As Xornadas Monográficas de Arquitectos que se desenvolven na Casa da Cultura do Carballiño comezaron cun recoñecemento ao valor da obra do arquitecto Daniel Vázquez-Gulías como unha parte importante do patrimonio arquitectónico ourensán e galego. Durante dous días, arquitectos, urbanistas, historiadores e deseñadores exporán algunhas das obras máis emblemáticas deste arquitecto nado en Bearíz, na comarca do Carballiño, autor, entre outros, dos proxectos arquitectónicos do balneario do Carballiño ou a igrexa parroquial de Santo Tomé de Maside.

Lucila Vázquez-Gulias, presidenta do Centro Cultural que leva o nome do arquitecto e que organiza estas xornadas, xunto co Centro de Estudios Chamoso Lamas, destacou no acto de presentación deste evento a necesidade de poñer en valor o patrimonio arquitectónico para evitar que desaparezan obras significativas como foron o Hotel Roma de Ourense ou o antigo Hotel Balneario de A Toxa, que foi un dos grandes proxectos de Daniel Vázquez- Gulías. Por iso, asegurou que estas xornadas tiñan como obxectivo concienciar á xente sobre a pervivencia do legado patrimonial e cultural, entre o que se atopa a obra de Daniel Vázquez-Gulías. Asemade, fixo fincapé na intensidade do programa previsto, con dez ponencias, e no feito de que as dúas primeiras actividades do centro cultural se desenvolvesen no Carballiño, cabeceira da comarca na que naceu o arquitecto.

Precisamente, a esta mesma circunstancia se referiu o alcalde do Carballiño, Francisco Fumega, resltando a construccion do Gran Balneario, inaugurado no ano 1900, que impulsou á vila do Carballiño como unha das principias estacións termais de Galicia. De feito, Fumega contrapuxo a burguesía liberal carballiñesa daquel tempo fronte á burguesía conservadora de Mondariz, como un feito salientable da puxanza da vila do Carballiño a comezos do século XX.

Neste mesmo sentido pronunciouse o presidente do Centro de Estudios Chamoso Lamas, Xosé Luis Sobrado, ao referirse á comarca carballiñesa como berce de grandes arquitectos, citando a Juan Cendón Carballal que construiu no século XIX a maioría das fábricas de papel da zona, ou a Lois Monteagudo, nado no Irixo, que no século XVIII acadou un gran renome en Italia e Francia. E xa actualmente, Manuel Gallego Jorreto, Fernando Blanco ou Alfredo Freixedo, entre otros.

O presidente da delegación en Ourense do Colexio de Arquitectos, Alberto de Paula agradeceu ás asociacións e institucións a iniciativa para desenvolver as xornadas e fixo fincapé no feito de que se poidese profundizar na obra de Daniel Vázquez-Gulías e promover a posta en valor da boa arquitectura. Asemade, impartiu a primeira ponencia sobre “La Casa Taboada y el Ourense contemporáneo”.

Finalmente, o secretario xeral de Política Lingüística da Xunta, Valentín García Gómez, disculpou a ausencia do conselleiro de Cultura e resaltou a importancia deste tipo de xornadas para encarrilar o futuro do país, que ten moitas posibilidades. Referiuse aos problemas do planeamento urbanístico, que debe basearse no consenso e na aportación de ideas de todos os factores sociais, e sempre co máximo respecto ao medio ambiente, á xeografía e á historia.

As Xornadas continuarán esta tarde e durante este sábado dia 15, con ponencias e unha mesa redonda de clausura tras da cal actuará Daniel Minimalia.

O Partido Popular do Carballiño "denuncia que o Goberno Municipal Socialista, non tome en consideración a calquera das empresas de construción do noso pobo ou da nosa comarca, para as adxudicacións que fai de forma directa, e fixera nos dous casos que puido facelo desta forma, a adxudicación a unha empresa ourensá".

Engaden os populares que "en febreiro deste ano, adxudicouse de forma directa por 16.857,99€ a obra de muro de contención e beirarrúa en Alberto Vilanova a unha empresa da capital ourensá, e recentemente en setembro deste ano tamén se adxudicou á mesma empresa e polo mesmo procedemento, a obra de acondicionamento de miradoiro no río Arenteiro por 49.900€".

