O Consello de Turismo de Galicia reunido este martes 8 de abril aprobou a delaración de Festa Turística de Interese Galego para a Semana Santa do Carballiño, tras a documentación presentada e o informe favorable para esta designación.

O Concello do Carballño e a Cofradía da Veracruz foron os promotores deste recoñecemento, que se traducirá nun bo impulso promocional para esta celebración da Semana Santa do Carballiño.

Agora, a tramitación queda tan so pendiente da aprobación desta declaración por parte do Consello da Xunta de Galicia.

Dano Cerebral Galicia, a Federación que reúne as cinco asociacións desta discapacidade que hai na nosa comunidade autónoma, leva o 15 de abril ao Irixo unha charla que ten como obxectivos informar sobre as causas -como o ictus ou os traumatismos cranioencefálicos-, describir as secuelas, sensibilizar sobre a prevención, e achegar referencias sobre os recursos de atención ao dano cerebral adquirido dispoñibles.

Esta sesión informativa está organizada en colaboración co Concello do Irixo, e vai ter lugar o martes 15 de abril ás 10:30 Casa do Concello (Praza Manuel Penedo, 10). É unha actividade aberta a todo tipo de público, dunha duración estimada de hora e media.

Aínda que a asistencia é de balde, é preciso inscribirse. Este trámite pode realizarse chamando ao 988 287 282 (Concello do Irixo).

Identificación e prevención do dano cerebral adquirido

O dano cerebral adquirido é unha discapacidade que teñen en Galicia máis de 35.000 persoas e que está causada na maioría dos casos por un ictus ou por un traumatismo cranioencefálico (derivado sobre todo de accidentes de tráfico, pero tamén laborais, golpes, caídas...). A súa incidencia incrementouse nos últimos anos, e continúa a medrar, especialmente polo aumento de casos de ictus.

Ese aumento está motivado tanto polo envellecemento da poboación como polos cambios nos hábitos de vida (peor alimentación, máis sedentarismo, estrés, e moitos outros), ambos factores de risco do ictus. Ademais, o desenvolvemento da atención médica de emerxencias provoca que se salven vidas que continúan, pero con discapacidade adquirida.

Durante a sesión informativa achegaranse recomendacións para a prevención, así como nocións sobre como identificar un ictus, describiranse as secuelas -moitas delas invisibles, como as condutuais, emocionais ou as cognitivas-, detallando as principais necesidades das persoas e familias con dano cerebral adquirido, e ofrecerase todo o abano de recursos de atención dispoñibles.

Apoio institucional

Ademais do apoio do Concello do Irixo, Dano Cerebral Galicia conta para esta actividade co financiamento da Consellería de Política Social e Igualdade, dentro dos programas con cargo á asignación tributaria do 0,7% do IRPF; é dicir, que se organiza grazas ás persoas que marcan ‘X Solidaria’ na súa declaración da renda.

Este mes de abril, coincidindo coa celebración do primeiro ano do programa, “8M, mes a mes”, a Área de Igualdade da Deputación de Ourense quere realizar un recoñecemento especial á importancia de reunión e a sororidade entre mulleres para compartir vivencias, afeccións e pasar o tempo en boa compañía. Nesta ocasións as mulleres seleccionadas para ilustrar esta iniciativa son as “Supermulleres de Boborás” .

Son un grupo de cinco mulleres que se reúnen no concello de Boborás. Está composto por Leontina Vázquez, Mª Dolores González, Rosa Mª Pérez, Concepción García e Rocío Sobrado. Catro delas da parroquia de Sta. María de Xuvencos e unha de San Xulián de Antreses.

Este colectivo xurdiu a raíz de coincidir nun curso ofertado polo Concello de Boborás para as mulleres do rural, e co tempo consolidouse en reunións habituais. Nestas xuntanzas, fundamentalmente realizan diferentes manualidades (ganchillo, calceta, bonequiñas...), e todas elas son doadas á Asociación Española Contra o Cancro.

Ademáis da súa labor solidaria, elas mesmas comentan que usan este espazo para socializar, intercambiar ideas, libros, risas e apoio moral, creando dese xeito unha gran acción social na contorna.

Destaca tamén a Área de Igualdade que dirixe a deputada provincial Teresa Barge, que as agrupacións de mulleres, coma as “Supermulleres” de Boborás, “son moito máis que simples encontros; son fogares da alma onde o tempo se detén para dar paso á complicidade, ao apoio incondicional e á forza compartida. Nestes espazos, cada palabra, cada risa e cada man tendida entrelazan unha rede invisible pero poderosa que sostén a quen a precisa”.

Compartir vivencias, afeccións e momentos de vida converte estas reunións nun refuxio cálido onde o silencio nunca pesa e onde os soños, en lugar de esmorecer, multiplícanse, explica a deputada de Igualdade. “Son fíos invisibles que tecen lazos de sororidade, eses que fan que ningunha muller se sinta soa, que cada historia conte e que cada pequeno xesto de solidariedade transforme o mundo, un punto de ganchillo, unha aperta ou unha gargallada á vez”, conclúe Teresa Barge.

Sebas Lamazares, Fátima Gómez, Maria Luisa Rodríguez, Manuel Nogueira e José Antonio Barge, participan xunto a Xan Pinal na Tertulia dos Venres de COPE O Carballiño, correspondente ao dia 4 de abril de 2025. Escóitaa aquí:

O conselleiro de Cultura, Lingua e Xuventude, José López Campos, visitou hoxe edificio da antiga fábrica de papel da Lavandeira, na localidade ourensá do Carballiño, no que a Xunta investiu 170.000€ para a súa musealización, mediante convenio co Concello, “co obxectivo de seguir enriquecendo toda Galicia con equipamentos culturais que divulguen a nosa historia, desde as artes e as tradicións aos oficios e procesos de industrialización, como é este caso”.

Durante o percorrido, o representante do Goberno galego, que estivo acompañado polo delegado territorial da Xunta en Ourense, Manuel Pardo, e polo director xeral de Cultura, Anxo M. Lorenzo, destacou a importancia de “recuperar para a sociedade lugares que son símbolo do progreso en distintas zonas do noso territorio, que nos falan de como se forxou ese progreso e das xentes que participaron del”. Referiuse así a esta proposta museolóxica que permitirá coñecer a fondo a aparición da industria capitalista no S.XIX no interior galego, así como “poñer en valor a arquitectura industrial”.

Neste senso, López Campos lembrou que, nunha reunión mantida hai días co alcalde do municipio, Francisco Fumega, xa se abordou a posibilidade de integración deste espazo na Rede de centros museísticos de Galicia, unha vez se produza a súa apertura, prevista para os vindeiros meses cando se rematen de acondicionar algunhas cuestións pendentes e se comprobe o cumprimento dos requisitos para figurar no rexistro.

Nesta liña resaltou o “interese social e cultural do contido que alberga” este edificio situado xunto ao río Arenteiro, que ademais de mostrar como se confeccionaba o papel na súa época, tamén contará cunha sala de exposicións e apostará por ser un punto de dinamización cultural. Con este investimento, a Consellería de Cultura, Lingua e Xuventude continúa a contribuír na mellora dos equipamentos culturais en toda Galicia no marco do seu Plan de modernización de infraestruturas mediante convenios cos distintos concellos da Comunidade.

Por outra banda, o Goberno galego cumpre co seu compromiso con facilitar o achegamento á cultura de toda a sociedade, eliminando todo tipo de barreiras, xa sexan físicas, cognitivas, territoriais ou doutra índole, na liña da Lei de cultura inclusiva e accesible de Galicia.

O alcalde do concello de Beariz, realizou en COPE O Carballiño as súas primeiras manifestacións públicas nun medio de comunicación, desde que na pasada semana trascendeu a decisión da Comisión Europea de elixir a mina de litio de Doade como proxecto estratéxico para a Unión Europea.

Manuel Prado dixo que o concello de Beariz está en disposición de escoitar a todos para acreditar a viabilidade deste proxecto, que corresponderá aos técnicos facer o seu traballo, que tería que ser respectuoso e sostible, e sendo así constituiría un gran impulso económico para Beariz e a comarca do Carballiño.

Escoita aquí a entrevista en COPE O Carballiño ao alcalde de Beariz:

A Xunta de Galicia formalizou a prórroga e modificación do contrato da concesión do Hotel Monumento de San Clodio, en Leiro (Ourense), que habilita á empresa Hoteles Turísticos Unidos, S.A. (Hotusa) a seguir proporcionando a atención turística deste establecemento emblemático da oferta turística de Galicia en xeral, e da provincia de Ourense en particular, cunhas condicións que buscan mellorar a atención ao público.

