes do Pacto de Pedre (Jorge Cubela, de Cerdedo-Cotobade; Patricia Torres, de Boborás; Manuel Prado, de Beariz; Manuel Vázquez, de Punxín; Susana Iglesias, do Irixo, Manuel Iglesias, de Maside, e Francisco Fumega, do Carballiño), mantiveron hoxe unha reunión co presidente da Deputación de Ourense, Luis Menor para solicitar o apoio da institución provincial na reivindicación da mellora integral da estrada N-541.

Luis Menor recalcou a importancia da petición unánime dos alcaldes dos municipios afectados de dúas provincias. Sinalou que o tráxico accidente na Noiteboa de 2022, con 7 falecementos, amosou a crudeza da situación de falta de seguridade que ten unha vía que vertebra dúas provincias e une dúas capitais de provincia. "A estrada está igual que hai 30 anos, salvo algún remendo que en nada mudou a situación. A Deputación non pode ser máis que solidaria e reivindicativa cunha petición de aumento da seguridade, pois as mortes non as podemos soportar", recalcou.

Luis Menor tamén abundou no valor estratéxico que ten esta estrada para o desenvolvemento económico de dous territorios. "Por iso precisamos maior ambición: por suposto, e en primeiro lugar, unha reforma que é máis que necesaria. Pero iso debémolo combinar cunha vía de alta capacidade que una as capitais das provincias de Ourense e Pontevedra. Sería a solución definitiva para vertebrar, solucionando os problemas actuais e dispoñendo dunha conexión sólida e de futuro na que o Goberno central se debe poñer a traballar, polo ben de ambas provincias".

Jorge Cubela, que falou en nome dos alcaldes firmantes do Pacto de Pedre, agradeceu o apoio da Deputación de Ourense e a sensibilidade do seu presidente, Luis Menor, respecto á súa petición: a mellora integral da N-541. A súa falta de adherencia, situación actual e estado de conservación está provocando unha grave inseguridade para as persoas, con demasiados sinistros de tráfico. E sinalou como necesidade inmediata unha capa de rodadura no seu trazado integral e mellora nos accesos aos núcleos poboacionais.

A Deputación de Ourense presentou na Feira Internacional de Termatalia que se está celebrando en Uruguai, a primeira tarxeta dixital termal (wallet), que permitirá aos usuarios coñecer as novidades dos programas públicos provinciais de termalismo, promocións que o sector realice con axuda da Deputación ou facilitar a súa identificación nos centros termais da provincia, entre outras cuestións.

O presidente de Uruguai, #Luis Lacalle, tivo a oportunidade de coñecer os detalles desta nova ferramenta -a primeira destas características que se implementa no sector dos balnearios- da man da director da área de Benestar da Deputación de Ourense, Jose Juan Cerdeira.

Outra das funcionalidades que ofrece esta tarxeta é crear un sistema de comunicación directa entre os balnearios e os usuarios, permitindo ao sector incluír direccións web actualizadas con descontos ou promocións especiais.

A tarxeta dixital (wallet), dispoñible para os dous sistemas operadores de telefonía móbil (IOS e Android, servirá aos balnearios e á institución provincial para informar á cidadanía das novidades termais de Ourense. Para iso, os usuarios deberán instalar esta tarxeta na aplicación wallet do teléfono e rexistrar os seus datos persoais para que a través dun código QR, o balneario poida ler en segundos a información básica de identificación do usuario. Unha ferramenta deseñada para que se actualice inmediatamente para os usuarios, balnearios e a administración provincial.

Neste sentido, é importante destacar que esta tarxeta permitirá dispoñer dos datos do usuario para a súa identificación cada vez que acuda a un balneario da provincia permitindo un maior control que será beneficioso para múltiples obxectivos como pode ser: campañas de promoción que outorguen puntos por ir aos balnearios a través de rebaixas ou premios por alcanzar un número de usos dos servizos dos centros termais, ata a posta en marcha dun sistema que simplifique o rexistro das técnicas termais que se presta en programas como o de Termalismo Social da Deputación. De feito, a partir do ano 2024 utilizarase esta tarxeta dixital para comunicar o inicio do programa, informar sobre as súas novidades, así como para contactar coas persoas beneficiarias do mesmo.

Así mesmo, se o usuario da tarxeta permíteo, o sistema pódelle enviar mensaxes e notificacións personalizadas e xeolocalizadas reportándolle unha serie de información que poida ser do seu interese. Pero, para acoutar máis a información que ao usuario chégalle a través da tarxeta, poderá determinar no formulario de inscrición o “grupo de interese” ao que quere pertencer, por exemplo, as persoas beneficiarias do Programa de Termalismo Social terán un grupo específico.

O primeiro grupo en crearse nesta plataforma foi o de “Grupo Termatalia 2023” para poñer ao dispor da comunidade científica e dos representantes de organismos públicos, a posibilidade de rexistrarse na tarxeta dixital coa finalidade de fomentar colaboracións e transferencia de boas prácticas.

Termatalia Uruguai 2023 declarado Evento de Interese Turístico

“Termatalia Uruguai 2023” foi declarado Evento de Interese Turístico polo Ministerio de Turismo da República Oriental do Uruguai. Trátase da quinta edición da feira en América Latina, tras as celebradas anteriormente en Perú, Arxentina, México e Brasil. Ao longo das súas 21 edicións, Termatalia é un evento que demostrou ser de interese para os gobernos que apostan por posicionarse como destinos termais e de turismo de saúde.