Este mércores, foron recibidos, na casa do Concello, os integrantes da Xunta Directiva da Asociación de Empresarios da Área Industrial polo alcalde, Francisco Fumega, e o concelleiro de Industria, D. Manuel Dacal, co fin de abordar os asuntos de especial relevancia para a boa marcha das 52 empresas que integran dita asociación na actualidade, e conforman o tecido empresarial mais importante da comarca do Carballiño xerando emprego para 1.150 traballadores.

Primeiramente a representación empresarial detallou a relación de inquedanzas e proxectos a emprender para facer viable a actividade empresarial así como o mantemento e mellora do emprego da area empresarial.

A representación da asocición empresarial presentoulles aos responsables municipais a demanda dun Viveiro de Empresas, expuxéronlle os beneficios de contar cun viveiro de empresas, para facilitarlle a emprendedores e emprendedoras o inicio da súa actividade na Area Empresarial, mediante o aluguer de naves a un prezo moi reducido, e así impulsar o asentamento de novas empresas na futura ampliación do parque empresarial.

Polo que respecta ás vias de comunicación, falouse da futura autovía que unirá Ourense con Lugo e a posibilidade de contar cun enlace que conecte a área empresarial do Carballiño coa A-56, algo que sería moi beneficioso, non só para os empresarios e traballadores do polígono, senón para o conxunto da comarca en xeral. O equipo de Goberno mostrouse completamente a favor desta proposta, manifestando o seu apoio, e comprometéndose a establecer diálogo con aqueles axentes e institucións pertinentes.

En materia de seguridade, outro dos principais asuntos que se abordaron, e polo que se mostrou gran preocupación, foi o relativo a seguridade das persoas e as empresas, despois de terse producido diversos roubos en empresas da área industrial nas últimas semanas. Ambas partes estiveron de acordo, en que é primordial ter un entorno seguro, polo que é indispensable adoptar todos aqueles mecanismos para erradicar este tipo de sucesos. Deste xeito, acordaron aumentar as rondas de vixilancia dos corpos de seguridade durante a noite e celebrar unha reunión coa Garda Civil. Tamén se propuxo revisar o actual sistema de vídeo vixilancia instalado no polígono, co obxectivo de mellorar a sua eficacia para a sua contribucion ao fin desexado.

Finalmente, abordouse o acondicionamento de viais, tratouse a necesidade urxente de acondicionar e asfaltar o tramo final do vial 6 en dirección á antiga feira do gando, demanda que se ven reiterando en últimas reunións. En relación a isto, acordouse arranxar aquelas zonas máis deterioradas na maior brevidade posible.

A Xunta continúa a impartir o primeiro Plan de Formación para persoal de servizos sociais no que se aborda, entre outras materias, as novidades normativas en materia de discapacidade. O director xeral de Inclusión Social, Arturo Parrado, visitou hoxe os participantes que asistiron a esta sesión formativa sobre a Lei 8/2021 de atención ás persoas con discapacidade na Residencia de Tempo Libre do Carballiño.

Entre os asistentes encóntranse profesionais de 16 entidades sociais de Galicia como a Asociación Atox, a Fundación Monte do Gozo-Proxecto Home, C.T.V.A. A Valenzá, o Centro de Inclusión María Nazarena e persoal implicado na Fundación Pública para a Tutela de Persoas Adultas (Funga).

O Plan de Formación Continuada iniciouse o pasado mes de novembro e está dirixido a máis de 10.000 profesionais e conformado por 300 actividades e máis de 6000 horas. Este plan permite atender as dúbidas e formar os profesionais dos diferentes centros nas técnicas máis avanzadas. Os contidos deles irán desde novidades normativas ata aspectos máis tecnolóxicos ou sociais.

A casa do concello de Beariz acolleu un acto simbólico no que a deputada de Igualdade e Reto Demográfico da Deputación Provincial, Luz Doporto, acompañada do alcalde, Manuel Prado, fixo entrega da última das tarxetas do programa de axudas de 2021 a Leticia Domínguez, nai dunha bebé nacida o 31 de decembro.

O programa ChegOU da Deputación ourensá inclúe unha tarxeta con 300 ou 500 euros, segundo a clasificación de prioridade demográfica do municipio no que resida a familia, para gastos relacionados con produtos hixiénicos, alimentarios ou de saúde do bebé.

Luz Doporto lembrou que o programa se puxo en marcha en 2016 e que, desde entón, repartiu un total de 2,3 millóns de euros en axudas a 7.799 beneficiarios.

A Deputación de Ourense destina este ano 300.000 euros ás subvencións para o fomento da natalidade do programa ChegOU, que xa se poden solicitar.

