O director de Turismo de Galicia, Xosé Merelles, participou este domingo na inauguración da XXI Festa de Exaltación da Indicación Xeográfica Protexida Pan de Cea, de interese turístico de Galicia, onde cualificou esta festividade como un referente do turismo gastronómico do verán.

Xosé Merelles puxo de manifesto a importancia que ten esta celebración para poñer en valor un “produto galego diferenciado como é o pan de Cea” e tamén as técnicas ancestrais da zona para a súa elaboración. Tamén fixo referencia ao papel estratéxico destas festividades gastronómicas no modelo turístico galego, que aposta pola gastronomía, cultura e natureza.

Tamén salientou que a Xunta ten en marcha varias liñas de traballo para poñer en valor os produtos gastronómicos con iniciativas como o Plan de Sostibilidade Turística Enogastronomía de Galicia deseñado pola Xunta con fondos europeos e que está a incluir accións en máis de 80 concellos galegos que contan cos seus plans de sostibilidade en destino ao redor de produtos gastronómicos.

Ademais do director de Turismo, tamén asistiron o director da Axencia Galega da Calidade Alimentaria, Martín Alemparte, e o delegado territorial da Xunta en Ourense, Manuel Pardo. Trátase dnha xuntanza que reuniu a autoridades, produtores e veciños para salientar a calidade dos produtos agroalimentarios galegos, neste caso, unha marca recoñecida internacionalmente da que o ano pasado se chegaron a producir preto de 400.000 kg, o que supuxo un valor económico de máis dun millón de euros.

Este evento pon de relevo un produto que se elabora segundo as técnicas ancestrais da zona, mediante un laborioso proceso artesanal, e que se coce en fornos de leña, dando como resultado un pan de sabor único e identificador da calidade alimentaria galega e da óptima materia prima da comunidade.

O Pan de Cea é una das tres Indicacións Xeográficas Protexidas de panadaría e repostaría rexistradas na nosa comunidade, xunto coa IXP Pan Galego e a IXP Tarta de Santiago. Unha certificación que sinala que os produtos posúen unha calidade determinada, reputación ou característica que pode atribuírse a unha orixe xeográfica e algunha fase da súa produción ten lugar nunha zona delimitada da que toma o seu nome.

Nos últimos dez anos, a Consellería do Medio Rural concedeu ao Consello Regulador da IXP Pan de Cea, que controla e favorece o elevado nivel de rigorosidade necesario nas tarefas de seguimento das denominacións de calidade, axudas ao funcionamento, control e promoción da IXP. O 2023 foi o ano no que se destinou un maior investimento a esta indicación, con preto de 60.000€.

IXP Pan de Cea

O Pan de Cea elabórase con fariña de trigo, auga potable e sal comestible, ao que se engade para a súa fermentación masa nai. Posúe características comúns cos produtos das IXP Pan Galego, pero ten trazos peculiares que fundamentaron o rexistro dunha indicación propia con anterioridade, no ano 2005.

A obtención do produto consta de sete fases: un amasado dunha hora de forma manual, o tempo de repouso, a división da masa segundo o formato a realizar, o reamasado ou tendas, o enfornado e a cocción e finalmente, a etapa de rever.Todo isto supón un traballo practicamente artesanal de longa duración.

As características principais do Pan de Cea son a súa forma, caracterizada por unha fenda transversal no centro, as súas dúas presentacións posibles (peza ou molete), unha codela grosa de consistencia dura e ríxida, con tendencia a facer láminas e o seu miolo, de textura esponxosa, fibrosa e firme.

A doutora Marisa Crespo é, desde hoxe, Filla Predilecta da provincia, logo do acto solemne onde se lle fixo entrega a esta cardióloga, oriunda de San Cristovo de Cea, do título honorífico con esta distinción institucional outorgada pola Deputación de Ourense. Súmase así a otros recoñecementos institucionais como a Medalla Castelao da Xunta de Galicia (2019); a Medalla de Ouro e Brillantes do Colexio de Médicos de A Coruña (2020); Filla Predilecta do Concello de Cea (2020); Premio ao “Médico Hipocrático” da Sociedade Española de Cardioloxía (2021); Premio “Agora do Orcellón”, promovido por o Instituto de Estudios Carballiñeses, (2021).

