O presidente da Xunta, Alfonso Rueda, destacou hoxe en Leiro que Galicia levou a cabo nos últimos anos un proxecto pioneiro en Europa para ampliar a rede de telefonía móbil e dotar de cobertura e internet a 210 núcleos illados do rural nos que residen máis de 5.000 persoas. “Imos garantir o acceso aos servizos básicos ata onde permita a técnica e as telecomunicacións son hoxe en día un servizo fundamental”, indicou.

Durante unha visita a nova torre de telefonía instalada no concello ourensano de Leiro -que permite dar cobertura a 104 veciños dos núcleos de Paredes e Sá-, salientou o investimento de 10,6 millóns de euros para construír 68 torres en 48 concellos e executar a acometida eléctrica necesaria para achegar o servizo aos cidadáns. Unhas actuacións que mellorarán a cobertura nun total de 55 municipios galegos.

A extensión da rede de telefonía móbil en Galicia foi posible grazas a colaboración entre a Xunta, a Federación Galega de Municipios e Provincias (Fegamp) e Vodafone España. En concreto, os concellos foron os encargados de ceder terreos para construír as torres e identificar os núcleos con problemas de cobertura; a entidade pública Retegal encargouse de habilitar as torres necesarias e Vodafone de dotar a rede de servizo.

O rural, un espazo de oportunidades

Esta iniciativa enmárcase na aposta da Xunta por consolidar o rural galego coma un espazo de oportunidades no que vivir, investir e traballar e garantir a igualdade no acceso aos servizos básicos en todo o territorio. “Isto é construír Galicia. Galicia Calidade tamén é ter servizos básicos en calquera sitio e garantir a igualdade entre os cidadáns”, indicou tras asegurar que a mellora das telecomunicacións permitirá asentar poboación no rural e aproveitar novas oportunidades como pode ser “atraer a nómadas dixitais”.

Nesta liña, Rueda lembrou que o Executivo autonómico leva anos reclamando ao Goberno central que a telefonía móbil sexa considerada un servizo universal das telecomunicacións. Ante esta falta de recoñecemento polo Estado -que é quen ten as competencias nesta materia-, a Xunta optou por solicitar á Comisión Europea permiso para poder ampliar a rede de telefonía móbil na comunidade e solucionar os problemas que estaban a vivir moitos veciños de zonas máis illadas. A institución europea aprobou a solicitude para levar a cabo esta iniciativa e incorporouna como exemplo para o resto de Estados membros nas novas Directrices para axudas estatais de redes de banda larga que se aprobaron no 2023. Galicia foi a primeira comunidade en recibir unha liña de axudas europea para ampliar a súa rede de telefonía.

O alcalde de Maside, José Manuel Iglesias, respondeu en directo ás preguntas formuladas pola audiencia de COPE O Carballiño, ademáis, aproveitou a súa intervención nesta emisora de radio para anunciar as actuacións que este ano o concello masidao levará a cabo financiadas a través do plan CooperOU.

Escoitao aquí:

O presidente da Deputación de Ourense, Luis Menor, mantivo un encontro de traballo no Pazo Provincial coa presidenta, vicepresidente e co membro da xunta directiva da Asociación da Ruta do Viño do Ribeiro, Mariluz Expósito, Avelino Pazos e Jonatán Pousada, respectivamente, para reforzar a colaboración da institución provincial na promoción do viño da Denominación de Orixe más antiga de Galicia.

Neste sentido, Luis Menor destacou a importancia do sector vitivinícola na provincia de Ourense -con catro das cinco Denominacións de Orixe de Galicia-, e, especialmente, dos recursos enoturísticos do Ribeiro como un dos “principais activos de primeira orde” na nosa provincia.

A colaboración da Deputación con esta Ruta trata de poñer en valor os numerosos recursos asociados á mesma como son a natureza, a historia, o patrimonio e a enogastronomía que están tan “vencellados ao traballo vitivinícola” tan representativo desta comarca, sinalou o presidente provincial.

O presidente da Deputación de Ourense, Luis Menor, mantivo unha reunión de traballo co novo presidente do Consello Regulador da IXP Pan de Cea, Juan Luis Calviño e co tenente de alcalde do Concello de San Cristovo de Cea, José Dalama, nun encontro no que se abordou a situación actual deste produto emblemático da provincia e as liñas de colaboración institucional para seguir impulsando a súa promoción e valorización.

Durante a reunión, Menor ensalzou a calidade do Pan de Cea como “un dos grandes emblemas gastronómicos da provincia de Ourense”, destacando que na actualidade son xa 15 os fornos adheridos á Indicación Xeográfica Protexida, cunha produción que está a piques de acadar o millón de quilos anuais, un dato que evidencia a boa saúde do sector e a consolidación da marca.

