O Arenteiro saíu en tromba ao municipal de Espiñedo neste partido correspondente á 10ª xornada do campionato de liga de Primeira RFEF e aos 3 minutos Miku marcaba o primeiro dos catro goles dos verdes ante o equipo charro, xa na segunda parte chegou a goleada cos tantos de Álvaro Ramón, Manín e Vicente Esquerdo.

Mellor inicio imposible para unha semana de máxima esixencia para os verdes, con 3 partidos en 7 dias, xa que o mércores dia 1 ás 16:30 horas xogará a primeira eliminatoria da Copa do Rei a partido único no Suárez Puerta co Avilés, mentres que tres diás despóis, o sábado 4 de novembro ás 19:00 h. volverá o Arenteiro xogar en Espiñedo en partido de liga ante o Fuenlabrada madrileño.

Video-resumen do partido:
https://www.youtube.com/watch?v=J_R6o_brBx8&ab_channel=RealFederaci%C3%B...

Cronica do partido en "La Voz de Galicia"
https://www.lavozdegalicia.es/noticia/ourense/2023/10/29/arenteiro-alard...

CINE. O Cine-Club Carballiño proxecta a película francesa "Las dos caras de la justicia", venres 28 ás 20:00 e 22:30 horas no auditorio do Carballiño. O Novocine de Leiro estrea a película de animación "Trolis 3", en pases diarios ás 16:00, 18:00 e 20:00 horas.

TEATRO. Na Mostra de Teatro Amador que organiza Tiruleque chega a O Carballiño a compañía "Fauna 113" de Vigo coa súa comedia "Os veciños do lado". Sábado 28 ás 20:00 no auditorio.

LITERATURA. A tenda OZOCOgz do Carballiño acolle a presentación do libro de Rochi Nóvoa "Diagnóstico poético, os versos que levas dentro", sábado 28 ás 12:00 horas.

EXPOSICIÓNS. A  artista carballiñesa MAYEYA inaugura a súa exposición de pintura, 50 obras de monoimpresión con acrílicos, sábado 28 ás 19:00 horas no auditorio. E toda a fin se semana permanece aberta a sala de exposicións do Arenteiro Fotográfico, que a asociación O Potiños instalou no local da rúa Evaristo Vaamonde nº 26.

ANDAINA E TRAIL DO OUTONO. Actividades organizadas polo concello de Piñor, na matinal do domingo 28, con punto de concentración, saída e meta na Praza do Arenteiro, a andaina sae ás 10:00 horas e o Trail ás 11:00 horas.

XTREMO MESEGO. 150 pilotos participan nesta competición, o sábado 28 no monte do Penedo-Partovia de 11:00 a 14:30 horas, e o domingo 29 a partir das 9:00 horas en Pena Cobertoira. Suspendeuse debido o mal tempo o espectáculo-exhibición  de Enduro que estaba programado para a tarde do sábado na Avenida do Arenteiro.

FUTBOL DE 1ª RFEF: Na décima xornada do campionato de liga o Arenteiro recibe en Espiñedo ao Unionistas de Salamanca, sábado 28 ás 16:00 horas.

FESTA DE SAN XUDAS TADEO. A parroquia de Vilela, no concello de Punxín, celebra a festividade de S. Xudas Tadeo este sábado dia 28 de outubro, con misa solemne ás 13:00 horas, con sesión vermú e festa coa animación musical do Dúo Explosión, pola tarde actuarán as pandereiteiras e cantareiras "As Bolboretas" do Carballiño.

Os asuntos mais relevantes da semana protagonizan unha nova tertulia do venres en COPE O Carballiño. Podes escoitála no audio adxunto.

A Xunta impulsa prácticas formativas de xente moza entre os 18 e 30 anos na panadería ‘Aboamigalla’ situada no polígono municipal de Cea, a través do programa Xuventude Mentoring na Empresa. A directora xeral de Xuventude, Participación e Voluntariado, Cristina Pichel, visitou as instalacións desta firma, que é unha das dez que colaboran no proxecto presentado por Valoresc Innovation a este programa autonómico, e que permite que 12 mozas e mozos teñan o seu primeiro contacto co mundo laboral.