O presidente provincial, Luis Menor, recalcou ante o ateigado salón de actos do Centro Cultural Marcos Valcárcel, que “estamos ante unha das persoas con maior prestixio de Ourense, unha eminencia nun ámbito tan especializado como a Cardioloxía” e recalcou que “grazas ao traballo, á traxectoria, á excelencia e a calidade humana e profesional de Marisa, facemos un Ourense máis grande, unha provincia mellor”.

Marisa Crespo agradeceu emocionada o recoñecemento da Deputación, e articulou un discurso centrado nos seus grandes piares: a súa terra, a súa profesión e a súa xente. Lembrou que é natural de Santrós, parroquia de San Martin de Lamas, no concello de Cea, de fama internacional polo seu pan “onde o pan é arte”.

Tivo un recordo para os seus pais Mº Generosa Leiro e Modesto Crespo. “Parecese que os seus nomes dalgunha maneira ensináronnos á miña irmá Maria e a min o camiño da entrega e da discreción. A miña nai mestra, filla de mestres e moi vocacional. No seu obituario díxose dela “que puxo en práctica todas as benaventuranzas. O meu pai, Modesto, industrial madeireiro (que non puido ter estudos superiores) mostrounos a relevancia dos valores: honestidade, afán por aprender e capacidade de gozar coa tarefa diaria. A miña irmá Maria, médico do centro penal de Pereiro Aguiar, un exemplo de compromiso e entrega cos demais”.
Lembrou que a súa primeira escola foi no medio dun monte e sen luz eléctrica, en contacto pleno coa natureza. Logo, interna no colexio carmelitas de Ourense, estudou Medicina en Santiago de Compostela.

No hospital Cristal-Piñor fixo prácticas de medicina coa Dra Pilar Lamela, e o curso rotatorio de 6º medicina no Hospital Santa Maria Nai, co Dr Manolo de Toro, no servizo de Medicina Interna que dirixía o Dr Jose Fernández. Especialista en Cardioloxía na Clínica Puerta de Hierro de Madrid, destacando ao seu mentor Luis Pulpón. Tras apenas 1 ano de traballo en Toledo, como cardiólóga, desde 1993 traballa no CHUAC (A Coruña) , onde dirixe a Unidade de Insuficiencia Cardíaca e Transplante cardíaco.

A importancia do traballo en equipo

Quixo referir Marisa Crespo no seu discurso a importancia do traballo en equipo. “O éxito do programa de transplantes do CHUAC na Coruña é o traballo en equipo. Somos unha cadea, que é tan forte como en máis débil dos seus elos. O noso traballo é dunha enorme complexidade. Non só é necesario que un cirurxián sexa moi experto ou un médico moi traballador e sabio. Nun só transplante traballan moitísimas persoas con diferentes responsabilidades, todas importantes, por sinxelas que parezan. Calquera erro nalgunha delas pode levar ao fracaso e a morte do paciente. De aí a importancia de coidar a todo o equipo”, expilicou, ao tempo que deixou claro que “sen doantes non hai transplantes. E Ourense merece un recoñecemento público por ser unha provincia cunha alta taxa de doazón de órganos para transplante, por encima da media nacional”.

“A Medicina ensinoume moitas cousas, unha delas foi a de tratar de empatizar co paciente, a persoa que sofre. E entender sempre á outra parte, á súa familia, á súa contorna, ás súas circunstancias. Isto é unha aprendizaxe continua. O meu obxectivo resúmoo nunha frase: tratar ao paciente como a min me gustaría ser tratada.
Marisa Crespo agradeceu emocionada o recoñecemento provincial: “Grazas á Deputación de Ourense, na persoa do seu presidente, Luis Menor, que me outorga este recoñecemento que non pode ser máis motivador para min. Agora síntome máis obrigada que nunca a continuar a senda de traballo, investigación e entrega a unha profesión que naceu claramente para axudar aos demais”.

