O Consello da Xunta de Galicia informou na súa reunión desta semana de catro proxectos en materia de mellora do abastecemento de auga e saneamento que se levarán a cabo nos concellos de San Cristovo de Cea, Cenlle, Boborás e Leiro, que suman en total 3,5 millóns de euros.

Así, cómpre citar a posta a punto da estación depuradora de augas residuais (EDAR) de San Cristovo de Cea, comprometida a comezos deste ano cun investimento de 1,1 millóns e que permitirá corrixir as deficiencias técnicas que presenta a actual infraestrutura, así como dotala de sistemas tecnolóxicos que garantan un funcionamento automatizado e eficiente.

Outra actuación igualmente destacada dentro do noso ámbito é a renovación de infraestruturas hidráulicas básicas na parroquia de Laias, en Cenlle, cun investimento previsto de 500.000 euros para resolver os problemas de abastecemento e de saneamento que sofre esta zona por mor da antigüidade e continuas avarías das súas redes.

Por último, Augas de Galicia está ultimando a licitación doutros dous proxectos hidráulicos en municipios das comarcas do Carbaliño e O Ribeiro.

A primeira destas actuacións —con 900.000 euros de orzamento— centrarase na renovación dos sistemas de abastecemento e saneamento na travesía da Almuzara, na N-541, en Boborás, bastante envellecidos e que presentan filtracións e un funcionamento deficiente, ademais de carecer dunha rede de pluviais efectiva que evite a sobrecarga da fosa séptica existente.

Tamén se renovará con 1 millón de euros a tubaxe de abastecemento entre Pazos de Arenteiro e a ETAP de Leiro (concellos de Boborás e Leiro), que ten máis de 30 anos de antigüidade e que sofre roturas frecuentes que xeran cortes na subministración, afectando a adegas e servizos municipais.

A área de Educación do Concello do Carballiño impulsa un expurgo na Biblioteca Municipal, un proceso técnico que permite liberar espazo físico e garantir a calidade, pertinencia e actualidade do fondo dispoñible para os usuarios e usuarias. Actualmente, as instalacións municipais contan con máis de 25.000 exemplares, dos que máis da metade se atopan en espazos non adecuados para a súa conservación e acceso público.

“Cremos que este expurgo é fundamental para empezar a darlle á Biblioteca do Carballiño o impulso que merece”, asegura Lorena Castro, concelleira de Educación, que recorda que hai 10 anos que non se levaba a cabo este proceso.

A realización do expurgo, que durará tres meses, inclúe o inventario e pre-catalogación básica de materiais a revisar, o rexistro documentado de baixas, a consulta institucional á Xunta se fora preciso pola Lei de Patrimonio Documental de Galicia e o tratamento final do material (reciclaxe, doazón ou destrución controlada).

O obxectivo, tal e como destaca a edila, non é só liberar espazo para a correcta organización dos fondos, senón tamén mellorar a accesibilidade da poboación, optimizar os recursos, garantir a calidade do fondo e conservar adecuadamente o patrimonio bibliográfico relevante. A análise realizada permitiu identificar a sobrecarga de materiais de baixa rotación, a presenza de enciclopedias e atlas obsoletos, a gran cantidade de publicacións periódicas de lexislación con escaso interese por parte da poboación ou o duplicado de volumes.

Deste xeito, o expurgo permitirá adecuar a dimensión do fondo ao tamaño da poboación do Carballiño (actualmente é moi superior), ademais de implementar unha correcta distribución e clasificación dos volumes conforme a criterios técnicos. “Deste xeito reafirmamos o compromiso da Biblioteca coa mellora continuada do servizo para satisfacer as necesidades dos seus usuarios e usuarias”, engade Castro.

O conselleiro de Emprego, Comercio e Emigración, José González, acompañado polo director xeral de Comercio e Consumo, Gabriel Alén, e o delegado da Xunta en Ourense, Manuel Pardo, visitou a oficina do Servizo Público de Emprego de Galicia (SPEG) do Carballiño. Alí destacou o labor que desenvolve na atención ás persoas demandantes de emprego da contorna e avanzou que en 2026 se licitarán cun orzamento de preto de 2M€ e poñerán en marcha as obras para o seu traslado a un novo espazo no edificio do Centro Comarcal do Carballiño, dotado con máis de 900 m2 e que compartirá co Polo de emprendemento xa operativo alí.

José González destacou que esta actuación, que abranguerá tamén o acondicionamento exterior deste espazo, queda enmarcada no Plan de modernización de infraestruturas da Consellería de Emprego, Comercio e Emigración —que abrangue tanto as oficinas de emprego como os centros de formación dependentes— e que contará cunha partida nos Orzamentos de 2026 de arredor de 8 M€, consolidando o esforzo deste ano.

No caso do Carballiño, o conselleiro subliñou que o proxecto de integrar nun mesmo edificio a oficina de emprego e o Polo non é casual, xa que permitirá crear un espazo único de empregabilidade e talento, favorecendo as sinerxías entre o emprego por conta propia e allea, respondendo ás necesidades do tecido empresarial da contorna.