O presidente provincial subliñou tamén a proxección exterior do produto, sinalando que o Pan de Cea “non só é un referente en Galicia, senón que cada vez ten maior presenza fóra da comunidade e comeza a ser recoñecido e valorado en Europa”, grazas á súa participación en feiras e eventos internacionais, que contribúen a reforzar a imaxe da provincia como destino enogastronómico de calidade.

Menor reiterou o compromiso da Deputación co sector agroalimentario e cos produtos amparados por selos de calidade, poñendo en valor o seu papel como motor económico, xerador de emprego e elemento clave para a promoción do territorio.

Pola súa banda, o novo presidente do Consello Regulador da IXP Pan de Cea agradeceu o apoio constante da Deputación de Ourense ao longo dos anos, destacando a importancia da colaboración institucional para a defensa, promoción e internacionalización dun produto que forma parte da identidade cultural e gastronómica da provincia.

Fátima Gómez e Manuel Nogueira, xunto a Xan Pinal e a participación dos oíntes de COPE O Carballiño protagonizan a tertulia deste venres dia 23 de xaneiro de 2026.

Escóitaa aquí:

O Concello do Carballiño impulsa unha estratexia pioneira para consolidarse como destino gastronómico de referencia co polbo como elemento central e elemento identitario. Trátase dunha aposta por poñer en valor o produto estrela do municipio, ligado á historia, cultura e economía local, da man das pulpeiras e pulpeiros, embaixadores dun oficio transmitido de xeración en xeración.

O concelleiro de Turismo, Manuel Dacal, pon en valor a iniciativa, “un paso máis para reforzar o noso modelo turístico, que xa nos converteu na primeira localidade máis visitada da provincia despois da cidade”. O edil detalla o proxecto, que consistirá na elaboración dunha estratexia de comunicación dixital orientada a mellorar o coñecemento, a percepción e a proxección do destino nun contexto turístico cada vez máis hiperconectado. “O servizo permitirá definir unha folla de ruta clara na promoción do noso municipio”, apunta Dacal.

Por outra banda, o Concello tamén visibilizará o labor das pulpeiras e pulpeiros co obxectivo de recoñecer e promocionar un oficio fundamental para a dinamización económica e social do municipio. A través da colaboración directa co colectivo, lanzarase un proxecto piloto no que participarán as dez empresas máis destacadas vinculadas ao polbo. Entre outras actividades, está prevista a promoción do colectivo e a organización de accións de recoñecemento profesional, así como a difusión do oficio, das receitas e doutros elementos do patrimonio material e inmaterial asociados ao polbo.

Plan de sostibilidade turística

Cun investimento próximo aos 75.000 euros, o Concello reafirma o seu compromiso cun modelo de desenvolvemento turístico sostible, baseado nos recursos propios, na identidade local e no recoñecemento das persoas que fan posible que o polbo sexa moito máis ca un produto gastronómico: un sinal de identidade e un motor de futuro para o municipio.

Estas actuacións enmárcanse no Plan de sostibilidade turística do Carballiño e a gastronomía do polbo, que conta cun orzamento dun millón de euros financiado polos fondos europeos NextGenerationEU no marco do Plan de Recuperación, Transformación e Resiliencia, a través do convenio entre a Axencia de Turismo de Galicia e o Concello.

O Concello do Carballiño colabora no Festival Máxico San Xoán Bosco, unha cita moi especial que reunirá na vila a asociacións de magos de Ourense, Lugo e Portugal do 30 de xaneiro ao 1 de febreiro.

“Este ano continuamos co modelo exitoso das últimas edicións, que ofrece confraternización e tamén formación e obradoiros para os máis cativos”, detallou esta mañá Diego Fernández, concelleiro de Cultura, durante a presentación do evento.

O edil enxalzou o traballo realizado pola organización do festival, que xa supera os dez anos de historia. “Facemos un chamamento á poboación para que se achegue e desfrute das interesantes propostas que nos teñen preparadas”, engadiu.

Os impulsores do festival, Martín Domínguez (Le Grand Martin) e Santiago Cristóbal (Mago Ninou), puxeron en valor o encontro, que celebra ao patrón dos magos, San Juan Bosco, ao mesmo tempo que divulga e achega a maxia á poboación.

Nese sentido, puxeron en valor os beneficios da maxia para persoas de todas as idades e, en especial, para os máis pequenos. “Fomenta a creatividade, cultiva o pensamento crítico e matemático… É unha afección moi boa nun momento de saturación e sobreinformación como o actual”, resaltou Domínguez. “A maxia só funciona en comunidade, cando hai polo menos dúas persoas, polo que fomenta a socialización dos cativos”, apuntou Cristóbal.

Os organizadores agardan que o obradoiro infantil sexa un éxito de participación, como o foi no 2025. “É unha boa maneira de introducilos neste mundo e tamén de educalos como espectadores”, engadiu Cristóbal. A actividade levarase a cabo o sábado, día 31, de 16,30 a 18,00 horas no hotel O Xardín. As inscricións custan 15 euros e pódense formalizar a través do teléfono 607 248 799.

