O Diario Oficial de Galicia publica hoxe o expediente de incoación para declarar como Ben de Interese Cultural o Castro de San Cibrao de Lás, situado a 10 quilómetros do Carballiño, nos termos municipais de San Amaro e Punxín.

Esta publicación, polo tanto, supón o comezo do procedemento e a aplicación de forma inmediata e provisional do máximo réxime de protección como ben representativo do patrimonio arqueolóxico de Galicia.

Deste xeito, fundaméntase a declaración de San Cibrao de Lás como Ben de Interese Cultural “no seu interese científico e na súa importancia histórica e arqueolóxica, sendo un dos xacementos arqueolóxicos máis sobranceiros e coñecidos da Comunidade Autónoma, como elemento crucial da Idade do Ferro”.

Ademais do seu valor histórico e arqueolóxico, San Cibrao de Lás destaca polo seu bo estado de conservación, cun 15% da extensión do poboado xa escavado e musealizado. Neste senso, o expediente destaca que a súa integridade preservouse de forma excelente, sen que se vise afectada substancialmente a súa morfoloxía ao longo dos varios séculos de historia desde ou seu abandono. Cómpre destacar que esta singularidade foi a que fixo que a Xunta o escollese para crear o Parque Arqueolóxico da Cultura Castrexa, un centro de interpretación para difundir este coñecemento entre a poboación e os visitantes, sendo un dos xacementos arqueolóxicos máis visitados de Galicia.

Tras esta publicación, ábrese agora un período de información pública dun prazo dun mes, que comezará a contar a partir de mañá, co fin de que as persoas interesadas poidan examinar o expediente e facer alegacións. De igual xeito, solicitarase o ditame aos órganos consultivos correspondentes que acrediten o valor cultural sobranceiro desta instalación, que son necesarios para que conte con esta máxima protección e o expediente deberá resolverse no prazo máximo de 24 meses.

O inicio deste expediente para declarar Ben de Interese Cultural este espazo reflicte o importante compromiso do Goberno Galego por protexer, poñer en valor e conservar o patrimonio sobranceiro da nosa Comunidade. Así o demostran os 114 bens declarados desde a entrada en vigor da Lei de Patrimonio Cultural de 2016, acadando un total de 787.

Valor cultural singular
O Castro de San Cibrao de Lás foi considerado tradicionalmente como un oppidum ou lugar elevado do cambio de Era, pero nas intervencións máis recentes ampliase a súa ocupación como castro entre os séculos II a. C. ata ou século II d. C, e documéntanse indicios da existencia doutras fases no xacemento arqueolóxico ata o derrube da muralla e abandono definitivo do xacemento no século XI d.C.. As diversas intervencións arqueolóxicas que se veñen desenvolvendo desde inicios do século XX levan a describir o ben como un espazo elevado que conta con dous recintos ovalados e concéntricos.

Ademais, San Cibrao de Lás conta coa presenza dunha variada tipoloxía de elementos do patrimonio histórico, arqueolóxico e natural na súa veciñanza que avalan o seu potencial como recurso científico de primeira magnitude, e a súa relevancia e valor cultural singular.

A conselleira de Medio Ambiente e Cambio Climático, Ángeles Vázquez, reuniuse esta mañá co alcalde de Beariz, Manuel Prado, para avaliar cuestións de interese para o concello en materia de saneamento e xestión de residuos.

En concreto, o rexedor informou á conselleira do interese municipal por acometer a reforma e ampliación da rede de saneamento na contorna de Igresario no lugar de Doade. Ángeles Vázquez indicou que o persoal de Augas de Galicia estudará o proxecto presentado polo Concello de cara a avaliar a súa viabilidade e as posibles fórmulas para acometer o seu financiamento.

Nesa liña, a conselleira incidiu en que a Xunta continuará prestando o seu apoio técnico e económico aos concellos para que poidan exercer as súas competencias en materia de xestión da auga de xeito máis eficiente para que poidan prestar servizos da máxima calidade á súa veciñanza. De feito, o orzamento de Augas de Galicia sobe este ano 2025 preto dun 5%, ata os 144 millóns de euros, para seguir optimizando o saneamento e o abastecemento coa mellora de infraestruturas, a formación e divulgación así como a execución de políticas activas de resposta ao cambio climático.

O obxectivo principal é facer un uso eficiente da auga e reducir a pegada hídrica na comunidade mediante investimentos nas redes de saneamento, depuración e abastecemento así como no apoio aos concellos, o deseño de mapas de riscos climáticos ou a creación de corredores verdes para reducir os asolagamentos.

