O Grupo Provincial Socialista na Deputación de Ourense vén de acadar un acordo “histórico” para un reparto de fondos públicos “xusto e equitativo” entre os concellos da provincia que chegará neste 2024 aos 22,8 millóns de euros. Deste xeito destinaranse 17 millóns de euros a través do plan único de colaboración cos 91 concellos da provincia de menos de 20.000 habitantes e a entidade menor de Berán e 5,8 millóns a través dunha liña de subvencións nominativas a todos estes concellos, seguindo o criterio de número de habitantes.

Durante a comparecencia ante os medios de comunicación, os e as socialistas anunciaron que “estamos ante un acordo histórico, non só para o PSOE, senón para a toda a provincia, pois teremos un reparto xusto e equitativo de 22,8 millóns, o que dará autonomía financeira aos concellos para afrontar novos retos”. Durante a súa intervención, o voceiro do Grupo Provincial Socialista sinalou tamén que “é bo recordar que fai xusto un ano, na modificación que aprobaba o PP co apoio de DO e da deputada non adscrita, os 15 millóns que se repartían non seguían ningún criterio obxectivo, correspondéndolle un 85% a concellos do PP, un 11% aos do PSOE, un 3% aos do BNG e un 1% a outras formacións, algo que logramos corrixir”.

Dende o PSOE ourensán salientan que este acordo “é froito da negociación levada a cabo polo grupo provincial socialista nos orzamentos de 2024 e nos que posibilitamos a aprobación dos mesmos en base a implantación do tan agardado plan único, que habilitaba unha partida para distribuír de forma equitativa e con criterios obxectivos para todos os concellos unha parte significativa deses orzamentos, sen importar a cor política”. Cabe lembrar que na negociación inicial se destinaban 14 millóns de euros e se comprometían, como mínimo outros 3 millóns nesta próxima modificación de crédito.

O voceiro do Grupo Provincial Socialista, Álvaro Vila Araújo, salienta que “unha vez coñecida a liquidación e o remanente de tesourería, trasladámoslle ao presidente a necesidade de falar e negociar o incremento desta achega e a incorporación de novas partidas que considerábamos importantes e máis que necesarias”. Neste senso, afirma que “dos 14 millóns iniciais, máis os 3 comprometidos para o plan CooperOU, engádense agora 5,8 millóns máis en subvencións nominativas a todos e cada un dos 91 concellos da provincia e a entidade menor de Berán”.

O criterio para o reparto destas subvencións nominativas irá en función do número de habitantes. Deste xeito, os concellos de menos de 1.000 habitantes percibirán unha contía de 50.000 euros; os concellos entre 1.000 e 5.000, recibirán 60.000; e os de máis de 5.000 habitantes, correspóndenlles 70.000 euros.

“Nestas negociacións tamén consideramos de vital importancia que se incrementase a partida destinada ao plan provincial de estradas”, explica Vila Araújo, que tamén que “apostamos por un plan de choque para frear o deterioro sistemático da rede viaria provincial, conseguindo que se cheguen aos 3 millóns de euros”. Cabe destacar tamén a inclusión dunha nova partida para axudar a aqueles concellos que teñen conservatorios, cunha achega de 200.000 euros. “Entendemos que os conservatorios son responsabilidade da Xunta e debería ser a que os financie, pero namentres isto non ocorre, ten que ser a Deputación a que axude ao seu funcionamento, de aí esta partida, que solicitamos que se incremente nun futuro”, destaca o voceiro do PSdeG-PSOE na Deputación de Ourense.

Por último, Vila tamén quixo por o foco en que “tamén hai desacordos, especialmente no que se refire a aportación, unha vez máis a Meisa, para pagar débeda e gastos financeiros de exercicios pasados”. Neste senso apunta que a partida que se destina é de 1,4 millóns de euros e que agarda “solucións proximamente, tralos acordos acadados no último pleno, no que se aprobou unha moción socialista que pedía a constitución dunha mesa de traballo cos grupos políticos e entidades para corrixir o funcionamento deste organismo”.

Esta modificación de crédito sairá adiante gracias a abstención do PSdeG-PSOE.

O portavoz do PSdeG-PSOE do Irixo, tenente alcalde e concelleiro de obras, Iago Fariñas, repasa a actualidade municipal e responde ás preguntas da audiencia de COPE O Carballiño.

A Deputación de Ourense pon en marcha o programa “Vive o deporte” para continuar a fomentar a práctica deportiva prioritariamente entre o alumnado ourensán, “conscientes da importancia que ten para o deporte base e, ademais, para o desenvolvemento persoal de cada mozo e moza”, explicou o presidente provincial, Luis Menor na presentación desta iniciativa no Pazo dos Deportes Paco Paz, acompañado director da Área de Cultura e Deporte, Marcos Vázquez, o asesor de Deportes, Diego Enrique Álvarez e representantes de Federacións deportivas.

“Con esta iniciativa -que organizamos en colaboración con federacións, clubs e asociacións deportivas ourensás-, tamén pretendemos inculcar entre o alumnado a infinidade de valores que están ligados á práctica deportiva”, engadiu Luis Menor.

Coa posta en funcionamento desta iniciativa, dotada cun orzamento de 80.000 euros, “conseguimos materializar esa vocación do noso goberno de impulsar e fomentar a práctica deportiva na provincia, achegando actividades aos concellos que, de algún modo, máis precisan a nosa colaboración pola súa situación demográfica”, salientou o presidente provincial.