Lecturas do expediente e da laudatio

Logo da lectura do expediente a cargo da instructora do mesmo, a deputada provincial Patricia Torres, o xefe do Servizo de Cardioloxía do CHUAC, José Manuel Vázquez Rodríguez, deu lectura á laudatio da homenaxeada destacando a calidade humana e a excelencia no exercicio da súa profesión da Filla Predilecta da provincia: “Marisa exemplifica de un modo moi preciso a evolución da nosa sociedade ourensana dende as últimas décadas do século XX, dende un medio rural máxico, pero atrasado, ata os contornos sociais mais avanzados do mundo. Ela é una verdadeira embaixadora dos valores galegos de solidariedade, traballo duro e compaixón”. Neste senso, tamén proclamou que a doutora Crespo “é unha profesional de prestixio mundial, que é profundamente ourensana, orgullosa da súa terra, que trata de lla mostrar a toda persoa que coñece. Ela fainos ver que non é incompatible ser cidadá do mundo e ao mesmo tempo ter unhas fortes raíces en Ourense. O moito que ela presume da súa terra é probablemente un motivo mais para ser merecedora de esta homenaxe que hoxe lle fai o pobo de Ourense”.
No ámbito estrictamente profesional, o xefe de Servizo de Cardioloxía do CHUAC deixou patente que “a relevancia da súa presencia internacional significa que a doutora Crespo é recoñecida coma unha das mellores cardiólogas do mundo e é reclamada para formar parte do equipo que elabora as directrices que aplicamos todos os demais cardiólogos para atender aos pacientes con doenzas do corazón”.

Unha traxectoria de excelencia

Marisa Crespo é a xefa de sección da Unidade de Insuficiencia Cardíaca e Transplante Cardíaco do CHUAC, que atende pacientes de toda Galicia e os seus resultados son motivo de orgullo para o Servicio de Cardioloxía do CHUAC. Precisamente, no ano 2017 esta Unidade de Insuficiencia Cardíaca Especializada e Avanzada foi acreditada como excelente pola Sociedad Española de Cardiología.

A doutora Crespo coordina o Grupo de Investigación de IC avanzada e Transplante Cardíaco do Instituto de Investigación Biomédica de A Coruña (INIBIC), sendo tamén a Xefa de Grupo no CHUAC do Centro de Investigación Biomédica en Red Cardiovascular (CIBERCV), do Instituto de Salud Carlos III. Marisa Crespo ten presentado máis de 500 comunicacións en congresos e case 450 artigos científicos publicados nas revistas máis prestixiosas da especialidade, tamén é autora de unha patente e 3 deseños industriais.

Sobre a súa vocación docente, foi profesora asociada de Medicina USC (1996- 2016). profesora asociada de Medicina UDC (2016-2919) e actualmente é profesora titular de Medicina de la Universidade de A Coruña (UDC). A Unidade de Insuficiencia Cardíaca participa na formación MIR do Servizo de Cardioloxía e recibe con frecuencia médicos en formación de outros hospitais de España o de outros países.

Participou tamén na elaboración do currículo de enfermeiras de insuficiencia cardíaca da Sociedade Europea de Cardioloxía e é a directora do curso de enfermeira experta en insuficiencia cardíaca que ten alumnos de toda España. Entre o ano 2018 e 2020 foi Membro do Comité de Educación da Sociedade Europea de Cardioloxía e participou no desenvolvemento do currículo formativo de Cardioloxía, e dicir, en decidir que coñecementos e habilidades ten que ter un cardiólogo en calquera país europeo.

