O xerente do Consorcio Galego de Servizos de Igualdade e Benestar, Perfecto Rodríguez, visitou esta as obras da futura residencia municipal de maiores de Piñor, un centro ao que a Xunta destina 1,2M€ e que contará con 41 prazas. No percorrido polas instalacións, o xerente estivo acompañado polo alcalde de Piñor, José Luis González.

Esta actuación forma parte do Plan de Investimentos de 18,5M€ acordado coa Federación Galega de Municipios e Provincias (Fegamp) e co que a Xunta financia unha vintena de proxectos de mellora, reforma ou construción de residencias e centros de día de titularidade municipal. O obxectivo principal deste Plan é dotar aos concellos máis rurais e con menor poboación de servizos de atención aos maiores. No caso de Piñor, o Goberno galego financia o 70% das obras mentres que o resto do investimento corre a cargo da Deputación de Ourense.

O proxecto de Piñor consiste na modificación e ampliación das instalacións que ata agora ocupaban un centro social. Con esta actuación dotarase ao concello de 41 prazas residenciais para persoas maiores. Perfecto Rodríguez destacou que o Plan de Investimentos en centros de atención residencial e diúrna de titularidade municipal supón un impulso histórico da Xunta á rede galega de atención e coidado a maiores. Así mesmo, fixo fincapé en que o Executivo galego financiará parte das obras con fondos europeos Next Generation do Mecanismo de Recuperación e Resiliencia.

Despedimos o mes de febreiro a venres 28 con ambiente de feira no Carballiño e de tertulia en COPE O Carballiño.

Con María Luisa Rodríguez, Fátima Gómez, Sebas Lamazares, Manuel Nogueira e José Antonio Barge, e coordinación de Xan Pinal.

Escóitaa aquí:

A Deputación de Ourense publicou no BOP do 27 de xaneiro as bases reguladoras do Programa de Termalismo Social provincial para 2025, que inclúe a modalidade orientada ás persoas maiores que viven soas, o Programa contra a soidade non desexada.

Desde a área de Benestar da administración provincial, en colaboración cos balnearios da provincia, preténdese configurar aos centros termais como un recurso idóneo para combater situacións de soidade non desexada de persoas residentes na provincia.

O Programa de Termalismo contra a soidade non desexada, que se iniciou no ano 2023 e consolidouse durante o 2024 , iniciará agora o seu terceiro ano en funcionamento e permitiralles ás persoas que participen nel acceder todas as semanas a un balneario para recibir terapias que se recibirá en grupos e durante un período dun mínimo de 6 meses e un máximo de 9.

O Programa inclúe o acceso a servizos termais que se complementarán con actividades grupais de diferente natureza, que aúnen a experiencia social cos beneficios da auga mineromedicinal.

A soidade non desexada, un problema de saúde pública

A Organización Mundial da Saúde (OMS) xa declarou a soidade non desexada como un problema de saúde pública debido aos seus efectos sobre a saúde das persoas, que non só englóbanse no aspecto mental, como a depresión, tamén no físico, xa que pode provocar perda de mobilidade, enfermidades cardiovasculares e mesmo mortalidade temperá.

A soidade non desexada é un problema silencioso que afecta cada vez a máis persoas. Supón unha fonte de sufrimento para as persoas e limita o seu dereito de participación na sociedade; ten consecuencias negativas para a saúde e o benestar e en consecuencia conleva custos sociais e económicos. Por iso, a loita contra a soidade converteuse nun reto para as administracións e a sociedade en xeral.

Acceso ao Programa a través dos concellos

Para o acceso ao Programa de Termalismo contra a soidade non desexada 2025 daráselles prioridade a aqueles concellos que no ano 2024 asinaron convenio coa Deputación de Ourense e que xa tiveron un grupo de persoas que participaron no mesmo, ás que se lles garantirá o acceso directo ao Programa 2025, sendo o obxectivo do Programa a continuidade de devanditos participantes na actividade.

No ano 2024, 16 municipios participaron no programa a través de acordos de colaboración: A Bola, Beariz, Boborás, Carballeda de Avia, Castrelo de Miño, Cenlle, Leiro, Maside, O Carballliño, O Irixo, Piñor de Cea, Punxín San Amaro, Ribadavia, San Cristovo de Cea e Vilamarín.

A administración provincial asinará novamente estes 2025 “convenios de termalismo contra a soidade non desexada” coas administracións locais da provincia interesadas para que estas poidan seguir ofertando a nivel local o Programa termal.

Procedemento

Dado que ao termalismo contra a soidade non desexada as persoas interesadas deben acceder a través dos servizos sociais municipais, o primeiro paso é a comunicación á Área de Benestar da Deputación o interese da entidade local en participar no Programa 2025.

A continuación asinarase un convenio coa administración provincial e a entidade local difundirá o Programa.

Os profesionais dos departamentos de servizos sociais municipais recollerán as demandas de participación dos/as veciños/as interesados/as, para que, se reúnen os requisitos de acceso, formalicen as solicitudes de participación na plataforma electrónica habilitada.