En canto á xestión de residuos, a conselleira e o alcalde analizaron a solicitude municipal para habilitar un punto limpo de pequenas dimensións no parque empresarial de Lebozán. Neste caso, Ángeles Vázquez lembroulle a Manuel Prado que a Consellería de Medio Ambiente e Cambio Climático puxo á disposición das entidades locais unha oficina técnica de asesoramento específico en materia de xestión de residuos municipais na que pode recibir información sobre liñas de financiamento para levar a cabo esta iniciativa.

Asi o anunciou en COPE O Carballiño o tenente alcalde de Punxín, Eladio Fernández, que ven de recibir a confirmación por parte da Xefatura Provincial do Ministerio de Transportes e Mobilidade Sostible.

A nova conexión coa estrada N-541, unha vella demanda do concello e a veciñanza, faráse á altura da propia capitalidade municipal.

Escoita aquí a entrevista a Eladio Fernández:

O pazo natal de Antón Losada Diéguez, en Moldes, acolleu a entrega da 40ª edición dos premios Antón Losada Diéguez, un evento impulsado polo Concello do Carballiño e o Concello de Boborás que conta co apoio da Deputación e que permite recordar cada ano a figura
do escritor de Boborás, ademais de poñer en valor a literatura galega actual. Manuel Rivas, escritor e xornalista, recolleu o galardón na categoría de creación literaria pola súa última novela, “Tras do Ceo”. Pola súa parte, o músico, profesor e escritor Alberto Pombo recibiu o premio na modalidade de investigación e ensaio polo traballo “Verso e acorde. Relacións entre a literatura galega e a música pop (1950-2000)”.

Con esta edición do premio, son xa 73 os autores e autoras galardoados nas modalidades de creación literaria e investigación. Hai sete que obtiveron o premio en dúas ocasións, entre eles, Manuel Rivas, que hoxe recibiu, precisamente, o segundo galardón.

Na súa intervención, Manuel Rivas agradeceu o recoñecemento do xurado e puxo en valor a creación literaria en galego. Nesta liña, sinalou a súa inquedanza ante a situación “de emerxencia” que vive a lingua galega. “É unha cultura e unha lingua afeita a navegar na treboada, pero está producíndose unha perda de transmisión entre xeracións, hai moita xente nova que está afastada do galego, que non o vive, e claro, é o noso tesouro cultural”, reinvidicou. Porén, apuntou a “creatividade extraordinaria” que se está vivindo en ámbitos artísticos como a música, a literatura ou o audiovisual. “Creo que é esta vangarda a que vai facer que a cultura galega non desapareza”, asegurou.

Pola súa parte, Alberto Pombo referiuse á importante relación que se establece entre a música, a literatura e a lingua, e o impacto do uso do galego nestes campos culturais. Nun discurso que emocionou a todas as persoas que asistiron ao acto, lembrou que a súa avoa non sabía ler nin escribir, pero recitaba de memoria ducias de poemas de autores galegos grazas ás cancións e á música.

O acto contou coa participación dos familiares de Antón Losada Diéguez; o conselleiro de Cultura, José López Campos; o secretario xeral de Cultura, Anxo Lorenzo; Javier Vázquez, tenente alcalde de Boborás, e os concelleiros do Carballiño Diego Fernández, que entregou unha dos premios e substituíu ao alcalde, que non puido asistir, e Miguel Fernández e as concelleiras Rosa Fuentes e Lorena Crespo. Precisamente Diego Fernández, que presidiu o xurado do premio, fixo un chamado a escribir e publicar en galego, pero tamén a ler, pois con este premio, “ademais de comprometernos coa nosa lingua, tamén buscamos un estímulo para a lectura, a reflexión e a creatividade como forma de mellorar o mundo no que vivimos”.

Carlos Rodríguez Calvo, presidente do Centro de Estudios Chamoso Lamas, foi o mantedor do evento. Na súa intervención referiuse a Chamoso Lamas de a Antón Losada Diéguez como “dúas figuras sobranceiras vencelladas con estas terras que contan cun gran patrimonio histórico, cultural e natural. Un patrimonio que hai que preservar e poñer en valor”.

Antes da entrega de premios tivo lugar unha ofrenda floral ao intelectual e escritor de Boborás e a Chamoso Lamas na igrexa de Moldes.

Na tertulia deste venres 13 de xuño participan Sebas Lamazares, Fátima Gómez, José A. Barge e Manuel Nogueira, xunto a Xan Pinal, tamén cos comentarios da sempre participativa audiencia de COPE O Carballiño.

