O bar Centro de Beariz acolleu esta tarde o Congreso Local do PP nesta localidade. A única candidatura presentada foi a liderada por Manuel Prado, que acadou o 100% de apoio dos votos emitidos polos compromisarios participantes neste proceso de elección.

O presidente local electo, tamén alcalde da localidade, despois de agradecer a confianza depositada na súa candidatura e de facer un balance da súa xestión en Beariz, recalcou que “o noso obxectivo irrenunciable para os vindeiros catro anos é o de fixar poboación no municipio. Para elo, centrarémonos en catro piares fundamentais: potenciar a residencia da terceira idade e o emprego feminino a través da dependencia; impulsar o parque empresarial; mellorar e diversificar a productividade agraria de Beariz; e, por último, crear unha brigada municipal de obras dando así saída aos ingresos acadados pola explotación do parque eólico”, explicou Manuel Prado.

O encargado de clausurar o Congreso Local de Beariz foi o presidente provincial, Manuel Baltar, quen aplaudiu as propostas de futuro expostas polo presidente local e abogou “polo compromiso constante das administracións locais de velar polos intereses e necesidades dos veciños. E aquí entra en xogo o factor clave da cooperación para loitar entre todos por este obxectivo”.

O PSdeG reclama ao Goberno de Marnotes que tome medidas ante "os numerosos roubos que se están a producir en establecementos comerciais e empresas da vila e que supoñen un gran problema a engadir aos que xa de por sí padece este sector na nosa vila".

 Subliñan que  "os veciños e veciñas do Carballiño, aínda teñen fresco na memoria cando o señor alcalde se apuntaba en roldas de prensa o tanto dunha suposta reducción da delincuencia e se preguntan agora se non sería o normal que, por unha vez, este señor asumira a súa responsabilidade e se deixara de tentar enganarnos a todos con patrañas de todo punto incribles".

Engaden dende o PSDG que "os comerciantes deste pobo aínda agardan por unha resposta ás súas demandas, todas elas moi razoables, para axudar a loitar contra a lacra que supón esta xeira de roubos que están a sufrir".

Consideran que, a primeira e imprescindible solución, ante a inseguridade que están a xerar os roubos sería necesario dotar á Policía Local de mais axentes, e afirman que " a  plantilla actual da Policía Local é escasa, e a pesar do seu esforzo,o certo é que non hai suficientes axentes para realizar máis horas de vixilancia. Por iso, consideramos que a solución pasaría por incrementar o número de axentes".

 Na mesma liña, o Concello debería adoptar outras medidas que beneficien a seguridade dos cidadáns,  "como mellorar o alumeado nas rúas, que é moi deficiente en boa parte delas, por culpa de medidas de suposto aforro por parte dun goberno que non repara en gastar 50.000 euros nunha pista de padel ou 70.000 euros nun só ano en avogados".  

Por elo, os socialistas esixen a Marnotes "que adopte medidas para evitar a inseguridade que actualmente sofren os cidadáns da vila, xa que este problema non se pode deixar pasar, como tenta facer o rexedor, e require dunha solución urxente".

O Carballiño volverá estar representado nas "Marchas da Dignidade" que se convocan para este sábado dia 29 de Novembro. Se no pasado mes de Marzo a convocatoria foi unitaria, en Madrid, as organizadas para este sábado que ven teñen carácter autonómico, a galega será en Santiago de Compostela.

A Plataforma carballiñesa organiza o desplazamento en autocares que sairán ás 9,30 horas dende a Veracruz a un prezo de 6,50 euros ida e volta para quenes reserven praza con antelación.

"Nos Somos a Dignidade, pedimos pan, teito e traballo para todos, ningúen quere vivir da caridade, hai recursos suficientes si se reparten con xustiza para que toda persoa dispoña deses tres mínimos, se os sindicatos e partidos maioritarios non se moven ou están cos poderosos, os cidadáns de a pe defenderémos os nosos dereitos", proclaman.

As Comunidades afectadas son aquelas que na época franquista fixeron convenios e consorcios para a reforestación dos montes. É o caso da Comunidade de Comuneiros do monte veciñal en man común do Testeiro, no municipio do Irixo, que agrupa a comuneiros dos pobos de Carballeda, Subirol e Munín.

Veñen de manifestarse para demandar da Xunta que "que nos aclare cómo se van facer esas liquidacións, porque non sabemos nada, so que aquelas comunidades que non atendan esas liquidacións en agosto de 2016 estarán obrigadas a facer contratos con empresas forestais para ceder a xestión dos montes, na consellería dinnos que a lei non se vai aplicar, pero eso non ten moito sentido", manifestan.