Cristina Pichel, que estivo acompañada do delegado territorial da Xunta de Galicia en Ourense, Gabriel Alén, coñeceu a experiencia das dúas rapazas que están a desenvolver a súa estadía formativa nesta panadería de San Cristovo de Cea, unha na parte administrativa e outra no obradoiro. Tras a visita destacou que o Xuventude Mentoring na Empresa supón un paso máis na formación e asesoramento á xuventude para facilitar a súa transición entre a etapa formativa e laboral.

Ademais, a directora xeral salientou a boa acollida que esta ter esta iniciativa, xa que nesta primeira edición está a permitir un primeiro contacto co ámbito profesional a 170 mozos e mozas. O Goberno galego destina 1,2 millóns de euros a esta nova proposta, financiada nun 80% polo Fondo Social Europeo (FSE) no marco do Programa operativo de emprego xuvenil 2014-2020.

Interese de entidades locais e de compañías
Cristina Pichel subliñou o interese que levantou esta primeira edición do Xuventude Mentoring na Empresa entre as compañías, as entidades locais e a xente nova. Así, o programa conta co apoio de máis de 70 entidades do sector privado nas que a mocidade realiza prácticas formativas; e tamén conseguiu a implicación dos concellos, xa que que nesta edición participan tres municipios da Costa da Morte: Camariñas, Muxía e Vimianzo.

Xunto con este programa, a Xunta impulsou no 2021 o Xuventude Mentoring, que este ano vai pola súa cuarta edición e que permitiu acompañar a preto de 500 mozos no seu paso de estudantes a profesionais.

O xeodestino O Carballiño-Ribeiro presentouse na Casa de Galicia en Madrid a prensa especializada en Turismo e Gastronomía. O director da mesma, Javier Vázquez, foi o anfitrión deste evento que amosou as bondades do xeodestino, pero tamén da provincia en xeral. O xeodestino turístico O Carballiño-Ribeiro está integrado pola práctica totalidade dos concellos de ambas as dúas comarcas.

O encargado de presentar a riqueza turística que ofrecen os diferentes municipios adheridos ao xeodestino foi o seu presidente, Francisco José Fernández, quen afirmou “que se trata do territorio máis termal da provincia termal española de referencia. Ademais todo aquel que se achegue a nosa comarca será recibido cos brazos abertos”. O presidente do xeodestino e alcalde de Leiro, trasladou aos prescriptores especializados no ámbito turístico e gastronómico as bondades que ofrece a provincia de Ourense, sinalando que precisamente este xeodestino “representa á perfección os atributos cabeceira da nosa marca turística e que pivotan en catro recursos: o patrimonio, a natureza, a enogastronomía e o termalismo”.

No acto interveu tamén, Manuel Dacal, Concelleiro de turismo de Carballiño, que fixo referencia ao polbo, cunha Festa ao redor del, que está declarada Festa de Interese Turístico Internacional.

Por último José Luis Valladares, alcalde de San Cristovo de Cea, falou sobre as bondades do “Pan de Cea”, recoñecido coa Indicación Xeográfica Protexida recoñecida pola Orden de la Consellería de Política Agroalimentaria e Desenvolvemento Rural.

O acto consistiu en escenificar unha romaría polbeira no pleno corazón de Madrid con gaiteiros, polbo á feira, viño do Ribeiro e pan de Cea para dar a coñecer todas as potencialidades do territorio. Tamén houbo unha proxección dun documental sobre o polbo do Carballiño, a súa orixe, a súa historia, a súa preparación e toda a súa tradición que leva detrás e a estirpe de todas as polbeiras que percorren todos os pobos de Galicia, levando o seu saber facer polos diferentes lugares.

A estrela do acto foi a polbeira Aurora Baranda, terceira xeración de polbeiras que segue percorrendo Galicia, de feira en feira, demostrando que o polbo non soamente é un prato para feiras, senón que se pode presentar ao máis alto nivel gastronómico porque é un produto perfecto. A sala quedou pequena polo gran poder de convocatoria.

Todos os xornalistas que acudiron ao acto marcharon encantados e con moi bo sabor de boca tras unha presentación diferente, de pé, mentres degustaban estes produtos de calidade, do sabor do polbo, do viño e dos acompañamentos. Fernando Valmaseda, director da Agencia de Comunicación Turística RV Edipress e do programa de radio Miradas Viajeras (Radio Capital) e Miradas Viajeras TV en Movistar efectuou a presentación do acto.

O Centro Cultural Marcos Valcárcel de Ourense albergará o IX Ciclo "Cata a Arte" que organiza o Consello Regulador da Denominación de Orixe Ribeiro os xoves 2, 9, 16, 23 e 30 de novembro en horario de 20.00 a 22.00 horas. Esta iniciativa, que foi presentada esta mañá, inclúe presentacións e degustacións de catro adegas da D.O. Ribeiro (Pousadoiro, Loeda, Alanís e Arco da Vella Adega do Eladio) , acompañadas de accións culturais paralelas como música, poesía ou maxia e un evento especial con cata guiada dos viños institucionais do Consello Regulador.

A presentación do IX Ciclo "Cata a Arte" contou coa presenza do presidente do C.R.D.O. Ribeiro, Juan M. Casares; o director do Centro Cultural Marcos Valcárcel, Francisco González, e o presidente de ALCER Ourense, Miguel Ángel Quintas.

As catas comezarán o xoves da semana que vén e o seu aforo estará limitado a 100 persoas por xornada, e as prazas serán cubertas por orde de retirada das entradas de forma presencial no Centro Cultural, desde o luns anterior a cada evento, cun máximo de dúas entradas por persoa.

As catas novamente terán un carácter solidario. O C.R.D.O. Ribeiro, co Centro Cultural Marcos Valcárcel e a Deputación de Ourense, colaboran un ano máis conxuntamente en apoio á Asociación para a Loita contra as Enfermidades Renais (ALCER Ourense), polo que, nesta novena edición, solicitarase aos asistentes un donativo a favor desta organización de carácter social e sen ánimo de lucro que ten como finalidade mellorar a calidade de vida de todas aquelas persoas afectadas por enfermidades renais e os seus familiares; desenvolvendo distintas actividades enfocadas á prevención e a loita contra as enfermidades que afectan o ril, así como á doazón de órganos; tamén ofrecen servizos de interese como son os de traballo social, nutrición ou psicoloxía. A asociación está composta por persoas con enfermidade renal crónica en tratamento de diálise, con transplante de ril, familiares, así como persoas sensibilizadas con este tipo de enfermidades e a súa problemática.

A Policia Local do Carballiño está a colaborar esta semana e ata o próximo domingo dia 29 coa campaña da DGT de vixilancia intensiva, prestando especial atenciión ao axeitado mantemento e posta a punto dos elementos de seguridade do vehículo, como son o correcto estado dos neumáticos e as luces.

Durante os controis efectuados no mesmo casco urbano carballiñés durante a xornada deste martes, os axentes expediron varias denuncias,, na súa maioría relativas a vehículos con defectos, asi como por carecer de seguro e mesmo por circular sen a ITV en vigor.

Ademáis, a Policia Local carballliñesa informa da detención e posterior investigación xudicial dun conductor que circulaba polas rúas do Carballiño, un veciño de Punxín de 21 anos de idade, que carecía de permiso para conducir vehículos a motor, mediante privación do permiso por orde xudicial  vixente ata abril de 2024. A investigación está contemplada no artido 384 do Código Penal, que sanciona a actuación  por conducir un vehículo a motor ou ciclomotor sen carné de conducir, pola perda de validez por ter perdido todos os puntos, non obtelo nunca ou ter sido privado del por resolución xudicial.