No marco do proceso de modernización do SPEG, González tamén salientou que a oficina do Carballiño —que atende os municipios do Carballiño, Boborás, Beariz, O Irixo, Maside, Piñor, Punxín, San Amaro e San Cristovo de Cea— conta ademais con ferramentas como EMi co obxectivo de casar de xeito máis eficaz as competencias das persoas demandantes de emprego coas necesidades do tecido produtivo. Esta ferramenta xa permitiu o perfilado competencial de máis de 79.000 persoas en Galicia, arredor de 16.000 persoas en Ourense. En canto ao Polo do Carballiño, puxo de relevo que é un dos catro activos na provincia —xunto cos de Baños de Molgas, O Barco e Verín— e xa axudou á creación de medio cento de empresas. Unha folla de ruta que avanzará no 2026 cun apoio autonómico de medio millón de euros, dos que 120.000 euros irán destinados ao polo desta vila.

O conselleiro destacou que o novo espazo incrementará as oportunidades laborais con impacto no territorio. Un eixo fundamental da Consellería que, sinalou, avanzará o vindeiro ano no desenvolvemento das políticas que permitan potenciar as oportunidades laborais dos galegos e galegas —xa sexa por conta propia ou allea—, a atracción de talento ou o pulo ao comercio local. Un traballo enmarcado dentro dos Orzamentos da Xunta para 2026, que por primeira vez superan os 14.000M€ (14.240M€), cun incremento de 300M€ que irá destinado ao 100% ás áreas sociais —Política Social, Educación, Sanidade e Emprego—, que en total reciben 3 de cada 4 euros das contas.

O Carballiño vén de superar neste mes de outubro a histórica cifra dos 15.000 habitantes no seu padrón municipal, un fito que se acada por primeira vez na historia da vila e do que deu conta esta mañá o alcalde, Francisco Fumega, baixo o lema “Xa somos 15.000”, acompañado polo tenente alcalde, José Castro.

O rexedor destacou que se trata dun feito de gran relevancia non só para O Carballiño, senón tamén para a provincia de Ourense, xa que é a primeira vez que unha vila ourensá supera esta cifra, ademais da capital provincial, que o fixo en 1.900. 125 anos despois, únese a capital do Arenteiro.

“O Carballiño medra, e un pobo que medra é síntoma do músculo económico e social que o fai posible”, puxo en valor o alcalde.

Fumega subliñou tamén que O Carballiño “é hoxe unha excepción dentro da tendencia xeral de perda de poboación en Galicia, especialmente nas zonas de interior e na provincia de Ourense, e que este crecemento demostra que cun modelo municipal diferente —centrado na calidade de vida, o emprego, a cultura, a natureza e a gastronomía— é posible reverter esa tendencia e atraer nova poboación”.

O alcalde lembrou que superar os 15.000 habitantes era un dos obxectivos principais do goberno municipal para o presente mandato, e que se logrou cando só transcorreron dous dos catro anos, grazas en parte á campaña de empadroamento posta en marcha a comezos do mesmo.

Segundo os datos do padrón municipal, o pasado 6 de outubro O Carballiño alcanzou os 15.023 habitantes, mentres que o último dato oficial do INE, de xaneiro de 2024, situaba a poboación en 14.075 persoas. É dicir, case un milleiro máis en pouco máis dun ano.

O Carballiño, unha excepción positiva en Ourense

Ata agora, Ourense era a única provincia galega onde só a capital superaba os 15.000 habitantes. Pola contra, A Coruña conta con 13 localidades, Pontevedra con 15 e Lugo con dúas por riba desa cifra.

“Nun panorama coñecido como é o da Galicia despoboada, O Carballiño conseguiu medrar e facelo, ademais, sendo unha vila do interior. Unha boa nova que fala do dinamismo que ten o concello. Unha poboación repartida no territorio é tamén un modelo máis enriquecedor e xusto”, declarou o alcalde.

O Carballiño convértese así nun caso único e esperanzador, que demostra que o interior galego pode medrar cando se ofrecen oportunidades e unha boa calidade de vida.
O crecemento poboacional non se debe ao saldo vexetativo —que continúa a ser negativo-, senón ao atractivo da vila para vivir e traballar. A maioría das novas altas no padrón corresponden a persoas procedentes de Latinoamérica, o que converte O Carballiño nun referente de integración e convivencia.

A isto súmase o dato de paro máis baixo desde que hai rexistros, actualmente por debaixo do 11%, e a ampliación en marcha do Polígono Industrial, principal motor económico e de emprego da comarca.

Un impulso para seguir medrando

Dende o Concello destácase que o paso da barreira dos 15.000 habitantes é moito máis ca unha cifra simbólica: representa a vitalidade da vila e serve como acicate para seguir mellorando os servizos públicos e consolidar o crecemento.

“Este é un logro polo que felicitarnos pero ten que ser un paso ao futuro para seguir medrando. O Carballiño ten que ser un sitio onde vivir, onde medrar e onde emprender”, declarou o tenente alcalde, José Castro.

Se pechamos o ano con estes datos, poderiamos optar a maiores fondos para todas as obras chave desta vila, como o Centro de Saúde”, engadiu.

O goberno local manterá a campaña de empadroamento e continuará presentando O Carballiño como un lugar ideal para vivir, traballar e desfrutar, cun estilo de vida saudable, unha ampla oferta cultural e un entorno natural e gastronómico privilexiado.

Un salto poboacional para superar a barreira dos 15.000 habitantes que consolida O Carballiño como referencia de dinamismo e progreso no interior de Galicia.