O contrato terá unha vixencia de cinco anos máis, adaptándose ás necesidades de amortización e do investimento realizado no mantemento dunhas instalacións destas características. O documento inclúe a explotación do Hotel Monumento por parte de Hotusa, empresa que, con sede en Chantada, alcanza a cifra de preto de 700 traballadores entre oficinas e hoteis que xestiona na Comunidade galega. O documento inclúe tamén melloras nas condicións do servizo e atención turística e de hostalería que se presta no Hotel Monumento de San Clodio.

En virtude do contrato, o Hotel Monumento de San Clodio deberá cumprir uns períodos mínimos de apertura máis amplos que ata o de agora, que serán todas as fins de semana comprendidas cada ano desde o Entroido ata a Semana Santa. Ademais, desde Semana Santa ata o 12 de outubro deberá estar aberto de forma ininterrompida e continuada todos os días, do mesmo xeito que as pontes de Todos os Santos e a Constitución.

En canto ás instalacións, o contrato tamén estipula, como novidade, que a cafetería e o restaurante deberán estar abertos nos mesmos períodos sinalados con anterioridade e inclúe ademais que deben contar con servizo de atención aos clientes de forma continuada. O contrato refírese tamén de forma específica ao claustro que deberá estar aberto no período indicado e tamén no Nadal.

O documento culmina unha fase de tramitación entre a Xunta e a empresa concesionaria antes de que rematase a vixencia do anterior contrato con data límite o 31 de marzo. No contrato non se inclúe a explotación do spa-vinoterapia por ter vencido este en decembro, circunstancia que obriga a unha licitación que sairá publicada proximamente.

O Grupo Provincial Socialista interpela directamente á Deputación Ourense en relación co estado de obras no Complexo Hospitalario Universitario de Ourense (CHUO) tralo incidente ocorrido no Materno Infantil, onde esta fin de semana se produciu o desprendemento dun teito.

“Trátase dunha situación preocupante que reflicte non só problemas estruturais nas instalacións e no avance das obras, senón tamén unha evidente falta de planificación e compromiso por parte da Xunta de Galicia”, afirmou Álvaro Vila, voceiro socialista na Deputación.

Vila subliñou que as obras do CHUO, iniciadas en 2020 co obxectivo de modernizar as instalacións e adaptalas ás necesidades actuais, “levan anos sendo motivo de queixas por parte dos traballadores, sindicatos e usuarios”.

O voceiro socialista denunciou os retrasos acumulados e destacou a “execución deficiente e impacto negativo que os traballos están a ter sobre as propias condicións de seguridade do inmoble”. Para Vila, “despois dun incidente tan grave como o desprendemento dun teito nunha área tan sensible, é inaceptable que non se ofrezan respostas claras”. Por todos estes motivos, o Grupo Provincial Socialista rexistrou unha serie de preguntas para dirimir se “a Deputación de Ourense está en condicións de garantir que as obras non están paralizadas desde hai semanas” e “que medidas se están tomar para protexer a seguridade de pacientes, persoal sanitario e visitantes”.

Vila considera que a corporación provincial debe interpelar “con urxencia” á Xunta de Galicia para que “asuma a súa responsabilidade”. “Non podemos permitir que a saúde dos ourensáns se tome á lixeira e non sexa unha absoluta prioridade”, sentenciou.

Desleixo da Xunta coa provincia

O socialista evocou retrasos noutros importantes proxectos para a provincia prometidos polo goberno de Alfonso Rueda. Entre estes, a ampliación do centro de saúde de Verín, “cuxas obras aínda non comezaron malia ser anunciadas hai máis de dous anos”; ou a renovación dos equipos médicos do hospital comarcal do Barco de Valdeorras, “unha necesidade urxente que segue estancada”, lembrou Vila.

Segundo este, “non se trata de casos illados, senón que semellan un patrón que xera serias dúbidas sobre a capacidade e vontade do goberno galego para cumprir os seus compromisos con Ourense”, indicou Vila. Para rematar, Álvaro Vila lanzou unha chamada á acción tanto á Deputación como á Xunta de Galicia porque “as ourensás e os ourensáns merecemos respostas claras e accións concretas por parte da Xunta de Galicia”.

“Non podemos seguir agardando mentres a saúde pública non cesa deteriorarse. Non é sen tempo que o goberno galego, como máxima administración competente do servizo na nosa comunidade, deixe de lado a súa lasitude e asuma as súas responsabilidades para comprometerse coa seguridade e futuro do noso sistema sanitario”, concluíu o socialista.