Desenvolvemento do programa

O programa desenvolverase entres os meses de maio a outubro de 2024 e serán as propias federacións deportivas e clubs os encargados de executalo. Estas actividades lúdicas e formativas desenvolveranse durante as fins de semana de 10.00 a 14.00 horas.

Nesta primeira edición, os deportes que se practicarán serán: tenis de mesa, ximnasia en varias modalidades, hockei, balonmán, patinaxe, baloncesto, fútbol feminino, deportes náuticos, volei, bádminton, tenis, atletismo, escalada e xadrez. Trátase dun programa concibido e deseñado para os escolares da provincia, pero aberto nalgunhas disciplinas deportivas a toda a veciñanza.

As Federacións deportivas promocionarán as actividades nos centros escolares e concellos dos lugares onde se desenvolvan, onde á súa vez poderán inscribirse os interesados.

“Vive o deporte” é “un programa aberto e polo tanto, aqueles concellos que inicialmente non estean neste calendario poderán solicitar a súa integración. Nesta primeira edición, encargámonos de garantir que se chegue a todas as comarcas cunha atención especial cara a aquelas con maior despoboamento”, explicou o presidente da Deputación.

As xornadas serán impartidas prioritariamente en espazos abertos ao público, sempre e cando, as esixencias técnicas deportivas así o permitan, de xeito que sexa unha actividade atractiva da que poidan desfrutar todos, participantes e público en xeral.

A Comisión de Festas do Santo Wintila 2024 ratificou en COPE O Carballiño a decisión avanzada xa a pasada semana nada máis coñecerse a morte repentina do seu Párroco J. Victor Bernárdez. 

Desta maneira, quedan canceladas todas as actividades festivas que estaban programadas para os próximos dias 6,7 e 8 deste mes de abril.

No Podcast podes escoitar a entrevista a Jhonatan Veiga, portavoz da Comisión de Festas do S. Wintila de Punxín.

O Centro Cultural Marcos Valcárcel acolle ata mañá o primeiro Laboratorio de Innovación sobre Residuos, unha iniciativa na que representantes dos sectores social, económico, educativo, de entidades locais, asociacións profesionais e colectivos dos máis diversos ámbitos terán a oportunidade de achegar solucións creativas e innovadoras á xestión dos residuos.

Tal e como explicou o presidente provincial. Luis Menor, na inauguración deste laboratorio, o obxectivo desta iniciativa resúmese nunha simple frase, pero que é toda unha declaración de intencións: “Reducir, separar e recoller de maneira máis eficiente os residuos para evitar custos innecesarios”. Por este motivo, reuniranse todas aquelas achegas creativas e novidosas que realicen os participantes para mellorar e facer máis eficiente a xestión dos residuos e formarán parte dun documento que servirá de guía para as políticas do goberno da institución provincial nesta materia.

Menor abondou en que dentro dun obxectivo global, que afecta a todo o planeta, “agora toca centrarnos na provincia de Ourense e achegar, desde os máis variados sectores que vostedes representan, as solucións máis eficaces para facer da nosa provincia un territorio competitivo e sostible. Solucións apegadas á terra, dimensionadas ao noso entorno, que teñan en conta a realidade ourensá”, explicando así o propósito marcado desde a Deputación de Ourense e agradecéndolle especialmente o seu traballo á área provincial de Medio Ambiente.

Desde 2022, a lei de residuos obriga aos concellos a buscar fórmulas para xestionar separadamente a materia orgánica, poñendo en marcha medidas tales como a concienciación e sensibilización ambiental ou o chamado “pago por xeración”, é dicir, a aplicación dunha taxa en función da cantidade de residuos que se producen, do mesmo xeito que se aplican as taxas polo consumo de auga.

Precisamente co obxectivo de desenvolver novos modelos de xestión adaptados ao territorio ourensán, a Deputación organiza por primeira vez este laboratorio de innovación, concibido como un encontro onde os participantes se reúnen en mesas de traballo, distribuídos segundo os seus perfís profesionais, para achegar as súas ideas sobre como afrontar o reto da xestión dos residuos.

A busca de solucións á xestión dos residuos orgánicos nas zonas rurais e un obxectivo estratéxico, pois nun territorio co elevado índice de dispersión de poboación que ten Ourense, xéranse uns grandes custos económicos para a súa recollida. Cabe apuntar ademais que un recente estudo realizado pola área de Medio Ambiente da Deputación detectou un cambio de hábitos no rural, que se reflicte nunha redución da compostaxe e o consecuente incremento da chamada “bolsa negra”.

Amplio abano de propostas

Máis aló da visión dos técnicos, o laboratorio permitirá recoller un amplo abano de propostas para o tratamento da materia orgánica que se deposita no contedor marrón, pero tamén o encontro estenderá o seu ámbito a todas as fraccións de residuos que se depositan nos contedores gris (resto), amarelo (envases lixeiros), verde (vidro) e azul (cartón e papel). Ademais de quedar reflectidas nun gran mural, as propostas que formulen e se demostren viables e eficientes formarán parte dun documento que servirá de guía para as políticas de goberno da institución provincial en materia de xestión de residuos, tal e como anunciou o presidente da Deputación na inauguración desta mañá.

Este primeiro Laboratorio de Innovación xa tivo o seu prólogo o pasado mes de febreiro, cando un grupo de técnicos da Deputación mantivo unha xuntanza para ensaiar este sistema de traballo en conxunto e co fin de propoñer ideas sobre un novo modelo de xestión dos residuos e implicar á poboación.

Para ver o vídeo sigue a ligazón:

https://www.facebook.com/concello.ocarballino/videos/1432218314088708?lo...