A actuación consistirá no acondicionamento da área de recreo do Punto de Atención á Infancia, que incluirá ademáis á instalación dun módulo de xogo no que se integrarán varios elementos, todos eles adaptados a idades entre os 3 meses e os 3 anos.
Este novo equipamento faráse por medio dunha subvención de 15.000 euros concedida para esta finalidade pola Xunta de Galicia.
O espazo que será obxeto desta intervención será compartido co CEIP de Boborás, polo que desta mellora non só se beneficiarán os cativos do PAI,ata os 3 anos, senón tamén os escolares de Educación Infantil.
Con esta mellora das instalacións na zona escolar, o concello de Boborás "segue apostando por mellorar a calidade de vida dos nosos nenos e nenas, apostando por vida e crianza no rural".
O concelleiro da área municipal de Seguridade, Adolfo Nogueira, garantiu o cumprimento das quendas da Policía Local para cubrir o servizo que teñen encomendado e rexeitou "o uso partidista polo grupo municipal do PP que está a facer dos auxiliares da Policía" que remataron os seus contratos de tempada no mes de outubro.
Nogueira precisou que prorrogar dous meses máis os seus contratos non era viable, xa que precisábase realizar un novo proceso selectivo que levaría facelo un mes, cando menos, e que polo tanto só permitiría incorporar aos auxiliares dúas ou tres semanas como moito ata o 31 de decembro.
Se ben o pasado ano a Xunta aprobou as bases do proceso nas que se contemplaba esta prórroga (catro meses máis dous de prórroga, ata seis meses en total), este ano cambiou de parecer e suprimiu este capítulo, polo que dende a Secretaría do concello obrígase a realizar un novo proceso selectivo, sen outra alternativa. En todo caso, o concelleiro asegurou que estes auxiliares, se ben desempeñaban o seu labor de apoio, non resolvían o problema das quendas do servizo, xa que non están autorizados para sancionar nin realizar outras funcións que só poden facer os axentes de policía.
E, de feito, o resto do ano cúbrense as quendas sen estes auxiliares. Estas aclaracións foron realizadas por Adolfo Nogueira a raíz dun comunicado do Partido Popular que poñía en entredito a política de seguridade do concello e que o concelleiro cualificou de "gratuito, ridículo e cheo de mentiras", e que rexeitou na súa totalidade.
Así, dixo que era o cuarto comunicado do PP referido aos auxiliares de Policía Local e deixou caer a dúbida de si non o facía por un compromiso de partido con algún ou algúns destes auxiliares.
Nogueira dixo que era falso que se solicitara autorización para pedir a prórroga a raíz de que o grupo do PP levara o tema ao pleno municipal do 29 de outubro, como se di no comunicado, cando precisamente esta autorización recibiuse o día anterior. Nogueira apelou á condición de exalcalde do portavoz do grupo municipal do Partido Popular, para recordar "a situación na que deixou á Policía Local, con só 12 axentes para patrullar as rúas".
Precisamente, por iso, dixo que se estaba a traballar para incluir máis prazas na nova Relación de Postos de Traballo que se estaba elaborando, e que nesta RPT tamén se contemplan labores de administración vencelladas coa policía aos axentes que están en segunda actividade, e que o anterior alcalde asignou a postos non relacionados con este servizo. Finalmente, o concelleiro agradeceu a colaboración dos axentes de policía para realizar cambios nas vacacións co obxectivo de cubrir as quendas durante estes meses e garantir as necesidades do servizo.
“O nivel de seguridade cidadá no Carballiño é moi bo, incluso superior a outras poboacións semellantes, e iso debémosllo á Policía Local e tamén á Garda Civil, e considero unha falta de vergoña insistir no contrario, que é o que se infire destes comunicados do principal partido da oposición, danto a entender que O Carballiño está desprotexido, cando non é así”, dixo o responsable da área municipal de Seguridade.
A Agrupación Socialista acudiu, máis unha vez, ao chamado doos veciños e veciñas do Concello, desta volta, da veciñanza de Pazos de Arenteiro. Os socialistas de Boborás amosan a súa total disposición a atender as demandas dos habitantes do muncipio e, nesta ocasión, para por de relevancia a diferenza de trato entre as zonas do lugar.
A pesares do que promociona o goberno do PP de Boborás, non todo en Pazos de Arenteiro é tan ideal e exemplar. O estado da parte de de cima do propio lugar dista moito do pobo turístico que nos quere vender o Alcalde e o seu equipo de goberno. O malo estado no que se atopan os camiños na parte alta do pobo, evidencian que os esforzos están todos concentrados en arranxar as zonas que máis interesan ao goberno municipal, nomeadamente, a zona na que se concentra a casa de turismo rural, que xa fora arranxada e, nembargante, voltou a ser obxecto de actuación e da conseguinte promoción nos medios.
Ao escoitar á veciñanza, os socialistas poden concluír que as súas queixas son máis que razoable e que están a vista de calquera que queira comprobalo in situ. O mal estado dos camiños parcheados con cemento, evidencian as chapuzas das que foron obxecto cando se procedeu á instalación da acometida de saneamento das vivendas. Así mesmo, ante a chegadas dos meses fríos, os veciños e veciñas temen pola súa propia seguridade ao tratarse de camiños intransitables durante o tempo de xeadas e choivas, debido ao grande desnivel que padecen os camiños.
Cómpre recordar que na aldea viven moitas persoas de idade avanzada, na súa maioría xubiladas, que poden ser máis proclives a caídas. Dende o PSOE de Boborás queren lembrar que, en verbas do seu Secretario Local, Javier Lamas: “Hai un par de anos que o Concelleiro de Obras visitou a zona, prometendo arranxar os camiños sen que se volvera a saber del e das súas promesas ata o de agora, incumprindo co seu deber. Os turistas que veñen a Pazos, atópanse con estes camiños e son os propios veciños e veciñas os que lles explican que o “bonito”, o que hai que ver, está na parte de abaixo do lugar”.
Dadas as circunstancias, os socialistas de Boborás consideran intolerable o estado de abandono no que se atopa o pobo e esixen do goberno municipal, o arranxo inmediato dos camiños e que se actúe sempre respectando a igualdade dos veciños e veciñas á hora de acceder aos servizos que presta o municipio.
Asdo: PSOE de Boborás.
O equipo gobernante de Piñor, vén de amosar, de novo, unha actitude que se podería definir como falta de respecto institucional. Como é ben sabido, o vicepresidente da Xunta visitou Piñor en tanto que representante do goberno de todos os galegos e non só dunha parte.
Os concelleiros do grupo municipal socialista son representantes elixidos pola veciñanza de Piñor, nembargante, non foron avisados da visita de Alfonso Rueda. De todos os xeitos, dende o PSOE de Piñor non se amosan sorprendidos ante esta falta notoria de respecto por parte do goberno municipal, nin de que non os avisasen desta visita ou os convidasen a asistir posto que, no transcurso deste ano e medio que levan gobernando, teñen dado mostras sobradas de respectar ben pouco todas as normas do bo goberno.
O escurantismo e opacidade coa que gobernan o Concello comeza a ser a tónica habitual do seu modelo de xestión, exercendo pouca ou nula transparencia e evitando ter que render contas perante a cidadanía ou os seus representantes democraticamente escollidos. O que si sorprende ós socialistas é que, dende a Vicepresidencia da Xunta de Galicia, non se sexa máis coidadoso nestas cuestións do respecto institucional. Tal como destaca o Portavoz do PSOE de Piñor, Francisco José Fraga Civeira: “En democracia, as formas son moi importantes, así coma o respecto pola participación plural”.
É convinte lembrar que, en Piñor, o grupo municipal maioritario é o socialista e que foi apartado polo pacto entre o PP e unha forza pseudo nacionalista ou transversal. Algo inédito en Galicia pois Piñor foi o único municipio onde o PP ten a alcaldía non sendo a forza máis votada. Algo que bota terra enriba do mantra que os dirixentes do PP, entre eles o propio Rueda, repiten elección tras elección: que debe gobernar a lista máis votada. Se cadra, foi esta incoherencia, a que os levou a non convidar ós membros do grupo socialista, posto que deixaría en evidencia ó propio Partido Popular e o que predican. Destaca Fraga Civeira, así mesmo, que: “Foi unha mágoa non poder estar presentes na visita porque aproveitariamos para facer sabedor ó Vicepresidente da Xunta de todas as deficiencias da obra, subvencionada pola súa consellería: o asfaltado dunha finca rústica, repleta de carballos que foron cortados, para construír un aparcamento innecesario.
A desfeita do entorno natural vai ser o que defina esta actuación da Xunta. Ata o de agora, nos anos que leva funcionando o velorio, houbo aparcamento sen maiores inconvenientes e onde antes chegaban con dous voluntarios de protección civil, nos días dos funerais, agora cómpren catro. Teriamos a oportunidade de lle ensinar o mal que quedou o desaugamento das augas pluviais, e o mobiliario de xoguete (postes da luz máis propios dun parque infantil ó que igual que o banco) que se puxeron na parcela.
Tamén lle explicaríamos que esa parcela foi mercada durante o noso mandato coa intención de construír un centro de día residencial para prestarlle servizo ós nosos maiores, algo que si é unha necesidade no concello”. Dende o PSOE de Piñor consideran primordial que a cidadanía coñeza cales eran as prioridades dun equipo gobernante e doutro, namentres o goberno socialista de Piñor, puxo o acento nas necesidades sociais, os actuais gobernantes fan chapuzas innecesarias con nulo respecto polo entorno natural, algo que non cumpría explicarlle ó Vicepresidente da Xunta, posto que salta a vista.
Asdo: Grupo socialista no concello de Piñor.
O deportista José Carballeda Pérez, o naturalista Pablo Rodríguez Oitabén e o doctor Luis Rodríguez Míguez, a título póstumo, recibirán o Galardón da Arenteira 2016.
O xerente do Aparthotel Arenteiro, Uriel Bernardez Cerdeira e o presidente do xurado, Xosé Luis Sobrado, foron os encargados de anunciar o fallo desta quinta edición do premio.
Uriel Bernárdez agradeceu a colaboración dos centros educativos, das asociacións de veciños e culturais e das entidades deportivas que se volcaron máis que nunca para emitir os seus votos. Asemade destacou a unanimidade do xurado na concesión dos galardóns nas dúas modalidades habituais, deportes e cultura, e unha terceira que se concede a título póstumo pola relevancia da personalidade do galardoado na promoción do termalismo no Carballiño.
Os premios Arenteira levan cinco anos recoñecendo ás persoas e entidades que destacan pola súa traxectoria noa ámbitos deportivo, cultural e social do Carballiño e do Ribeiro, e que neste ano recaeu en tres personalidades ben coñecidas por todos, dixo o presidente do xurado, Xosé Luis Sobrado.
Así, resaltou as etapas de José Carballeda como xogador destacado en C.D. Arenteiro, C.D. Ourense e no Pontevedra, entre outros equipos. De Pablo Rodríguez Oitabén sinalou a súa longa taxectoria na defensa e protección da natureza e a súa divulgación, a través do proxecto de bosque Ridimoas, así como a súa faceta profesional no mundo do ensino.
Finalmente, diu conta do Premio Póstumo a Luis Rodríguez Míguez, medalla de ouro do concello do Carballiño, pola súa dedicación á promoción do termalismo a través das Xornadas de Termalismo de Galicia.
O xurado deste galardón está formado por Antonio Míguez Amil, Manuel Amil Otero, Juan José Álvarez González, Xosé Prada Martínez e Xosé Luis Sobrado, como presidente.
Os premios entregaránse no transcurso dun acto que se celebrará o vindeiro dia 25 deste mes de novembro no que andamos.
O grupo municipal do Partido Popular asegura que o concello do Carballiño contaba coa autorización da Dirección Xeral de Emerxencias da Xunta, asi como a correspondente partida orzamentaria para proceder a unha prórroga dos contratos por un periodo de 2 meses.
Os populares considerán que é unha "irresponsabilidade" do concelleiro de seguridade Adolfo Nogueira, e critican a pasividade do alcalde Francisco Fumega.
Para acceder ao comunicado do Partido Popular, prema no arquivo adxunto:
A XIX Festa do Viño Novo de Cabanelas porá a disposición dos visitantes 400 litros de tinto desta derradeira colleita.