Manteñen dende estas Comunidades de Comuneiros que "as supostas débedas deben ser eliminadas por falsas e inxustas, falsas porque os convenios incluen gastos no monte que non se fixeron, e inxustas porque nacen dun roubo, porque os montes foron usurpados ós comuneiros". No caso concreto do monte do Testeiro, a reforestación fíxose no ano 1958.

Un Arenteiro manifestamente superior ao seu rival non pudo pasar do empate na súa visita ao Morrazo, foi o partido das ocasións de gol non concretadas, os verdes gañaron un punto pero tal como se desenvolveu o partido tamén pode concluirse que se perderon dous. E tamén se perderán o próximo partido ante o Porriño Industrial os centrocampistas V. Gallego e Dafonte, que viron cartón amarelo e cumplirán ciclo.

CD. Arenteiro: Pachi, Ocampo (Lois, m. 73), D. López, C. Escudero, Pana, Dafonte (D.Arbo), V. Gallego, Bardelás (Brais, m.73), Gele, Dani Vázquez (Manu m.73) e M Sotelo.

Goles: 

1-0: Minuto 3. Erro da defensa do Arenteiro que non acerta a despexar un balón fácil e Aarón, de vaselina, bate a Pachi na súa saida.

1-1. Minuto 26. Córner golpeado por M. Sotelo e Ocampo, no segundo pau, de cabeza fai o empate.

O Partido: Por xogo e ocasións de gol  o Arenteiro fixo méritos para gañar este partido. Os locais, ademáis do gol tan so dispuxeron doutra oportunidade na primeira parte, mentres que o Arenteiro contou con ata oito ocasións para voltear o marcador, pero os balóns de Victor Gallego -por tres veces-, Escudero, Bardelás -que se foi o poste- , Marcos Sotelo, Arbo e Gele non encontraron portería . Ademáis das magníficas intervencións dos porteiro local, David, que salvou dous man a man con Dani Vázquez e Braís, con éste último por dúas veces, aínda que na última -xa no desconto- e nunha xogada na que o dianteiro verde caeu lesionado, os xogadores do Arenteiro reclamaron penalti. Un auténtico monólogo do Arenteiro que tivo pouca recompensa, un punto que sabe a moi pouco.

O bar-tapería “O Papón” de Maside acolleu esta tarde o Congreso Local do PP nesta localidade. A única candidatura presentada foi a que lidera Juan Manuel Álvarez González, que acadou o apoio do 100% dos votos emitidos polos compromisarios participantes na elección.

Tras coñecerse o escrutinio, o presidente local electo agradeceu expresamente o unánime apoio recibido á súa candidatura, facendo unha sentida lembranza do seu antecesor, Casimiro Campo Fernández, falecido o 1 de decembro de 2012. Juan Manuel Álvarez González sinalou que o novo equipo da Xunta Local que el lidera “busca unha profunda rexeneración, con ilusión e unha nova estrutura organizativa. O PP ten que ser o artífice do profundo cambio que Maside necesita”. Sobre este “cambio”, o presidente local fixo referencia expresa á necesidade de “fixar poboación, empresas e emprendedores no municipio, con infraestruturas necesarias que redunden no pobo, algo que se perdeu nestes últimos sete anos de goberno socialista”.

Tralo discurso do presidente local, tomou a palabra o presidente provincial do PPOU, encargado de clausurar o Congreso Local de Maside. Manuel Baltar afirmou que “as políticas municipais deben fundamentarse na cooperación entre administracións, co obxectivo irrenunciable de mellorar a calidade de vida dos veciños de Maside”.

Os socialistas galegos demandaron no Parlamento á Xunta que poña en marcha de forma inmediata a residencia para persoas maiores O Cornuval no Concello de O Carballiño e que teña xestión pública.

“As obras remataron hai dou anos, tiveron un custo de 6,7 millóns de euros e deben ser xestionadas desde o público, como pasa coa parte máis antiga da residencia”, asegurou hoxe Carmen Gallego na Comisión de Sanidade, durante a explicación dunha proposición non de lei dos socialistas sobre este tema que foi rexeitada polo PP.

A viceportavoz socialista apuntou que “en setembro, tanto a conselleira de Traballo como o alcalde do Carballiño adiantaron a posible xestión privada, o que reflicte unha vez máis a estratexia do PP en políticas sociais”. O PSdeG advirte ademais de que a Xunta de Feijóo “retrasa as aperturas de centros para que pareza que son autoría do seu goberno”.

“O Grupo Parlamentario Socialista considera que os centros que foron construídos con fondos públicos para prestar atención en materia de Servizos Sociais deben ser xestionados desde o público, pois só así garantiremos igualdade e calidade na prestación das políticas sociais”, manifestou Gallego.