Reserva de praza

As persoas que participaron no Programa en 2024 terán reservada a súa praza para este 2025. A cobertura das prazas dispoñibles para cada grupo realizarase en varias fases, na primeira fase terán acceso directo as persoas que participaron durante o 2024, na segunda fase poderán acceder, se hai prazas vacantes, as persoas en situación de “soidade non desexada” do municipio, e, nunha terceira fase, se seguise habendo prazas, podería autorizarse a participación das persoas interesadas que non se atopen nesta situación.

Para xestionar o acceso das persoas solicitantes as entidades locais deben levar un rexistro cronolóxico de persoas interesadas en participar no Programa, que lle facilitará a posterior tramitación das solicitudes.

Para todas as persoas interesadas a Deputación de Ourense habilitou o teléfono de información 988317773 con horario de atención de 8:30 a 14:30.

--

O Grupo Provincial Socialista presenta unha iniciativa na Deputación para que a adopción dun plan provincial de desenvolvemento do sector mineiro e facer de Ourense un referente nas cadeas de subministro globais en tecnoloxías verdes. “A provincia ten un notable potencial mineiro, con importantes xacementos probados de minerais industriais e metálicos, pero tamén de terras raras, que cunha acaída estratexia e a través da adopción de estratexias extractivas innovadoras e respectuosas da entorna poden aportar prosperidade e benestar no presente e para as xeracións futuras”, sostén Aurentino Alonso, deputado provincial socialista por Valdeorras.

Segundo este, “a tradición mineira de Ourense remóntase á dominación romana, contando na actualidade con activos suficientes para posicionarnos coma referentes da minería sustentable e mesmo actor global destacando en tecnoloxías verdes”. Mesmo se unha estratexia clara, con Ourense á fronte Galicia aporta un 8,2% da produción mineira española, cunha facturación anual de 280 millóns de euros e xerando na provincia uns 2.500 postos directos de traballo. “Á luz de estimacións recentes e se tomar en consideración a pléiade de recursos dispoñibles, cal non será o potencial do sector se tan só Ourense podería cubrir o 15% da demanda europea de litio para baterías?”, pregúntase Alonso, para quen a Deputación debe “ordenar” e “dinamizar” o sector.

Para o deputado socialista, “non podemos resignarnos e ver como a provincia esmorece lentamente, centrándonos nos tradicionais eidos onde a Deputación incide, sendo imperativo e urxente avanzar cara novas pistas e horizontes de salvación para a nosa provincia á luz das nosas características e activos, sendo a minería unha panca con moito potencial por desenvolver”. Neste senso, conscientes do atractivo do sector, como demostra a multiplicación de licencias de exploración e explotación outorgadas pola Xunta, os socialistas tamén reclaman a “posta en marcha de mecanismos de coordinación para a participación de Deputación, concellos e colectivos afectados polos proxectos en curso en aras de minimizar impactos e maximizar retornos para a comunidade”.

Minería sustentable

Para a elaboración desta iniciativa, o Grupo Provincial Socialista contou co asesoramento do economista carballiñés Adrián Godás quen, afincado en Sofía (Bulgaria), está especializado na análise de mercados de materias primas e empresas mineiras, consultor habitual de institucións multilaterais e gobernos. Godás subliña “a capacidade actual para levar a cabo prácticas sustentables de minería, que permiten unha coexistencia harmónica entre actividade extractiva e preservación do patrimonio natural ourensán”.

O carballiñés evoca o “proxecto Barroso”, en Portugal, onde se asenta unha gran mina de precisión litio, cun sistema de xestión hídrico pechado, que reduce ao mínimo o consumo, cun deseño que minimiza o impacto visual, limita as explosión e non traballa de noite para non alterar os ciclos da fauna. Godás, autor de Bajo tierra (2024, Arpa), alude mesmo ao desenvolvemento de biomateriais a partires de refugallos mineiros que rexeneran chans degradados.

“Ao integrar tecnoloxías limpas, transparencia na xestión dos recursos e un diálogo acentuado coas comunidades locais e actores concernidos, Ourense pode requintar un modelo aplicable a outras rexións con desafíos similares, posicionando a provincia coma laboratorio vivo da minería do século XXI”, apunta Aurentino Alonso. Para o socialista, “Ourense encarna un paradigma onde a minería pode ser compatible coa sustentabilidade e, amais, actuar coma vector de desenvolvemento e prosperidade, catalizador de innovación e cohesión territorial, para o cal a Deputación está chamada a dotarse dun plan con obxectivos capaz de desenvolver o sector e mesmo promover a atracción de investimentos e captación de fondos”.

A recente edición da "Feira do Stock" organizada polo Centro Comercial Aberto (CCA) do Carballiño concluíu cun notable éxito, xerando un volume de negocio arredor dos 38.000 euros.

Este evento, que contou coa colaboración do Concello do Carballiño e o cofinanciamento da Xunta de Galicia, consolidouse como unha cita imprescindible para comerciantes e consumidores da comarca. Segundo as enquisas realizadas entre os 14 establecementos participantes, o 90% deles mostráronse satisfeitos coas vendas obtidas durante a feira, e a totalidade expresou o seu interese en participar en futuras edicións. A pesar das condicións climáticas durante a fin de semana, a afluencia de público foi constante, o que demostra a importancia deste tipo de iniciativas para dinamizar o comercio local.