O evento presentouse na adega de Emilio Vázquez, que ten máis de 300 anos de antigüidade e que é un claro exemplo da relevancia histórica desta parroquia do Carballiño no cultivo das vides e na elaboración do viño, en especial do viño tinto, que é o principal referente da zona. Precisamente, este adegueiro láiase do paulatino abadono das viñas polo envellecemento e a diminución da poboación da parroquia.
A festa celebrarase o domingo 20 de novembro e ofrecerá un programa de animación musical, coa charanga Castro Vello, e, sobre todo, de degustación dos produtos típicos das romarías: pulpo, carne ao caldeiro, chourizos con cachelos, castañas e viño novo de Cabanelas, que é o principal aliciente.
O xantar está previsto para as 2 da tarde, pero tamén se poderá degustar este mesmo menú a partir das 18,30 h., e ata a noite. O concello do Carballiño porá a disposición das persoas que queiran acudir a este evento e non desexen levar o seu coche, un servizo de microbús gratuito, que sairá da Praza Maior (fronte á casa consistorial) cada hora entre as 11,00 e as 14,00, e entre as 16,00 e 19,00 h.
Ao acto de presentación asistiu o alcalde, Francisco Fumega, así como os concelleiros de Turismo, José Manuel Dacal, e de Medio Rural, Rosario González, ademáis do mantenedor da festa, Delfín Borrajo, e colleiteiros e veciños da parroquia.
Fumega dixo que esta festa era un reclamo para vir a visitar esta parroquia que ten unha das paisaxes máis fermosas do Carballiño e do Ribeiro, e para seguir impulsando o cultivo do viño, que é a mellor forma de contribuir á recuperación de Cabanelas.
Asemade resaltou que hai tres parroquias baixo a denominación de orixe do Ribeiro, e que esta circunstancia debería aproveitarse para promover proxectos de replantación máis dimensionados.
Neste mesmo sentido pronunciáronse José Manuel Dacal e Rosario González, que destacaron o interese dos veciños por manter e impulsar esta festa como unha demostración de convivencia e unha forma de xuntar aos que viven fóra e dar a coñecer os seus recursos aos visitantes.
Por isto, xunto con Delfín Borrajo, animaron a todas as persoas que descoñecen esta zona a achegarse o 20 de novembro e disfrutar dunha xornada de festa, podendo recorrer as adegas e ver a paisaxe multicor de vermellos e dourados e verdes que ofrecen as viñas e os montes neste tempo de outono.
Segundo dixeron os colleiteiros, a produción vinícola esta tempada baixou un 50%, recolléndose en toda a parroquia uns 30.000 litros de viño. Pero, a cambio, aseguraron que a calidade do viño era moi boa. E por esta mesma razón animaron a todos a asistir á festa e degustar este viño novo que, tal e como se amosou durante a presentación, é natural cen por cen, sen engadidos nin misturas.
O documental Sons no Camiño,producido polos alumnos do IES Chamoso Lamas gañou o segundo premio no OUFF Escola, no que participaron máis de 3000 escolares de toda Galicia.
O proxecto foi realizado por un grupo de 17 rapaces e rapazas de 4º da ESO dentro do programa internacional de pedagoxía do cine Cine en Curso, que coordina en Galicia o CGAI (Centro Galego das Artes da Imaxe).
Durante o pasado curso contaron coa presenza no centro do director Ángel Santos e a colaboración dun grupo de profesores para a realización da película que se centra nos pobos e habitantes do Val do Varón.
Na gala de entrega de premios do festival acudiron os alumnos e os profesores, acompañados do cineasta e o director do centro,recollendo o galardón que recoñece o seu traballo. Durante a gala exhibíronse as diferentes películas premiadas.
A peza documental xa poido ser vista en varios festivais internacionais de cine, tanto no noso país como noutros, polo que foi subtitulada polo CGAI a varios idiomas para a súa exhibición.
Páxinas
- « primeira
- ‹ anterior
- …
- 550
- 551
- 552
- 553
- 554
- 555
- 556
- 557
- 558
- …
- seguinte ›
- última »