Finalmente, o grupo municipal do Partido Popular manifesta que "toda vez que ata ó de agora as obras directas son ó 100% para a mesma empresa ourensá, 2 de 2, pedimos ao señor alcalde que ten todas as competencias nesta materia, pois ademais ten atribucións de concelleiro de obras, que mire polo ben das empresas situadas na nosa comarca que son as que producen riqueza no noso territorio e son as que xeran emprego entre os nosos veciños".

O Paseo do Arenteiro contará a finais deste mes cun novo mirador e acceso peonil entre o sendeiro e a Avenida do Balneario.

Estará ubicado no remate da rúa Río Avia, moi preto do Balneario. Trátase dunha rúa sen saída e cun gran desnivel sobre o sendeiro da ribeira esquerda do Arenteiro, polo que este proxecto, redactado polo arquitecto municipal, cumpre un dobre obxectivo: por un lado, mellorar a seguridade, e por outro, facilitar o acceso entre esta rúa e o paseo do río, ademáis de embelecer o lugar.

Así, a remodelación consiste na construcción dunha praza-mirador, de 2,70 metros de altura sobre o nivel do paseo do río, e de dúas vías de acceso, unha en escaleira pola marxe dereita, e outra en rampa pola marxe esquerda.

Tanto a praza-mirador, como a escaleira e a rampa irán recubertas de pedra, e terán unha baranda de ferro. Tamén está prevista a colocación de bancos de forxa e madeira.

Para executar esta obra, que ten un custo global duns 50.000 euros, o concello conta cunha subvención de 40.000 euros da Dirección de Turismo da Xunta de Galicia, segundo un convenio asinado o pasado verán entre o alcalde, Francisco Fumega, e a Directora de Turismo, Nava Castro.

Hoxe realizáronse diversas medicións no lugar do emprazamento deste novo mirador, e as obras comezarán de inmediato, calculándose que poderían estar rematadas a finais deste mes de outubro.

Doutra parte, o concello carballiñés comeza esta semana unha actuación de mellora na pista roxa, na Praza do Emigrante do Carballiño.

Esta actuación de reforma -recorda o Partido Popular- formaba parte dos compromisos adquiridos polo grupo de goberno ante o PP, para que os populares facilitasen a aprobación dos orzamentos municipais para o ano 2016.

Máis de 500 deportistas, concretamente, 530, participarán esta fin de semana na VI Ruta Bike&Trail, que organiza a Asociación Deportiva Cultural Os Mosqueteiros no Carballiño. Trátase da maior convocatoria desta proba que, malia a súa curta historia, está acadando un lugar destacado no calendario de eventos deportivos deste tipo en Galicia.

A proba, que foi presentada este mediodía polo concelleiro de Xuventude, Diego Fernández, xunto con tres membros da asociación Os Mosqueteiros, Bruno, Óscar e Javier, consiste nunha ruta de bicicletas de montaña e un trail de montaña, que se desenvolverán o sábado, 8, e o domingo 9, no Carballiño e polos concellos de Boborás e O Irixo.

Así mesmo, por primeira vez, esta proba terá un carácter internacional, ao contar con deportistas procedentes de Portugal. Entre os 530 inscritos hai tamén deportistas de Toledo e Asturias, e de toda Galicia, segundo dixo Bruno, membro da organización, que agradeceu a colaboración dos patrocinadores.

A xornada do sábado, que comeza na praza da Veracruz ás 18,00 h., está destinada a correr (trail), e terá un percorrido de 24 km., mentres que a do domingo será de bike, con dous itinerarios, un curto de 40 km., e outro máis longo de 60 km, que partirá tamén da praza da Veracruz ás 09,30 h., segundo explicou Óscar.

O evento empezará o sábado, día 8, pola tarde coa entrega de dorsais nunha carpa disposta pola organización na praza da Veracruz. Neste mesmo lugar haberá varias tendas relacionadas co deporte e a saúde.

O concelleiro de Xuventude, Diego Fernández, destacou a importancia desta proba que, tras cinco edicións, está xa consolidada no calendario deportivo, sendo un orgullo para O Carballiño. Tamén resaltou o interese que suscita para promover o deporte e a saúde entre a xuventude.

ITINERARIOS

O trail do sábado, recorrerá as rúas da vila e seguirá por: Astureses, Feás, Xuvencos, Godás, Pontarriza, Paseo do Arenteiro, cunha distancia de 24 km. A saída está prevista para as 18,00 h., e a chegada ás 21,00 h.

O bike do domingo, terá dous itinerarios, un curto de 40 km., e outro de 60 km. A ruta irá por Madarnás, Xurenzás, Brués e cara ao Paraño, San Bartolomeu, Cameixa, Moldes, Pontarriza, Miomás, Paseo do Arenteiro e praza da Veracruz. A saída será ás 9,30 e a chegada ás 15,00 h.

Tras rematar a tempada de verán, coa última das quendas a mediados do pasado mes de Setembro, a Residencia de Tempo Libre do Carballiño volve ter actividade a partir desta semana para aloxar aos participantes nesta iniciativa da Xunta de Galicia.

As persoas participantes no programa “Reencontros na Terra”, na súa edición deste ano 2016, aterraron nos aeroportos de Peinador e Lavacolla, en voos procedentes de Arxentina, Brasil, Cuba, México, Uruguai e Venezuela, tras escala en Madrid, para dirixirse directamente á residencia carballiñesa, onde foron recibidos polo presidente en funcións da Xuntas de Galicia, Alberto Núñez Feijóo.

O programa “Reencontros na Terra”, organizado pola Secretaría Xeral da Emigración e desenvolvido coa colaboración da Consellería de Política Social, ten por finalidade favorecer o achegamento de emigrantes galegos e galegas que teñen cumpridos 65 anos á súa terra e ás súas familias. Participan nesta edición un total de 127 persoas procedentes dos seis países citados.

Os grupos máis numerosos son os procedentes de Arxentina (86 persoas) e Venezuela (16 persoas). O resto das persoas participantes son 5 de Brasil, 12 de Uruguai, 6 de Cuba e 2 de México. Preto do 39% das persoas participantes naceron na provincia da Coruña, o 30% na de Pontevedra, o 16% na de Lugo e o 15% restante na provincia de Ourense.

Aínda que todas as persoas participantes teñen cumpridos os 65 anos, condición sine qua non para beneficiárense do programa, a idade media supera amplamente esta cifra, xa que se aproxima aos 72 anos. A finalidade desta iniciativa da Xunta é que as persoas participantes redescubran as súas raíces, tanto de tipo cultural, social, como sobre todo familiar, poñéndose en contacto coa realidade do seu país de orixe e propiciando actividades que posibiliten o coñecemento da Galicia actual, o encontro coas súas propias familias e o intercambio de experiencias entre eles e elas.

As solicitudes foron avaliadas seguindo os criterios de percepción da pensión asistencial por ancianidade do Estado español para o ano 2016 e a idade de quen realizou a solicitude, segundo o baremo descrito na correspondente convocatoria publicada no DOG.

O programa desenvólvese ao longo de tres meses, con dúas fases diferenciadas. A primeira delas consiste nunha estadía de dúas semanas, na Residencia de O Carballiño, en réxime de pensión completa, levando a cabo actividades recreativas e culturais axeitadas ás persoas participantes, e con excursións, en transporte colectivo, a distintos lugares da Comunidade autónoma para un mellor coñecemento da Galicia de hoxe en día, entre os que destaca unha visita a Santiago de Compostela con percorrido pola cidade monumental e recepción institucional.

A segunda fase consiste nunha estadía xunto as súas familias de Galicia, coas que poden permanecer ata completaren un tempo máximo de tres meses. Trátase dun complemento á estadía “oficial” que supón para moitas das persoas beneficiarias unha oportunidade única de volveren a atopar as súas profundas raíces persoais e redescubriren as ligazóns familiares deixadas atrás, pero non por iso esquecidas.