Pero o que realmente acrecenta a figura profesional da doutora Marisa Crespo é o seu importante papel fora de Galicia, tanto nacional como internacional, no campo da Cardioloxía. A nivel nacional é unha cardióloga moi prestixiosa e con moita presenza no campo da insuficiencia cardíaca e o transplante cardíaco. Foi secretaria da sección de transplante cardíaco e mais tarde, en 2003-2006, presidenta da Sección de Insuficiencia cardíaca e transplante da Sociedade Española de Cardioloxía onde puxo en marcha e coordina (dende 2006) o Rexistro Español de tumores post-transplante cardíaco. Asimesmo, foi membro fundador da Sociedade Española de Transplantes.

No panorama internacional, dende o ano 2007 tivo unha participación crecente na Sociedade Internacional de Transplante Cardíaco e Pulmonar (ISHLT por as súas siglas en inglés) na que foi Coordinadora do Consello de Transplante Cardíaco e Insuficiencia Cardíaca Avanzada e membro de varios Comités. Entre 2010 e 2012 foi a primeira persoa española membro da xunta directiva e tamén a única española autora das Guías de Práctica Clínica de esa Sociedade Científica no ano 2010, guías que fan recomendacións de alcance mundial.

Entre 2013 e 2018 foi membro da Xunta Directiva da Asociación de Insuficiencia Cardíaca da Sociedade Europea de Cardioloxía (Heart Failure Association of the ESC), unha sociedade científica de ámbito europeo pero de repercusión mundial, na que coordinou o rexistro europeo de insuficiencia cardíaca e contribuíu a varios fitos dentro da Asociación: trouxo por vez primeira a España, en Sevilla, o Congreso de esta Asociación e a doutora Crespo foi codirectora xunto co Dr. Franz Ruschitzka de Zurich; formouse nese tempo un Comité de insuficiencia cardíaca avanzada e a doutora Crespo foi a Coordinadora do Documento de Posicionamento científico da insuficiencia cardíaca avanzada da Sociedade Europea de Cardioloxía (ESC). En 2021 foi o único profesional español coautor das Guías de Práctica Clínica da Sociedade Europea de Cardioloxía e tamén da actualización levada a cabo o ano pasado.

Mais alá de esta participación nas Sociedades Científicas mais prestixiosas do mundo, Marisa ten sido invitada a dar conferencias nos mellores hospitais como a Clinica Mayo en Rochester (Estados Unidos), o Instituto Karolinska en Suecia, Hospital St. Bartolomew ́s en Londres, Rabin Medical Center en Israel. Tamén é invitada a participar en reunions de Sociedades Científicas por todo o mundo: Alemania, Mexico, Serbia, Croacia, Argentina, Colombia, Chile, Lituania, Emiratos Árabes, China, Singapur.... Dende 2017 e profesora do curso de post-grado de Insuficiencia cardíaca do hospital Universitario de Zurich en Suiza, probablemente o mellor curso do mundo no seu tema.

Aquí podes escoitar o programa especial de COPE O Carballiño, con toda a programación de actividades e as previsións para esta fin de semana panadeira e festiva na vila de Cea.

Consulta aquí dias, horarios e actividades do "Verán programado pola concellería de cultura do concello do Carballiño.

O alcade socialista do Carballiño Francisco Fumega e o que a partir deste xoves dia 4 de xullo pasará a exercer como primeiro Tenetente de Alcalde, o popular Pepe Castro-Gil, presentaron o novo goberno municipal que nace do acordo que fai semanas atrás alcanzaron os grupos municipais de PSOE e Partido Popular para gobernar xuntos O Carballiño.

A alcaldía resérvase as competencias de Economia e Facenda, Orzamentos e Administracción Xeral.

Pepe Castro-Gil (PP) terá Urbanismo, Contratación Administrativa e Deporte.

Alberto Otero (PSOE) Obras, Persoal, Seguridade, Emerxencias, Mobilidade e Rexime Interior.

Diego Fernández (PSOE) Cultura.

Silvia Baranda (PSOE) Servizos Sociais, Sanidade e Vivenda.

Elvira Torres (PP) Medio Ambiente e Termalismo.

Rosa Fuentes (PSOE) Servizos Públicos e Benestar.

Miguel Fernández (PP) Medio Rural.

Diana González ((PP) Emprego, Comercio, Xuventude e Participación Cidadán.

Manolo Dacal (PSOE) Turismo e Industria.

Lorena Castro (PP) Promoción Social e Educación.

A conselleira de Vivenda e Planificación de Infraestruturas da Xunta, María Martínez Allegue, fixo entrega a dúas familias de senllas vivendas de promoción pública en réxime de alugueiro no municipio ourensán do Carballiño. No acto estiveron o delegado territorial da Xunta en Ourense, Manuel Pardo, e o alcalde do Carballiño, Francisco Fumega.

Trátase de dous pisos de 90 e 82,5 metros cadrados situados en dous inmobles da avenida de Compostela, das que son agora beneficiarias dúas familias, que abonarán alugueiros por importe mensual de entre 82 e 89 euros. En ambos casos, son vivendas de segunda transmisión, que foron rehabilitadas e inclúen rocho e praza de garaxe

Estes pisos forman parte dos dous grupos de promoción pública existentes no concello do Carballiño na actualidade, cun total de 109 pisos distribuídos en dous edificios, dos que o Instituto Galego de Vivenda e Solo é propietario de 22 vivendas en total e 21 delas están adxudicadas en réxime de alugueiro e unha mais está en proceso de reforma.

Por outra banda, na zona de A Uceira o IGVS é propietario de 5 vivendas en réxime de alugueiro. Hai que sinalar que existen na actualidade no Rexistro de Demandantes deste concello 13 unidades de convivencia inscritas, requisito imprescindible para poder acceder as vivendas de promoción pública.

Martínez Allegue agradeceu ás novas familias beneficiarias poder compartir o momento da súa entrada no seu novo fogar e reiterou que o acceso á vivenda de calidade en condicións asequibles para á cidadanía “é prioridade absoluta” nesta lexislatura para a Xunta. En materia de alugueiro social, a conselleira destaca que o obxectivo é que “máis familias poidan conseguir este tipo de alugueiro, facilitándolles así o acceso a unha vivenda, algo que sabemos que nestes momentos non é doado para moitas familias, tamén colectivamente, como sociedade”.

A Festa de Exaltación do Pan de Cea celebra esta fin de semana a súa edición número 31, durante a que “poremos a disposición do público máis de 1.500 pezas”. Así o indicou esta mañá o presidente do Consello Regulador da Indicación Xeográfica Protexida (IXP) Pan de Cea, Carlos Rodríguez, durante a presentación da XXXI Festa de Exaltación do Pan de Cea, que terá lugar este 6 e 7 de xullo no Campo da Saleta de San Cristovo de Cea.

Unha rolda de prensa na tamén participaron o deputado provincial de Representación Institucional e presidente do Inorde, Rosendo Fernández; o alcalde de San Cristovo de Cea, José Luís Valladares; e a pregoeira deste ano Lucía Rodríguez. Tanto Fernández como Valladares coincidiron en gabar as calidades deste produto con indicativo de calidade e auguraron un novo éxito de convocatoria para esta exaltación gastronómica.

Rosendo Fernández destacou a importancia dun dos produtos máis senlleiros da provincia e recalcou “a perfecta simbiose entre Cea e o seu pan”. Así, puxo en valor que “Pan de Cea é a primeira Indicación Xeográfica Protexida de pan creada en Europa”, lembrando o feito de que mesmo recibiu antes esta distinción a nivel europeo que a nivel nacional. Así mesmo, destacou o carácter “socializador” deste tipo de festividades.

Pola súa banda, José Luís Valladares agradeceu “o apoio desde sempre” da Deputación de Ourense á Festa de Exaltación do Pan de Cea e puxo en valor tamén o traballo realizado por Carlos Rodríguez á fronte do Consello Regulador. Ademais de convidar a toda a cidadanía a participar nunha festa que xa supera as tres décadas de historia, Valladares destacou que o Pan de Cea comercialízase en todo o mundo: Estados Unidos, Italia, Xapón... e ten moitos seguidores: “sabemos que o comeu ata Fidel Castro e que a raíña Sofía o pedía sempre que tiña ocasión”.

Programa da XXX Festa de Exaltación do Pan de Cea

O presidente do Consello Regulador, Carlos Rodríguez, foi o encargado de presentar o programa definitivo de actividades para esta fin de semana, cuxas liñas xerais foron presentadas a semana pasada na Casa de Galicia de Madrid. Un acto que “é a primeira vez que se celebra en Madrid e que coincidiu coa derradeira participación do presidente da Casa de Galicia en Madrid, Javier Vázquez, a quen lle agradecemos a súa colaboración”, apuntou Rodríguez.

A xornada grande, o domingo 7 de xullo, abrirase cun pasacalles ás 10.00 horas. Ás 12.00 horas terá lugar a recepción de autoridades no Campo da Saleta. A continuación inaugurarase a exposición “O Mosteiro de Oseira visto pola A.F. Potiños”, no centro multiúsos de San Cristovo de Cea. Unha escolma de fotografías realizadas polos integrantes desta asociación fotográfica de O Carballiño durante unha visita realizada hai uns meses ao Mosteiro de Oseira.

Ás 13:00 horas terá lugar o pregón da XXXI Festa de Exaltación do Pan de Cea, que este ano correrá a cargo de Lucía Rodríguez, xornalista e presentadora de televisión. Nada en Castro Caldelas e filla de panadeiros, esta xornalista ourensana ten traballado en distintos medios de comunicación como Onda Cero, Antena 3 Televisión, La Sexta ou TVG, onde traballou en distintos programas nos últimos dez anos e onde presenta actualmente o programa Sabadeando.

Unha vez finalizado pregón terá lugar unha degustación de produtos galegos con distintivo de calidade e a entrega de agasallos dos colaboradores. Feitizo de Pau e a Agrupación Tradicional de Mosende encargaranse da ambientación musical.

Xa ás 14.30 horas terá lugar o tradicional xantar organizado coa degustación de produtos galegos con indicativo de calidade como empanada da IXP Ternera Gallega, polbo á feira e carne ao caldeiro da IXP Ternera Gallega con IXP Pataca de Galicia e IXP Castaña de Galicia, acompañado polo Pan de Cea tamén con IXP. De sobremesa, queixos das DOP de Galicia, acompañados coa IXP Mel de Galicia, Requeixo das Neves con marmelada Nela Biosense, IXP Tarta de Santiago e, finalmente, café. Todo regado con Sidra de IXP Agricultura Ecolóxica de Galicia, viños galegos con Denominación de Orixe e Augardentes e Licores Tradicionais de Galicia. “So temos capacidade para que acudan cincocentas persoas”, concretou Carlos Rodríguez.

Ás 19:00 horas, verbena popular coa actuación de La Noria. Durante toda a xornada, haberá un espazo expositivo no que participarán unha vintena de empresas de diversos sectores. Artesanía e gastronomía daranse cita nesta mostra feiral, que se complementará cun posto institucional onde estarán expostos produtos amparados por distintos Consellos Reguladores agroalimentarios galegos e co stand do Instituto Ourensano de Desenvolvemento Económico (Inorde).