“As empresas privadas que operan neste sector xa teñen un nicho de mercado naquelas persoas que deciden libremente optar por estas, pero dende a política pública os gobernos teñen que garantir que calquera persoa que o queira poida ingresar nunha praza pública, pois os Servizos Sociais son un dereito universal”, engaden os socialistas.

As axudas enmarcanse dentro do plan provincial termal que financia a Deputación de Ourense, que contempla actuacións en materia de termalismo en 9 concellos da provincia.

En Punxín, na área ternal do Bañiño-As Quintás contruiránse dúas pozas de augas termais, cun investimento de 49.000 euros, según se recolle no convenio asinado entre o citado concello e a entidade provincial.

No concello de Cenlle, e por importe de 47.828 euros están previstas dúas obras, a mellora do acceso ao balneario de Laias e acondicionamento do sendeiro que comunica este balenario de Laias coa área termal de Barbantes-Estación.

No caso do concello carballiñés executaráse o proxecto de acondicionamento do acceso peonil e entorno do Bañiño de Arcos, cun investimento de 50.000 euros.

Na comarca do Ribeiro tamén se beneficiarán destas subvencións do plan provincial termal os concellos de Ribadavia, que destinará 33.879 euros á mellora do acceso a Prexigueiro, e o de Cortegada, con 36.000 euros que investirá no novo balneario da localidade.

O presidente de Xunta, Alberto Núñez Feijóo, asinou nun acto desenvolvido no balneario do Carballiño un convenio de colaboración coa Deputación de Ourense, polo cal ambas as dúas institucións se comprometen a “darlle o pulo definitivo á aposta polo turismo termal” que o Goberno autonómico leva poñendo en práctica “desde 2009”, segundo salientou o mandatario galego.

Feijóo recordou que o turismo galego está a bater este ano récords históricos –excluíndo o Xacobeo 2010-, pois rexistráronse sete millóns de pernoitas ao longo dos primeiros nove meses de 2014, millón e medio delas correspondentes a turistas procedentes de fóra de España. “O turismo termal é unha das nosas bazas fortes para seguir mellorando estes rexistros”, subliñou.

O acordo rubricado no Carballiño por Feijóo e o presidente da Deputación de Ourense establece como obxectivo central poñer en valor turístico os recursos naturais da provincia de Ourense. Para conseguilo, o convenio tamén supón o nacemento do Consello Termal Ourensán, un organismo multilateral, formado polos concellos das vilas termais, a provincia, a Xunta de Galicia, o Goberno central e asociacións de empresarios, e que ten como finalidade reivindicar a grandeza termal desta provincia e “manter e reforzar o noso liderado natural”. Así e todo, o mandatario autonómico expresou a súa vontade de “sumar a todas as institucións posibles” a este acordo pioneiro.

Marnotes "o termalismo será no futuro unha oportunidade para o noso territorio e as nosas xentes"

Durante a súa intervención na sinatura deste convvenio no balneario do Carballiño, o alcalde Argimiro Marnotes manifestou a súa satisfacción porque con este acto "deixaráse o nome do Carballiño escrito na historia do renacer do termalismo".

O rexedor municipal carballiñés remarcou que o balneario do Carballiño "´é o lugar ideal para a sinatura deste acordo, pois O Carballiño que añora os mediados do século XX, como explendor de augas mineromedicinais, aspira a recuperar ese tempo, e para elo esta iniciativa que hoxe se pon en marcha fará un pronto presente que nos faga esquecer outros tempos".

Para o PSdG o acto foi "pura propaganda"

O PSdeG lamentou que "a visita de Feijóo ao Carballiño non fose mais que mera propaganda, xa que non anunciou a posta en marcha de ningún dos proxectos pendentes na vila". Afirman que "Marnotes fixo novamente o ridículo ao demostrarse que os do seu propio partido non lle fan nin caso, xa que non é capaz de conseguir ningún compromiso do Goberno galego que beneficie aos carballiñeses".

Subliñan que "nos orzamentos da Xunta non se inclúe ningunha partida específica para O Carballiño, que está totalmente abandonado polo goberno autonómico e cun alcalde que amosa unha vez máis a súa inutilidade para xestionar investimentos que poidan dar un impulso á vila".

Así, recalcan dende o PSdG,  "Feijóo asinou hoxe o convenio coa Deputación para a posta en marcha do Plan Termal Provincial,  pero non dixo unha palabra do proxecto do Instituto Termal para O Carballiño, que é ademais un dos compromisos electorais de Marnotes e incluído no seu programa cando se presentou á alcaldía"

Finalmente, preguntanse os socialistas por qué Feijóo non falou nesta visita de proxectos pendientes da Xunta no Carballiño, como a Galiña Azúl ou o Parque de Bombeiros..