Estas axudas están dirixidas ás persoas que, entre o 1 de xaneiro e o 31 de decembro deste ano, teñan un fillo, adopten ou accedan á tutela de menores.

A Policia Local do Carballiño incorpora dende hoxe dia 1 de Febreiro a 3 novos axentes, que unha vez rematado o seu periodo en practicas tanto na Academia Galega de Seguridade como na propia Policia Local carballiñesa, tomaron xa posesión das súas prazas en propiedade, comezando a exercer a súa labor profesional como axentes do Corpo da Policia Local.

Coincidindo coa incoporación dos novos efectivos, a Policia Local do Carballiño tamén conta dende hoxe, neste caso con carácter temporal durante os próximos 6 meses, de catro auxiliares de policia, que prestarán labores de apoio aos axentes.

As 7 incorporacións veñen a cubrir o deficit de efectivos da Policia Local, consecuencia das xubilacións, as baixas por enfermidade, e por un concurso de mobilidade ao que se acolleu un axente que se incorporou á Policia Local de Ourense.

O Sergas volve organizar un novo cribado con test de antíxenos para a poboación da comarca do Carballiño, que se levará a cabo este próximo mércores dia 2 de Febreiro entre ás 15:30 e as 20:30 horas no auditorio do Carballiño. Un cribado que tén como finalidade detectar posibles positivos que son asintomáticos.

Será mediante autocita, unha vez que se solicite a mesma, as persoas recibirán unha mensaxe de confirmación.

Apúntate neste enlace: https://coronavirus.sergas.gal/cribado/Rexistro.aspx

Polémica tanto no pleno da corporación como entre a veciñanza do municipio de Punxín, tras a aprobación das novas enseñas que foron aprobadas en solitario polo grupo de goberno do Partido Popular. 

Tanto o escudo como a bandeira mostran dúas cabezas de boi, en alusión á lenda dos dous animais que turraron do carro que trouxeron os restos do Santo Wintila ata Punxin, un acio de uvas, que fai referencia á condición ribeirán de Punxín, e unhas ondas que representación ao río Barbantiño que baña o concello.

Os grupos da oposición, PSdeG-PSOE e Compromiso por Galicia, manifestaron as súas reticencias coas novas enseñas, por considerálas pouco representativas de Punxín. Tamén entre a veciñanza esta proposta da alcaldía provoca controversia, asi o acreditan os comentarios dos oíntes de COPE O Carballiño, que -de forma xeralizada- consideran que os "bois" son moi pouco ou nada representativos dun municipio que, mesmo tradionalmente, foi moi pouco gandeiro.

O vicepresidente económico e conselleiro de Economía, Empresa e Innovación, Francisco Conde, mantivo esta semana en Santiago de Compostela un encontro co alcalde do concello  do Irixo, Manuel Cerdeira, que serviu para avanzar en novas vías de colaboración para apoiar os emprendedores e empresarios locais.

Na xuntanza os dous destacaron a oportunidade que supón para a dinamización da economía o novo coworking impulsado polo Igape e a Escola de Organización Industrial en colaboración coa Mancomunidade do Carballiño, que preside Manuel Cerdeira.

Trátase dun espazo de traballo destinado a emprendedores e que contemplan no seu conxunto distintas actividades e asesoramento, e están deseñados para aumentar as posibilidades de éxito de proxectos innovadores en fases temperás de desenvolvemento. Na reunión avaliaron outras iniciativas conxuntas como o marketplace impulsado polo Concello e que permite adquirir en liña pan, mel, lácteos, carne e outros artigos de produtores e comercios locais. A Xunta apoia con máis de 47.000 euros esta plataforma dixital coa que o Goberno municipal dá visibilidade e achega novas posibilidades de negocio para as empresas da localidade.

Ata por 3 veces tremou a terra no Carballiño durante este sábado dia 29 de Xaneiro, según recolle o Instituto Xeográfico Nacional, con 3 pequenos terremotos con epicentro no municipio do Carballiño.

O de menor intensidade rexistrábase ás 5,24 horas desta pasada madrugada, dunha magnitude de 1,6. Ás 9,41 horas desta mañá de sábado rexistrábase un terremoto que alcanzaba unha magnitude de 2,9 na escala de Richter, cunha profundidade de 1 kilómetro, que foi sentido por numerosos veciños do Carballiño, tamén noutras localidades da comarca, nos concellos de Boborás e O Irixo, según o testimonio do que deron conta a COPE O Carballiño.

Finalmente, unhos minutos despóis, ás 9,44 horas os sismógrafos do Intituto Xeográfico Nacional rexistraron un terceiro tremor de terra, tamén con epicentro no  municipio carballiñés, cunha magnitude de 2,4 e unha profundidade de 5 kilómetros.