Escóitaa aquí:

A Asociación Carballiño CCA pon en marcha unha nova edición da campaña “DÍAS LOCOS”, que se celebrará o venres 13 e o sábado 14 de xuño, co bxectivo de impulsar as compras nos comercios asociados e ofrecer unha experiencia dinámica para familias e visitantes.

Durante estes dous días 33 establecementos asociados ofrecerán descontos en artigos de tempada. Os clientes que realicen compras poderán participar no sorteo de 200 € en vales de compra (4 vales de 50 €), rexistrando o ticket en www.comerciocarballino.com/diaslocos ou depositando a papeleta na urna situada no stand de Carballiño CCA na Praza Maior.

A animación de rúa incluirá o venres xogos tradicionais na Praza Maior e na Pista Roxa (acceso mediante ticket de compra), e música itinerante polas rúas co coro “En Harmonía”. O Sábado, haberá zancudos, pasarrúas e un divertido Toro Mecánico na Praza Maior (entrada mediante ticket de compra).

Esta campaña leva o selo de cooperación institucional: cofinanciada pola Consellería de Emprego , Comercio e Emigración da Xunta de Galicia e conta coa colaboración do Concello do Carballiño. Desde O Carballiño CCA animan á veciñanza a participar activamente nesta celebración chea de ofertas, diversión e dinamismo na vía pública.

O pulpo do Carballiño triunfou hoxe en Madrid. A Casa de Galicia na capital española acolleu a presentación oficial da 63ª Festa do Pulpo do Carballiño, adicada á vila irmá Noventa Padovana, situada no norte de Italia. A menos de dous meses da cita, que se levará a cabo o próximo 10 de agosto (como marca a tradición, o segundo domingo do mes), o goberno local do Carballiño convida á poboación a coñecer e desfrutar da romería gastronómica máis concorrida de toda Galicia.

Máis dun cento de persoas acudiron esta mañá á Casa de Galicia para asistir á presentación e degustar o plato estrella da vila do Arenteiro: o pulpo á feira, cociñado por unha pulpeira carballiñesa. O tenente alcalde, José Rafael Castro, aproveitou a ocasión para lanzar unha invitación aberta aos presentes, non són a participar na Festa do Pulpo, senon tamén a visitar Carballiño “en calquera época do ano”, aproveitando así a alta velocidade que une Madrid con Ourense en pouco máis de dúas horas.

O concelleiro de Turismo, Manuel Dacal, puxo en valor a unión con Noventa Padovana, onde cada mes de outubro se celebra a Fiera del Folpo, unha festa que tamén xira en torno ao cefalópodo e onde tamén acuden milleiros de persoas a desfrutar da gastronomía, a cultura e a tradición. Por outra banda, puxo en valor a evolución e historia da Festa do Pulpo do Carballiño, que comezou hai 63 anos “como unha reunión de amigos e familias arredor dunha caldeira de pulpo” e logrou converterse nunha das romarías gastronómicas “máis populas dos país e con máis fama internacional”. De feito, esta é a terceira edición como festa de Interese Turístico Internacional.

A presentación estivo conducida pola xornalista Leticia Iglesias, carballiñesa cunha longa traxectoria en medios de comunicación nacionais (actualmente, é conductora dos informativos de Telecinco). O edil de turismo agradeceu a súa participación, e avanzou que Iglesias será nomeada embaixadora da Festa do Pulpo.

O alcalde de Noventa Padovana, Marcello Bano, e o seu concelleiro de Turismo, Davide Iafelice, tamén acudiron ao acto. Ambos agradeceron a acollida por parte do Carballiño e enxalzaron a Festa do Pulpo, que puideron coñecer na edición do ano pasado. A unión entre ambas vilas é moi valiosa, non só a nivel gastronómico, senon tamén no eido cultural e etnolóxico: “As cousas que vos importan son as cousas que nos importan: o patrimonio cultural, os produtos da nosa terra, as técnicas e receitas que cada comunidade transmitiu de xeración en xeración para perfeccionalas cada vez máis”.

Pola súa parte, o director da Casa de Galicia en Madrid, Luis E. Ramos, puxo en valor a internacionalización da Festa do Carballiño e a súa importancia como a romería gastronómica máis popular de Galicia.

José Rafael Castro e Manuel Dacal fixeron entrega de dúas esculturas de pulpeiras a Leticia Iglesias e a Luis E. Ramos, como mostra de agradecemento. Ao finalizar o acto, os asistentes puideron degustar do plato tradicional do Carballiño: o pulpo á feira.