Galas e conferencia de Donald Lehn

O festival comeza o venres 30 de xaneiro ás 19,00 horas cunha misa na Igrexa da Veracruz na honra de San Juan Bosco, patrón dos magos. A partir das 20,30 horas, o café bar Lérida acollerá a Gala de apertura, na que participarán Magaldara, Mago Alvart e Mago Albert. “Son tres compañeiros do Ribeiro”, destacou Domínguez.

O sábado comezará co obradoiro de maxia infantil no hotel O Xardín, seguido da Gala familiar. “Estaremos Abel El Mago, Mago Chirleta e eu, Mago Ninou. A idea é pasalo ben e divertirnos en compañía de pequenos e maiores”, detallou Cristóbal. Xa pola noite, ás 00,00 horas, O Casino será o escenario da Gala hora máxica, na que participarán O Gran Mago, Guto e Aris Villarino.

O domingo, último día do festival, arrancará coa conferencia de Donald Lehn, máis coñecido como “Malo malísimo”. “É especialista en maxia de rúa e malabares, foi director da escola de circo de Madrid… é unha persoa con moitísima experiencia. A súa conferencia axúdanos a seguir formándonos”, apuntou Cristóbal. De feito, é unha actividade dirixida unicamente para magos e magas. As inscricións teñen un custo de 20 euros e pódense realizar a través do teléfono 690 766 208.

Despois do encontro con “Malo malísimo” levarase a cabo o tradicional xantar de confraternización, no que os asistentes desfrutarán dun cocido “máxico”. “Normalmente ao acabar de comer facemos un pouco de maxia para prepararnos para a gala final”, detallou Domínguez. Aquelas persoas que queiran inscribirse pódeno facer a través do 690 766 208.

A Gala de clausura porá o broche final ao festival no Auditorio Municipal. A partir das 18,00 horas, o público poderá desfrutar dos espectáculos do Mago Cris, O Mago de Boina e Nami, e Malo malísimo. “Estará presentada por David Méndez, un dos mellores magos de Galicia, é todo un luxo telo aquí no Carballiño”, asegurou Domínguez.

Os deputados do Grupo Popular Noelia Pérez e Argimiro Marnotes destacaron hoxe o investimento de case 700.000 euros no concello de San Cristovo de Cea a través do Plan Hurbe, impulsado pola Xunta de Galicia, para a realización de melloras de humanización en varias rúas do casco histórico deste municipio.

Nunha visita realizada en compañía do alcalde de San Cristovo de Cea, Jose Luis Valladares, e co concelleiro de Turismo Turismo, Promoción Económica e Novas Tecnoloxías, José Dalama, os deputados populares destacaron o bo ritmo dos traballos e a importancia das intervencións que se están levando a cabo dentro do Plan Hurbe para mellorar espazos públicos e a calidade de vida da veciñanza. ““Estamos ante unhas obras moi necesarias, que permiten recuperar o corazón desta vila e adaptalo ás necesidades actuais dos veciños”, sinalou Argimiro Marnotes.

Estes traballos, que supoñen un investimento conxunto próximo aos 700.000 euros, inclúen a renovación do pavimento de varias rúas, a mellora da rede de saneamento e o soterramento do cableado aéreo de electricidade, telecomunicacións e alumeado público. O importe destas obras dentro do Plan Hurbe é financiado nun 70 por cento pola Xunta, mentres que o Concello aporta o 30 por cento restante.

REVITALIZACIÓN

Noelia Pérez puxo en valor o Plan Hurbe como “unha ferramenta clave para a revitalización das vilas galegas, a través do que a Xunta aposta por un urbanismo pensado para as persoas, que mellora a accesibilidade, impulsa a economía local e axuda a fixar poboación no interior de Galicia”.

Neste sentido, os deputados destacaron o impacto directo que esta actuación ten para o comercio, a hostalería e o turismo local, en especial no caso do concello de San Cristovo de Cea pola súa localización na Vía da Prata e pola súa proximidade ao Mosteiro de Oseira. “Investir en espazos públicos de calidade é tamén investir en oportunidades para os concellos rurais”, manifestaron.

Durante os meses de maio e outubro do pasado ano, os albergues de Cea e Oseira rexistraron máis de 4.400 persoas aloxadas, unha cifra que reflicte a alta capacidade de atracción desta zona e o bo funcionamento destas infraestruturas. “Estes datos poñen de manifesto a importancia do Camiño de Santiago e do turismo vencellado ao patrimonio, a natureza e a hospitalidade, así como o impacto positivo que ten na economía local e na proxección de Cea e Oseira como destinos vivos e dinámicos”, sinalou Noelia Pérez.