X Ruta dos Fornos e animación musical

O sábado 6 de xullo terá lugar a décima edición da Ruta dos Fornos. “O público poderá visitar os sete fornos antigos gozando de experiencias gastronómicas singulares en cada un deles, pois hainos de máis de 200 anos, que xa non se utilizan para elaborar pan pero poden visitarse para coñecer como se facía o pan daquela”, concretou o presidente do Consello Regulador, que salientou que “o ano pasado superamos o milleiro de visitantes”. A X Ruta do Fornos poderase percorrer entre as 18.30 e as 22.30 horas. Os tickets estarán á venda nos bares e no Concello de Cea durante os próximos días. Son limitados e o propio sábado haberá algúns á venda na Praza Maior de Cea. As propostas gastronómicas nos sete fornos participantes son as seguintes:

A) Forno do Lodairo: pepito de IXP Ternera Gallega con DPO Pemento de Herbón, embutidos tradicionais, viño branco e tinto, auga e cervexa Estrella Galicia
B) Forno do Parapeta: mexillóns ao vapor e á vinagreta, embutidos tradicionais, viño branco e tinto e auga
C) Forno do Santo: empanada da IXP Ternera Gallega, embutidos tradicionais, viño branco e tinto, auga e cervexa Estrella Galicia
D) Forno do Abade: queixos das DOP Tetilla, Arzúa Ulloa e San Simón da Costa, embutidos tradicionais, viño branco e tinto e auga
E) Forno da Cebola: tortilla de IXP Pataca de Galicia, embutidos tradicionais, viño branco e tinto, auga e cervexa Estrella Galicia
F) Forno da Eira: xamón a corte, embutidos tradicionais, viño branco e tinto e auga
G) Forno da Cruz: Tarta de Santiago, Chocolate de Oseira con Pan de Cea, rebanada de Pan de Cea con marmelada extra de kiwi e cenoria nela Gourmet, embutidos tradicionais, viño branco a tinto e auga

A X Ruta dos Fornos contará coa animación musical de Feitizo de Pau (Cea), a agrupación tradicional de San Xurxo de Mosende (O Porriño), Candaira (Castrelo do Val), Os Teimosos de Villasobrosa (Mondariz) e Pandereteiras do Forrollo (Vilar de Vaca, Cartelle). A maiores, o mago Pable Estévez ofrecerá un espectáculo de animación de rúa.

A partir das 19:30 horas, a Praza da Cebola acollerá un concerto da Agrupación de Amigos do Acordeón de Celanova. Finalmente, a Praza Maior de San Cristovo de Cea acollerá a partir das 22:30 horas un concerto do grupo de versións Los Camachuelos, mentres que Mega Disco Móbil LB encargarase do fin de festa a partir da medianoite.

Un millón de pezas

Finalmente, con respecto á comercialización de produtos da IXP Pan de Cea, Carlos Rodríguez indicou que “cando comecei a traballar en Pan de Cea as nosas vendas era de 150.000 pezas ao ano. O ano pasado superamos s 750.000 e agardo chegar ao millón de pezas vendidas antes da miña retirada”. Rodríguez fixo fincapé no “peso da historia e a tradición do Pan de Cea, un pan artesanal cuxa tradición pasa de pais a fillos”.

Na actualidade os fornos tradicionais inscritos no Consello Regulador son trece, os mesmos que o ano pasado. Algúns destes fornos distribúen o 80% da súa produción fóra de Galicia.

Desde o mediodida deste dia 1 de xullo están abertas as novas piscinas públicas promovidas polo concello de Boborás, tras unha inversión de 650.000 euros. A Xunta aportou o 70% da finaciación e a Deputación o 30% restante.

A piscina conta con dous vasos, un para adultos e outro infantil. Unha zona de 2.600 m2 tratatada para non esvarar, e acondicionado con céspede natural.

Unha edificación con tres volumes para bar-cafetería, vestiarios e enfermeiría, e zona de almacén. As instalacións contan cun peche perimetral, nunha zona toda ela urbanizada.

O horario de funcionamento diario durante a época estival será 12:00 a 20:00 horas, e a entrada será gratuíta durante todo o mes de xullo no que andamos.