Un dos momentos máis destacados do evento foi o sorteo presencial dun vale de compra por valor e 100 euros, que atraeu por centos de persoas á carpa instalada na Praza Maior. A afortunada gañadora, María Jesús Ledo, realizou varias compras nos comercios participantes da feira e, tras ser premiada, dispuxo da mesma xornada para trocar o seu premio nas distintas casetas participantes, levándose consigo unha gran cantidade de produtos.

O éxito desta edición motivou ao CCA do Carballiño a comezar os preparativos para a próxima "Feira do Stock" de verán, prevista para agosto. Desde a organización, agradécese especialmente o apoio do Concello, así como o cofinanciamento da Xunta de Galicia.

Esta colaboración entre institucións e comerciantes locais reforza o compromiso co desenvolvemento económico da rexión e a promoción do comercio de proximidade, ofrecendo ás consumidores oportunidades únicas para adquirir produtos de calidade a prezos reducidos.

A Consellería de Medio Ambiente e Cambio Climático vai financiar a reforma integral da Estación Depuradora de Augas Residuais (EDAR) de Cea, un proxecto que precisará dunha aportación económica de 788.000 euros.

Doutra parte, a Deputación Provincial achegará ao concello de San Cristovo de Cea unha achega de 180.00 euros para executar a obra de separación de augas pluviais e fecais nas  rúas da vila de Cea.

Escoita aquí a entrevista ao alcalde de San Cristovo de Cea, José Luis Valladares:

A Deputación de Ourense, en colaboración coa Xunta de Galicia, avanza nun programa piloto para dotar con 16 brigadas a catro mancomunidades da provincia na loita contra os lumes. Esta iniciativa enmárcase dentro do protocolo de colaboración entre a Consellería do Medio Rural e a Deputación de Ourense, -sendo a ourensá a primeira deputación galega en firmar este tipo de convenios-, para realizar actuacións que teñen como obxectivo a prevención e a defensa contra os incendios forestais.

O deputado de Medio Ambiente, José María Lago, participou nunha reunión de traballo para avanzar neste proxecto, hoxe na delegación territorial da Xunta de Galicia en Ourense. Participaron tamén o director xeral de Defensa do Monte, Manuel Rodríguez, acompañado polo delegado territorial da Xunta en Ourense, Manuel Pardo, os presidentes das mancomunidades de Verín, José Luis Suárez; do Carballiño, Fernando Rodríguez; de Terra de Celanova, Jaime Sousa; e do Ribeiro, Francisco José Fernández.

O programa piloto permitirá que estas mancomunidades conten con 16 brigadas para a loita contra os incendios forestais. A Deputación de Ourense consolida así o compromiso de colaboración coa Xunta na prevención de lumes, clave para a conservación do medio e a seguridade das persoas e dos bens.

O protocolo consta de seis actuacións relacionadas coa adquisición de tractores rozadoiras e maquinaria motoniveladora; coa cesión de maquinaria e a aportación de máquinas multifunción; coa formación do persoal dos concellos e mancomunidades no emprego destas ferramentas, a través do Centro Integral de Loita contra o Lume situado no municipio de Toén; e co desenvolvemento do programa piloto de dotación de brigadas.

Estas brigadas, das cales se destinarían catro para cada mancomunidade con cinco integrantes en cada unha, levarán a cabo tarefas de prevención e, no caso de ser requiridos polo distrito forestal, poderán actuar no caso de extinción dun incendio forestal. A disposición destas brigadas sería por unha duración de seis meses, segundo se contemplou dentro do protocolo de colaboración entre a Consellería do Medio Rural e a Deputación de Ourense.

Así, mediante este protocolo fomentaranse os traballos de roza de matogueira para xestionar a biomasa. O obxectivo é realizar actuacións conxuntas dirixidas ao mantemento e a conservación das infraestruturas preventivas e da contorna agroforestal no territorio provincial.

Un convenio pioneiro

Con anterioridade, en novembro de 2023, a colaboración entre a Deputación e Medio Rural plasmouse na entrega de tractores e apeiros para a prevención de lumes forestais a 13 concellos da provincia. Esta liña de colaboración supuxo por aquel entón un investimento conxunto de 1,3 millóns de euros.

En febreiro de 2024, este protocolo de colaboración reforzouse cunha nova achega que acadou o orzamento máximo de 3,8 millóns de euros, triplicando o importe do anterior acordo para o mantemento e a conservación das infraestruturas preventivas. De estes, a Deputación aporta 1,3 millóns e a Xunta o importe restante.

--

Maria Luisa Rodríguez, José Antonio Barge, Fátima Gómez, Manuel Nogueira e Sebas Lamazares, formaron o quinteto deste venres 21 de febreiro na Tertulia de COPE O Carballiño, que un venres máis presentou Xan Pinal.

Escóitaa aquí: