A Deputación de Ourense pon en marcha unha nova iniciativa para impulsar o itinerario xacobeo Camiño Mozárabe-Vía da Prata para “continuar con esa senda de crecemento de peregrinos que actualmente vén rexistrando”, sinalou o presidente do Inorde e deputado de Representación Institucional, Rosendo Fernández, na presentación desta iniciativa hoxe na sala de prensa do Pazo Provincial.

“Trala boa acollida que tivo esta experiencia en Semana Santa, propoñemos unha nova acción de dinamización para facilitar aos potenciais usuarios a peregrinación neste itinerario xacobeo co obxectivo de revitalizalo”, explicou Rosendo Fernández.

Esta iniciativa está pensada, sobre todo, para “involucrar a propia poboación local para que coñezan mellor este itinerario, aínda que tamén está aberta á participación de outros visitantes”, sinalou o presidente do Inorde.

Deste modo, ponse en marcha un servizo de transporte para que realicen o Camiño cada domingo -do 26 de maio ao 23 de xuño- por etapas de aproximadamente 20 km cada unha, coa facilidade de que este autobús os levará ao punto de inicio da etapa e os recollerá ao remate para volver a traelos a Ourense. Disporán de tempo suficiente para desfrutar dos diferentes puntos de interese en cada etapa e coa garantía de obter a “Compostela” ao finalizar o itinerario.

Cinco etapas

Así, o primeiro domingo, o 26 de maio, realizarán a etapa Ourense – Cea (21 km) que inclúe unha visita a Oseira, o segundo domingo, 2 de xuño, será o traxecto Cea-Dozón- Puxallos, un percorrido de aproximadamente 22 km. A terceira etapa será o 9 de xuño e levará aos peregrinos desde Puxallos a Silleda (22km); no cuarto domingo, 16 de xuño, terá lugar a cuarta etapa que vai de Silleda a Vedra-Susana, sendo un percorrido de 23 ou de 30 km. E, por último, o 23 de xuño peregrinarán a quinta etapa de Susana a Santiago de Compostela, o tramo máis curto, de 10 km aproximadamente.

Ademais, contarán ao longo desta experiencia cun autobús de apoio a media etapa e cun guía especializado que lles axudará a descubrir o patrimonio cultural e natural da provincia a través deste camiño. Os interesados en realizar o Camiño xa poden inscribirse a través da páxina web www.conocegalicia.es por un prezo de 49 euros.

Como novidade tamén se pode realizar a inscrición por etapas, por un prezo de 15 euros. Xa está dispoñible a posibilidade de realizalo ao completo ou por etapas no mes de setembro, concretamente, do 15 de setembro ao 13 de outubro. En todo caso, as inscricións están abertas para que a xente poida organizarse e anotarse con tempo segundo a súa dispoñibilidade.

A Xunta destinará 1,2 millóns de euros á construción da residencia municipal de maiores de Piñor. A conselleira de Política Social e Igualdade, Fabiola García, visitou o espazo no que se instalará este centro xunto ao delegado da Xunta en Ourense, Manuel Pardo, o xerente do Consorcio, Perfecto Rodríguez, e o alcalde de Piñor, José Luis González.

O Goberno galego financiará o 70% das obras, o que supón a asignación máxima que pode outorgar. Unha contía que forma parte do Plan de Investimentos de 18,5 millóns de euros acordado coa Federación Galega de Municipios e Provincias (Fegamp) co que a Xunta custeará unha vintena de proxectos de mellora, reforma ou construción de residencias e centros de día de titularidade municipal. O 30% restante irá a cargo da Deputación de Ourense.

O proxecto de Piñor consistirá na modificación e ampliación das instalacións que ata agora ocupaban un centro social. Con esta actuación dotarase ao concello de 41 prazas residenciais para persoas maiores.

A conselleira de Política Social e Igualdade destacou que o Plan de Investimentos en centros de atención residencial e diúrna de titularidade municipal supón un impulso histórico da Xunta á rede galega de atención e coidado a maiores.

O Diario Oficial de Galicia ven de publicar a resolución pola que se inclúe no Catálogo galego de árbores senlleiras o gran castiñeiro de Surribas, que se localiza na parroquia de Froufe do Concello do Irixo. Este exemplar de Castanea sativa Mill, que está situado no monte comunal de Surribas, ten unha altura de 15 metros, un perímetro de 4,9 metros e unha idade aproximada de 200 a 250 anos.

Conta con 2 ramificacións principais cunha abertura central protexida con pedras e terra e, no seu conxunto, está cuberto cun gran tapiz de musgo, que fai deste un exemplar interesante desde o punto de vista estético ademais de representar un valioso legado e un gran valor natural.

O Catálogo galego de árbores senlleiras é unha ferramenta pública e en constante actualización, xa que poden propoñer a inclusión de elementos novos os seus propietarios, as administracións, os centros de investigación ou as asociacións e entidades públicas ou privadas que teñan entre os seus fins a protección da natureza. De feito, desde a aprobación do seu regulamento no ano 2007, este inventario de carácter administrativo foi obxecto de diversas revisións e periodicamente sométense a información pública novas propostas para valorar a incorporación de exemplares con valores salientables.

Neste sentido, no catálogo son susceptibles de incluírse todas aquelas árbores e formacións merecentes de protección en atención ás excepcionais características do seu porte, proporcións, idade, rareza, significación histórica ou cultural, interese científico, educativo, estético, paisaxístico ou calquera outra circunstancia que as faga merecedoras dunha especial protección.

CIRCO ACUÁTICO BRAVO. Utilizando a auga como o gran aliado do seu espectáculo, este circo ten a súa carpa instalada na Uceira e ofrece funcións o sábado ás 5 e as 8 da tarde e o domingo ás 12 do mediodia e 6 da tarde. A entrada infantil ten un prezo de 8 euros e a entrada para adultos 10 euros.

1º FESTIVAL DE PERCUSIÓN "O CARBALLIÑO SOA". O Sábado 11, unha xornada que arranca en horario de mediodia na Praza Maior do Carballiño cunha exhibición-concerto de percusión africana a cargo de Andrés Rivero e alumnado. Pola Tarde, ás 5 obradoiro  aberto de batucda con Rubén Comesaña e Pablo Paz, ás 7 actuacións d Percucar e Perkutora, e finalmente ás 8 da tarde pasarrúas coa batucada Percucar.

FESTIVAL INTERNACIONAL DE MÚSICA PÓRTICO DO PARAISO. O domingo 12 ás 7 da tarde no mosteiro de Oseira concerto de clausura deste festival co concerto da prestixiosa banda francesa "Diabolus in Müsica". Entrada 12 euros.

FESTA DO BOLO PREÑADO DE VILARDERREI-CENLLE.  Celébrase este sábado 11 de maio, con misa solemne e procesión de honra a San Miguel, e sesión vermút cos gaiteiros Os Garimosos. Desde a 9 da noitiña comezará a degustación do bolo preñado e verbena co DJ JJCompota e a orquestra Royal Espectáculo.

FESTA DAS MUDACIÓNS EN XUVENCOS. Primeiro domingo das Mudacións en Boborás, este domingo 12 as 10:30 da mañá misa solemne e procesión co grupo de gaitas de Boborás na igrexa de Xuvencos, e as 12 do mediodia misa solemne na capela de Boborás cantada pola Coral do Casino do Carballiño.

MISA SOLEMNE NA HONRA DA VIRXEN DE LUJÁN EN MUDELOS. A carballiñesa parroquia de Santiago de Mudelos celebra esta misa solemne na honra á patrona de Argentina ás 12 do mediodia deste domingo 12 de maio.

TEATRO, NO CENTRO MULTIFUNCIONAL DE AVIÓN. Este sábado ás oito e media da tarde, a compañía DE STE XEITO presenta "Loló e Mamá", entrada gratuíta.

CINE. O Novocine de Leiro ofrece dúas películas esta fin de semana, que son "Garfield La Pelicula" ás 4 e 6 da tarde, e Máis Cuñados ás oito da tarde, sábado e domingo.

VISITA GUIADA AO XACEMENTO ARQUEOLÓXICO DE SANTA MARIÑA. O concello de Maside organiza para este domingo unha visita guiada polo arqueólogo Andrés Rodríguez, con punto de encontro e saída desde a Ponte San Fiz ás 10 da mañá, achegandose ao conxunto arqueolóxico a través do camiño natural do río Barbantiño, trala visita haberá música ao vivo e un aperitivo

Na Tertulia deste vernes dia 10 de maio tivemos nos estudos de COPE O Carballño a Manuel Nogueira, Maria Luisa Rodríguez e Sebas Lamazares, que acompañaron a Xan Pinal, nunha entrega máis deste espazo semanal no que a audiencia desta emisora de radio volveu ter un destacado protagonismo.

O PSdeG-PSOE de Leiro propón unha batería de iniciativas para facilitar o desbroce de fincas e o control da biomasa ante a “masiva” chegada de notificacións á veciñanza para a limpeza das súas propiedades. As e os socialistas amosan o seu “malestar” debido a “falla” de previsión e aviso nas notificacións para a limpeza de fincas, xa que tal e como alegan “chegaron con moi pouco marxe para que a veciñanza poida proceder a adecualas en tempo e forma”.

Dende o grupo municipal socialista lembran que o 28 de outubro de 2019 o pleno da corporación municipal aprobaba, co voto favorable do PSOE, o plan municipal de prevención e defensa contra os incendios forestais, que establecía as parcelas afectadas. Xa con anterioridade, o concello solicitara a adhesión ao convenio de colaboración subscrito entre a Xunta, a Fegamp e Seaga para a prevención e defensa contra incendios forestais. Tal e como explican os concelleiros socialistas “o tempo transcorreu, pero o concello non foi quen de desenvolver nin unha soa medida eficaz para informar á veciñanza da situación, nin facilitar o cumprimento da lei, tendo que pasar as elección para que se procedese o envío de cartas aos e ás afectadas”.

O voceiro do PSdeG-PSOE en Leiro, Manuel Rodríguez Vázquez, afirma que nestes momentos estase a producir unha chegada masiva de cartas aos afectados e tal e como indica “non especifica que deben facer, polo que acoden masivamente ás dependencias municipais á procura de información ou solucións dunha situación que tiña que estar prevista”. Neste senso, o edil socialistas aféalle ao goberno municipal do Partido Popular que “deixase pasar o tempo sen actuar, esperando a que os propios veciños se denunciaran entre si para tomar cartas no asunto”. “Como resultado da falla de iniciativas municipais atopámonos con camiños intransitables e áreas públicas e privadas cubertas de matogueira, incluso nas zonas urbanas”, apunta Rodríguez Vázquez.

O voceiro socialista subliña que a situación provoca que a veciñanza “non poida acceder ás fincas, posto que as vías de acceso atópanse sen limpar” e esgrime que “é imposible que poida facerse todo este traballo en 15 días”. Propostas do PSdeG-PSOE de Leiro Ante esta situación, o PSdeG-PSOE de Leiro vén de presentar unha batería de iniciativas para buscar solución ante esta “desfeita”. Entre elas destaca a creación dunha brigada permanente, que traballe todo o ano desenvolvendo tarefas preventivas de desbroce e limpeza de montes e camiños públicos”.

Outras das propostas son:

•Actuar cun orde, coa debida planificación e informando aos afectados co tempo suficiente, facilitando os medios para que se cumpra a lei e pedindo subvencións as administracións competentes en lugar de perdelas.

•O concello debe encargarse da limpeza dos camiños, a través da creación da brigada permanente e aproveitando os convenios anteriormente citados, co fin de mantelos transitables para facilitar o acceso ás fincas.

•Recorrer ao Servizo Agrario Galego, órgano creado polo bipartito, que inicialmente prestaba estes servizos de balde, para ofrecer aos particulares uns prezos asumibles.

•Promover a concentracións de terras, así como a permuta das mesmas, que está dando resultados noutros lugares, fomentando a recuperación de terras para cultivo.

•Aproveitar os recursos propios do concello.

A alcaldesa Patricia Torres repasa nesta entrevista a actualidade no concello de Boborás, e contesta ás preguntas da audiencia de COPE O Carballiño.

O Refectorio Monumental de Santa María A Real de Oseira acollerá este próximo domingo dia 12 de maio ás 19:00 horas o concerto de clausura do "XVII Festival Internacional de Música Pórtico do Paraíso", que estará a cargo do cuarteto francés "Diabolus in Musica".

Máis información de "Diabolus in música": http://www.porticodoparaiso.com/diabolus-in-musica/

Escoita aquí a entrevista de Xan Pinal a Conchi Dasilva -Coordenadora do Festival- e Juan Enríque Miguéns -Director Artístico- en COPE O Carballiño.